1. Hi cihi a ciboho ca ci nene ka zvontlhe leci a munhu a nga mahako?

KA ZVIKHATI zvo tala, a zviboho lezvi a vapswali va mahako zvi khumba vana vabye hi cikhati co leha. Loku a vapswali va maha zviboho zvo kala zvi nga hi zvi nene, va nga va vangela zvikarato a vana vabye. Kanilezvi, loku va maha zviboho hi wutlhari, va nyika vana vabye a thomo ga kuva ni wutomi ga gi nene ni go tsakisa. Hambulezvo, a vana vonawu va fanele ku maha zviboho hi wutlhari. A ciboho ca ci nene ka zvontlhe leci munhu a nga mahako ku tirela Jehovha, a Papayi wa hina wa le tilweni ni wa lirandzo. — Lis. 73:28.

2. Zviboho muni zva zvi nene lezvi Jesu ni vapswali vakwe va zvi mahileko?

² A vapswali va Jesu va wa ti yimisele ku vhuna vana vabye ku tirela Jehovha. A zviboho lezvi va nga maha zvi kombile ku a ku tirela Jehovha hi wona nchumu wa lisima wutomini gabye. (Luka 2:40, 41, 52) Jesu yenawu i mahile zviboho zva zvi nene lezvi zvi nga mu vhuna ku maha lezvi Jehovha a nga zvi lava. (Mat. 4:1-10) A cikhati leci Jesu a nga kula, i nova munhu wa mu nene, wo tsumbeka, ni wo tiya hlanha. Vontlhe a vapswali va chavako Nungungulu va tsaka va tlhela va tizwa matshandza loku a n’wana wabye a kombisa matshamela lawo.

3. Zviwutiso muni hi to hlamula ka ndzima leyi?

³ Ka ndzima leyi hi ta hlamula zviwutiso lezvi: Zviboho muni zva zvi nene lezvi Jehovha a nga maha xungetano hi Jesu? A vapswali va maKristu va nga gondza yini ka zviboho lezvi a vapswali va Jesu va zvi mahileko? A vaswa va maKristu va nga gondza yini ka zviboho lezvi Jesu a nga maha?

4. Ciboho muni ca lisima leci Jehovha a nga maha xungetano hi N’wana wakwe?

⁴ Jehovha i mu hlawulele a vapswali va va nene Jesu. (Mat. 1:18-23; Luka 1:26-38) A magezu ya Mariya ya ku huma mbilwini, ma tsalilweko lomu ka Bhibhiliya, ma komba lezvi a nga mu randzisa zvona Jehovha ni Mhaka yakwe. (Luka 1:46-55) Lezvi Josefa a nga ci landzelisa zvona cileletelo ca Jehovha, zvi kombile ku i wa mu randza niku i wa lava ku mu tsakisa. — Mat. 1:24.

5-6. Jehovha i vhumelele ku a N’wana wakwe a kumana ni zvikarato muni?

⁵ Wona lezvaku Jehovha a nga hlawulangi a vanhu vo ganya kasi vava vapswali va Jesu. A muphahlo lowu Josefa na Mariya va nga nyikela andzhako ka kupswaliwa ka Jesu, wu komba lezvaku va wa hi zvisiwana. (Luka 2:24) Kuzvilava Josefa i wa hi ni cichachana le Nazareta, kusuhani ni muti wakwe, leci a nga vatla kona zvilo a xavisa. Va wa hanya wutomi go olova, nguvhunguvhu a cikhati leci va ngava ni vana vo tala, a ngango wabye wu kula. — Mat. 13:55, 56.

⁶ Jehovha i vhikele Jesu ka timhango to kari. Kanilezvi, a nga mu vhikelangi ka zvikarato zvontlhe. (Mat. 2:13-15) Hi cikombiso, a maxaka ya Jesu ma wa nga kholwi kakwe. Alakanyela lezvi Jesu a nga karatekisa zvona hi ku a va laha ngangweni wabye va sangula hi ku nga kholwi lezvaku hi yena Mesiya! (Mar. 3:21; Joh. 7:5) Zvi wonekisa ku Josefa, a papayi wa Jesu wa ku mu wundla, i file Jesu na a ha hi muswa niku lezvo zvi mu bayisile. A cikhati leci Josefa a ngafa, kuzvilava zvi lavile ku Jesu, kota n’wana wa nhondzo, a maha ntiro lowu a papayi wakwe a nga maha kasi a hlayisa ngango. (Mar. 6:3) Laha Jesu a nga kula, i no gondza ku hlayisa va ngango wabye. Zvi wonekisa ku zvi lavile ku a tira ku ku phum kasi a kuma mali ni lezvi zvi nga laveka. Hikwalaho, i yi tivile a mikaralo ya ku tira siku gontlhe.

