1. A muKristu a bhabhatisilweko i fanele ku simama a maha yini?

U BHABHATISILWE? Loku u bhabhatisilwe u kombisile kubaseni lezvaku wa kholwa ka Jehovha niku u lava ku mu tirela na u hi ni hlengeletano yakwe. * Hi rindzela lezvaku a kukholwa ka wena ku simama ku tiyile. Siku ni siku gi cako, simama ku tiyiseka lezvaku Jehovha i tirisa a hlengeletano leyi kasi a maha kurandza kakwe.

2-3. Matshamela muni ma wonekako laha Jehovha a rangelako hlengeletano yakwe nyamutlha? Nyika cikombiso.

² Lezvi Jehovha a rangelisako zvona a hlengeletano yakwe nyamutlha zvi kombisa matshamela yakwe, lezvi a zvi lavako ku maha, ni milayo yakwe. A hi wulawuleni hi matshamela manharu ya Jehovha ma wonekako ka hlengeletano yakwe.

³ Go sangula: “Nungungulu a nga na cihlawulela.” (Miti. 10:34) A lirandzo hi lona li nga kuca Jehovha lezvaku a nyikela N’wana wakwe kota “hakhelo ya kutlhatlhisa . . . vanhu vontlhe”. (1 Tim. 2:6; Joh. 3:16) Jehovha i tirisa vanhu vakwe kasi a mahungu ya ma nene ma chumayelwa ka vanhu vontlhe va lavako ku mazwa. Lezvo zvi vhuna vontlhe va zvi lavako ku vhuneka hi hakhelo ya kutlhatlhisa. Ga wumbiri: Jehovha i maha zvilo hi kurula ni fanelo. (1 Kor. 14:33, 40) Makunu, lava va mu khozelako a va na ku ti phendla; va fanele ku mu tirela hi fanelo ni nayo ni kurula. Ga wunharu: Jehovha Mugondzisi wa Hombe ka vontlhe. (Isa. 30:20, 21, NM) Makunu, a hlengeletano yakwe yi ti karatela ku gondzisa a Mhaka yakwe: Yi gondzisa vanhu va Jehovha lomu bandleni gakwe, yi gondzisa vanhu laha va yileko hi ku chumayela. A matshamela lawa ya manharu ya Jehovha ma wonekisile kuyini ka bandla ga maKristu yo sangula? A vanhu vakwe nyamutlha va ma pimanyisisa kuyini a matshamela lawa? Kona a moya wo basa wu nga ku vhunisa kuyini laha u tirelako Jehovha na u hi ni hlengeletano yakwe?

4. Kota lezvi zvi wuliwako ka Mitiro 1:8, zvini lezvi Jesu a nga laya vapizani vakwe a ku va maha? Zvi wa ta lava ku va vhuniwa hi yini ntirweni lowo?

⁴ Cikhatini ca maKristu yo sangula: A mahungu lawa Jesu a nga chumayela ma wa vhuna vanhu vontlhe lezvaku va rindzela zva zvi nene. (Luka 4:43) I layile vapizani vakwe lezvaku va simama ku maha a ntiro lowu a nga wu sangula, va chumayela “kala magemeta-musi ya misava”. (Lera Mitiro 1:8.) Wa zvi tiva khwatsi a ku a ntiro lowo va wa nga ta zvi kota ku wu maha hi ntamu wabye basi. Hikwalaho, zvi wa ta lava ku va vhuniwa hi moya wo basa — “a muvhuni” loyi Jesu a nga va tsumbisile. — Joh. 14:26; Zak. 4:6.

5-6. A moya wo basa wu va vhunisile kuyini a vapizani va Jesu?

⁵ A vapizani va Jesu va nyikilwe moya wo basa hi Pentekosta wa 33 Nguveni ya Hina. Zvalezvi va nga nyikiwa ntamu hi moya wo basi, va no sangula ku chumayela. Ndzeni ka cikhatanyana, a vanhu vo tala nguvhu va no vhumela mahungu ya ma nene. (Miti. 2:41; 4:4) Laha a vapizani va Jesu va nga sangula ku xanisiwa, a va womangi hi ku chava. Va no kombela Nungungulu lezvaku a va vhuna; va khongela vaku: “Jehovha . . . vhuna a malandza ya wena a ku simama ma kanela a mhaka ya wena hi kutiya kontlhe.” Va no guma va tala hi moya wo basa va simama ku “kanela mhaka ya Nungungulu hi kutiya”. — Miti. 4:18-20, 29, 31.