7. a) Zviwutiso muni zvi to vhuna mipatswa mhakeni ya ku pswala ni ku wundla vana? b) Mavingu 2:1-6, i va vhunisa kuyini vapswali a ku gondzisa a vana vabye?

⁷ Loku mu chadhile, na mu xuva kuva ni vana, ti wutiseni lezvi: ‘Hi vanhu vo ti koramisa, va randzako Jehovha ni Mhaka yakwe, lava a nga wa ta va hlawula kasi ku khatalela a n’wanana ke?’ (Lis. 127:3, 4) Loku u sina u hi mupswali, ti wutise lezvi: ‘Ndza gondzisa a vana va mina a  lisima la ku tira hi ku ti tsitsirita?’ (Mutsh. 3:12, 13) ‘Ndza maha zvontlhe zvi nga ntan’wini wa mina kasi ku vhikela vana va mina ka zvikarato zva tiko legi ga Sathani ke?’ (Mav. 22:3) A wu nge vhikeli a vana va wena ka zvikarato zvontlhe lezvi kuzvilava va to kumana nazvo. A ku maha lezvo a zvi koteki. Kanilezvi u nga va longisela ku lwisana ni zvikarato zva wutomi hi ku simama ku va gondzisa hi lirandzo a ndlela ya ku hlota a wurangeli ga Mhaka ya Nungungulu. (Lera Mavingu 2:1-6.) Hi cikombiso, loku a xaka go kari gi tsika lisine, tirisa Bhibhiliya u vhuna a vana va wena a ku wona lisima la ku simama va tsumbekile ka Jehovha. (Lis. 31:23) Loku mu felwa hi munhu mu mu randzako, komba vana va wena a mavhesi ya Bhibhiliya ya ku ma nga va vhuna ku hlula kukarateka ma tlhela ma va nyika kurula. — 2 Kor. 1:3, 4; 2 Tim. 3:16.

8. Hi kuya hi Deuteronome 6:6, 7, zvini lezvi Josefa na Mariya va nga fanele ku maha?

⁸ Josefa na Mariya va gondzisile Jesu laha ka kuza a kula na a tsakelwa hi Nungungulu. Va landzele a zvileletelo lezvi Jehovha a nyikako vapswali. (Lera Deuteronome 6:6, 7.) Va wa mu randza nguvhu Jehovha niku lezvi va nga zvi lava nguvhu ku a vana vabye vonawu va mu randza nguvhu Jehovha.

9. Zviboho muni zva lisima lezvi Josefa na Mariya va nga maha?

⁹ Josefa na Mariya va hlawulile ku khozela Jehovha hi kukhandzakanya ni vana vabye. Lezvo zvi komba ku vhiki ni vhiki va waya mitlhanganweni lomu sinagogeni ga le Nazareta va tlhela vaya Jerusalema lembe ni lembe va yaga Phasika. (Luka 2:41; 4:16) Loku vaya ka matshamu lawo hi ngango, kuzvilava va wa londzowota cikhati leco kasi ku gondzisa Jesu ni vamakabye vakwe a matimu ya vanhu va Jehovha. Kuzvilava va wa patsa ni ku hundza hi ka matshamu ma kumbukiwako lomu ka Mitsalo. Laha a ngango wu ngaya wu kula, kuzvilava zvi wa nga mu oloveli Josefa na Mariya a ku simama va khozela Jehovha hi kukhandzakanya. Hambulezvo, va simamile va rangisa ku khozela Jehovha kota ngango va tlhela vava ni mabhindzu ya ma nene nguvhu. A gin’we ga kona ku simama va randza Jehovha kota ngango.

10. Zvini lezvi a vapswali va maKristu va nga gondzako ka Josefa na Mariya?

¹⁰ A vapswali va randzako Jehovha va nga gondza  yini ka cikombiso ca Josefa na Mariya? A ca hombe ka zvontlhe hi leci: Lezvi mu zvi mahako ni lezvi mu zvi wulako, zvi wa gondzise vana va n’wina lezvaku ma mu randza nguvhu Jehovha. Tivani lezvi: A nchumu wa lisima nguvhu mu nga nyikako a vana va n’wina ku va gondzisa ku randza Jehovha. A tshomba ya hombe mu nga nyikako vana va n’wina ku va vhuna ku randza ku gondza Bhibhiliya, ku khongela, kuya mitlhanganweni, ni ku chumayela — zvontlhe lezvo va zvi maha hi kukhandzakanya. (1 Tim. 6:6) Lisine ku mu fanele ku va nyika lezvi zvi lavekako hi tlhelo ga nyama. (1 Tim. 5:8) Kanilezvi, tivani lezvaku leci ci to va ponisa va nghena misaveni yiswa laha a tiko legi gi to lovisiwa, wunghana gabye na Jehovha — a hi titshomba. * — Ezek. 7:19; 1 Tim. 4:8.

11. a) A wusungukati gi nga ka 1 Timote 6:17-19 gi va vhunisa kuyini a vapswali a ku maha zviboho zva zvi nene laha va wundlako vana vabye? b) Mixuvo muni leyi a ngango wa n’wina wu nga ehleketako hi yona, niku zvi ngava ni mabhindzu muni? (Wona kwadru: “ Mixuvo mu nga ti vekelako”)

¹¹ A zvo ku tiyisa a ku wona a maKristu yo tala ma mahako zviboho zva zvi nene kasi ku vhuna vana vabye lezvaku vava ni wunghana na Jehovha! Va khozela Jehovha hi kukhandzakanya kota ngango. Va famba zvin’we mitlhanganweni ya bandla ni migotsovanyanweni, va tlhela va chumayela. A mingango yo kari yiza yiya chumayela ka tindawu zvi kalako ku ti chumayelwa. A yin’wani yi endza yiya wona Bheteli kutani ku vhunetela ntiro wa ku aka lomu hlengeletanweni. A mingango yi mahako lezvo zvi lava ku yi humesa zvokari lomu phaketini, niku zvi nga guma zvi va bindzelanyana. Kanilezvi, lezvi Jehovha a va katekisisako zvona hi tlhelo ga moya zvi hundza lezvi va humesako. (Lera 1 Timote 6:17-19.) A vana va kulelako ka mingango ya tshamela lego va tolovela ku simama va maha zvilo lezvo zva zvi nene hambu loku va hi va hombe niku a va ti layi ne ni kutsongwani! * — Mav. 10:22.

12. Zvini lezvi Jesu a nga fanele ku maha laha a nga kari a kula?

¹² Contlhe cikhati a Papayi wa Jesu wa le tilweni i maha zviboho zva zvi nene. Ni vapswali vakwe va laha misaveni vonawu va mahile zviboho zva zvi nene. Hambulezvo, laha Jesu a nga kari a kula, i wa fanele ku ti mahela zviboho ha yece. (Gal. 6:5) A ku fana na hina hontlheni, yenawu i wa tlhatlhekile ku ti hlawulela lezvi a zvi lavako. Zvi wa koteka ku a hlawula ku rangisa lezvi yena a zvi lavako. Hambulezvo, i hlawulile kuva ni wunghana na Jehovha. (Joh. 8:29) A cikombiso cakwe ci nga va vhunisa kuyini a vaswa nyamutlha?

13. Ciboho muni ca lisima leci Jesu a nga maha na a ha hi n’wanana?

 ¹³ Kusukela wun’wananeni, Jesu i hlawulile ku ingisa vapswali vakwe. A nga tshukangi a kanyisa wusungukati ga vapswali vakwe, na a ti byela lezvaku wa tiva ku pala vona. Kanilezvi, i no “simama ku va ingisa”. (Luka 2:51) A nga hlakanangi hi ntiro lowu a nga hi nawo kota nhondzo. I mahile zvontlhe a nga zvi kota. I ti karatile nguvhu a gondza ntiro ka papayi wakwe Josefa kasi yenawu a vhunetela ku hlayisa ngango.

14. Hi zvi tivisa kuyini lezvaku Jesu i wa zvi randza ku gondza a Mhaka ya Nungungulu?

¹⁴ Kuzvilava a vapswali va Jesu va mu hlawutele lezvi zvi nga maheka kasi a pswaliwa ni lezvi a tingilozi ta Nungungulu ti nga wula xungetano hi yena. (Luka 2:8-19, 25-38) Hambulezvo, Jesu i wa nga kondli mawoko a ku lezvi va nga mu hlawutela zva enela; i wa tlhela a gondza mitsalo. Hi zvi tivisa kuyini lezvaku Jesu i wa zvi randza ku gondza a Mhaka ya Nungungulu? Hi zvi tiva hi ku na a ha hi mufanyana, a vagondzisi le Jerusalema va ‘hlamalisilwe hi wutlhari gakwe ni mihlamulo yakwe’. (Luka 2:46, 47) Laha a nga hi ni 12 wa malembe kambe, i wa sina a ti kholwisile lezvaku a Papayi wakwe hi Jehovha. — Luka 2:42, 43, 49.