⁶ A vapizani va Jesu va wa hi ni zvikarato zvin’wani. Va wa nga hi na mabhuku yo tala ya Mitsalo yo basa. A va fani na hina nyamutlha, vona va wa nga hi na mabhuku yo va vhuna ku zwisisa mitsalo leyo. Ahandle ka lezvo, va wa fanele ku chumayela vanhu va tirimi to tala. Hambu lezvi va nga hi ni zvikarato zvontlhe lezvo, a vapizani lavo vo hiseka va mahile ntiro wo hlamalisa! Va zvi kotile ku ndzeni ka malembe matsongwani va chumayela mahungu ya ma nene “ka zvivangwa zvontlhe laha misaveni”. — Kol. 1:6, 23.

7. Ka 100 wa malembe ma hundzileko, a malandza ya Jehovha ma zvi tivisile kuyini lezvi a nga lava ku ma maha, niku zvini ma nga maha laha ma nga zvi tiva?

⁷ Inyamutlha: Ni nyamutlha Jehovha wa ha simama ku rangela ni ku va nyika ntamu a vanhu vakwe. A kutala ka zvikhati, i va rangela hi ku tirisa Mhaka yakwe, a Bhibhiliya, leyi yi tsalilweko hi ku vhuniwa hi moya wo basa. Lomu ka Bhibhiliya, ku ni matimu ya lezvi Jesu a nga maha, ni cileletelo leci a nga nyika vapizani vakwe ca ku simama va maha ntiro lowu a nga wu sangula. (Mat. 28:19, 20) Hi cigelo leco, zvi kotekile ku kwale kusanguleni, hi Julho wa 1881, A Murindzeli (hi ciNgiza) aku: “A hi vitaniwangi kutani ku totiwa kasi hi ta dzundziwa hi vanhu kutani ku ganya. Kanilezvi, hi vitanilwe hi tlhela hi totiwa kasi hi tirisa zvontlhe hi nga nazvo hi tlhela hi chumayela mahungu ya ma nene.” A cibhukwana ci nga humesiwa hi 1919, ci nga hi ni hloko ya mhaka: “Ka lava va nyikilweko ntiro” (hi ciNgiza), ci wulile lezvi: “A ntiro wu wonekisa ku khwatsi wu hundza tanga ya hina. Kanilezvi a hi wa hina, wa Hosi. Hi ntamu wa yena, hi ta zvi kota ku wu maha.” Hakunene, a ku fana ni maKristu yo sangula, a vamakabye lavo va tiyile hlanha va ti tsitsirita ntirweni lowu, na va tsumba lezvaku a moya wo basa wu wa ta va vhuna ku chumayela vanhu va tixaka tontlhe. Hinawu inyamutlha, ha tsumba lezvaku a moya wo basa wa hi vhuna.

8-9. A Hlengeletano ya Jehovha yi tirisa tindlela muni kasi ku andzisa ntiro wa kuchumayela?

⁸ A hlengeletano ya Jehovha yi tirisile a feramenta ya yi nene nguvhu kasi ku hangalasa mahungu ya ma nene. A feramenta leyo, yi patsa a “Fotodrama da Criação”, fonógrafos, ni mimovha ya wucenje, ni radhu; zvezvanyana yi tirisa tekinolojiya. Ahandle ka lezvo, a hlengeletano ya Jehovha a yi ti tsetsi, yi tira yi nga chayi yi hundzulusela mabhuku hi tirimi to tala ta ku ti wa nga se tshuka ti hundzuluselwa matin’wini ya vanhu. Hikuyini yi mahako ntiro lowo? Yi lava ku a vanhu va tixaka tontlhe vazwa mahungu ya ma nene hi tirimi tabye. Jehovha a nga na cihlawulela. I phrofetile  lezvaku a mahungu ya ma nene ma wa ta chumayelwa “ka wontlhe matiko ni tixaka ni tirimi ni mifumo”. (Kuv. 14:6, 7) I lava lezvaku vontlhe vazwa mahungu ya Mufumo.

⁹ Ahati lava zvi nga kotekiko ku va chumayela, kuzvilava hi lezvi va hanyako ka tiyindlu ti nga ni va guarda kutani ti tshamako ti khotsilwe ke? Kasi hi kota ku chumayela a vanhu lavo, a hlengeletano ya Jehovha yi sangulile ku tirisa a tindlela to hambanahambana ta ku nyika wukustumunyu ga laha kubaseni. Hi cikombiso, hi 2001, a Hubye yi Fumako yi chusile vamakabye le França lezvaku va sangula ku tirisa zvikarinyana zva mabhuku ni tin’wani tindlela to kombisa mabhuku. A vamakabye ka matiko man’wani vonawu va no sangula ku chumayela hi ndlela leyi. A zvi no ku bhindzula. Hi 2011, a vamakabye le Estados Unidos va no sangula machumayelela maswa le dhoropeni ga Nova York, ka gin’we ga matshamu ma teleko nguvhu hi vanhu. Ka lembe go sangula, ku no nyikelwa 102 129 wa mabhuku, ni 68 911 wa marevhista; a 4 701 wa vanhu va no kombela ku gondza Bhibhiliya. Zva dlunyateka ku Jehovha i tirisile moya wakwe wo basa kasi ku vhunetela ntiro lowo. Makunu, a Hubye yi Fumako yi no guma yi leletela vamakabye misaveni yontlhe lezvaku va chumayela hi zvikarinyana ni tin’wani tindlela ta ku kombisa mabhuku.