15. Jesu i kombisile kuyini lezvaku i wa hlawula ku maha kurandza ka Jehovha wutomi gakwe?

¹⁵ A cikhati leci Jesu a nga tiva lezvi Jehovha a nga lava ku a maha, i no hlawula ku zvi maha. (Joh. 6:38) Hambu lezvi a nga zvi tiva ku i ta nyenyiwa hi vanhu vo tala, i no hlawula ku ingisa Jehovha. Kusukela laha a nga bhabhatiswa hi 29 Nguveni ya Hina, a ca lisima wutomini gakwe ku wa hi ku maha kurandza ka Jehovha. (Mah. 10:5-7) Hambu a cikhati leci a nga kari afa laha mhandzeni ya hlomulo, i simamile a ti yimisela ku maha kurandza ka Papayi wakwe. — Joh. 19:30.

16. Cini leci a vanana va nga gondzako ka Jesu?

¹⁶ Ingisa vapswali va wena. A ku fana ni vapswali va Jesu — Josefa na Mariya — a vapswali va wenawu a va mbhelelangi. Hambulezvo, va nyikilwe ntiro hi Jehovha wa ku ku vhikela, ku ku gondzisa, ni ku ku rangela. Loku u ingisa a wusungukati gabye u tlhela u va kombisa cichavo kota vapswali va wena, zvi ta “ku fambela khwatsi”. — Efe. 6:1-4, tlhamuselo wa lahasi.

17. Hi kuya hi Joxua 24:15, ciboho muni leci a vaswa va faneleko ku ti mahela?

 ¹⁷ Hlawula loyi u to mu tirela. Maha zvontlhe u zvi kotako kasi u mu tiva khwatsi Jehovha, u tiva kurandza kakwe, ni ndlela ya ku ku maha. (Rom. 12:2) Lezvo zvi ta ku vhuna ku maha ciboho ca lisima nguvhu wutomini ga wena — ku nga ku tirela Jehovha. (Lera Joxua 24:15; Mutsh. 12:1) Loku u lera Bhibhiliya u tlhela u gondza hi kukhandzakanya, u taya u mu randza nguvhu Jehovha niku a kukholwa ka wena ku ta tiya nguvhu.

18. Ciboho muni leci a vaswa va faneleko ku maha; niku i wuyelo muni va to gi kuma?

¹⁸ Hlawula ku rangisa a kurandza ka Jehovha wutomini ga wena. A tiko ga Sathani gi hembela vanhu giku loku u tirisa wutlhari ga wena kasi ku vhuneka wena, u ta kuma litsako. A lisine hi ku lava va hanyelako ku ti lavela titshomba va ti vangela “zvikarato zvo tala”. (1 Tim. 6:9, 10) Kanilezvi, loku u ingisa Jehovha u tlhela u hlawula ku rangisa kurandza kakwe wutomini ga wena, u ta hanya wutomi go tsakisa u tlhela “u tshameka”. — Jox. 1:8.

19. Zvini lezvi a vapswali va nga faneliko ku zvi rivala?

¹⁹ Vapswali, mahani zvontlhe mu zvi kotako kasi mu vhuna vana va n’wina lezvaku va tirela Jehovha. Tsumbani yena; i ta mu vhuna ku maha zviboho zva zvi nene. (Mav. 3:5, 6) Mu nga rivali a mhaka leyi: A vana va n’wina va ta vhuneka nguvhu hi lezvi mu zvi mahako a ku hundza lezvi mu zvi wulako. Hikwalaho, mahani zviboho zvi to va vhuna ku va tsakelwa hi Jehovha.

20. Makatekwa muni va to ma kuma a vaswa loku va hlawula ku tirela Jehovha?

²⁰ Vaswa, a vapswali va n’wina va nga mu vhuna ku maha zviboho zva zvi nene wutomini. Kanilezvi, zvi le ka n’wina a ku maha zviboho zvi to mu maha mu tsakelwa hi Nungungulu. Hikwalaho, pimanyisani Jesu mu hlawula ku tirela a Papayi wa n’wina wa lirandzo. Loku mu maha lezvo, mu ta hanyela co ci tiva zvezvi mu tlhela muva ni litsako wutomini. (1 Tim. 4:16) A cikhatini ci tako a haha wuli! Mu ta hanya wutomi go nandziha ga ku lomu kaya ku hava!