10. Zvini hi nga mahako kasi hi zvi kota khwatsi ku chumayela ni ku gondzisa?

¹⁰ Lezvi u nga mahako: Mitlhanganweni ya wuKristu, Jehovha i hi gondzisa lezvi hi faneleko ku chumayelisa zvona. Zvi tirise. Chumayela hi kukhandzakanya ni ntlawa wa wena wa simu. A vamakabye va ntlawa wa wena va nga ku vhuna ku u zvi kota ku chumayela ni ku gondzisa khwatsi va tlhela va ku tiyisa hi cikombiso cabye. Timisela, u nga tsiki ku chumayela hambu u kumana ni zvikarato. Khwatsi hi lezvi wu wulako a mutsalo-tshinya wa ndzima leyi, hi maha kurandza ka Nungungulu hi ku vhuniwa hi moya wo basa — a hi wu mahi hi ntamu wa hina. (Zak. 4:6) Kota lezvi hi mahako kurandza ka Nungungulu, ha tiyiseka lezvaku i ta hi nyika ntamu lowu wu lavekako.

11. A hubye yi fumako ya maKristu yo sangula yi tirisile kuyini hi kurula kasi a vanhu va Nungungulu va simama ku maha zvilo hi fanelo ni nayo?

¹¹ Cikhatini ca maKristu yo sangula: A hubye yi fumako le Jerusalema yi tirile nguvhu kasi a vanhu  va Nungungulu va zwanana, va hanya hi kurula va tlhela va maha zvilo hi fanelo ni nayo. (Miti. 2:42) Hi cikombiso, a cikhati leci ku nga vhuka a mhaka ya wukwera kwalomo ka lembe ga 49 Nguveni ya Hina, a hubye yi fumako yi no xuxa mhaka leyo hi ku vhuniwa hi moya wo basa. Loku a mabandla ma wa no hambana ku vila ka mhaka leyi, a ntiro wabye wa ku chumayela na wu nga pswalangi khwatsi mihandzu. Hambu lezvi a vapostoli ni madhota lawo va nga hi vaJudha, a va mahangi ciboho hi ku landza mikhuwo ya ciJudha kutani hi kuya hi lezvi va nga zvi xuva lava va nga vhuvhumisa mikhuwo leyo. Kanilezvi, va no tsika a Mhaka ya Nungungulu ni moya wo basa wu va rangela. (Miti. 15:1, 2, 5-20, 28) Give gihi a wuyelo ga kona? Jehovha i no katekisa a ciboho cabye, a mabandla mava ni kurula, ma zwanana, va tlhela va simama ku chumayela mahungu ya ma nene. — Miti. 15:30, 31; 16:4, 5.

12. Cini ci kombako lezvaku lomu hlengeletanweni ya Jehovha nyamutlha ku na ni kuzwanana niku ku mahiwa zvilo hi fanelo ni nayo?

¹² Inyamutlha: A hlengeletano ya Jehovha yi kari yi tira kasi a vanhu vakwe va hanya hi kurula va tlhela va maha zvilo hi fanelo ni nayo. Phela zva kale nguvhu a hlengeletano na yi maha lezvo. Ka Murindzeli wa 15 ka Novembro wa 1895 (loyi ka cikhati leco hi ciNgiza a nga vitaniwa ku i Zion’s Watch Tower and Herald of Christ’s Presence) ku humesilwe ndzima yi nga hi ni hloko ya mhaka: “Hi maha zvilo hi fanelo ni nayo”, yi nga seketelwa ka 1 Va Le Korinte 14:40. A ndzima leyo yi wulile lezvi: “A vapostoli va tsalile zvilo zvo tala kasi ku vhuna a bandla go sangula lezvaku gi maha zvilo hi fanelo ni nayo . . . Zva lisima a ku hi simama hi landzela ‘a timhaka tontlhe ti tsalilweko kale, ti tsalelweko ku gondzisa hina.’” (Rom. 15:4) Ni vanhu va Jehovha nyamutlha va ti karatela ku zwanana, va hanya hi kurula, ni ku maha zvilo hi fanelo ni nayo, a kufana ni maKristu yo sangula. Kota cikombiso, loku u wo lava kuya wona Cigondzo ca Murindzeli ka bandla gin’wani — hambu ka tiko gin’wani futsi — u wa ta zvi tiva lezvi a cigondzo leco va to ci fambisisa zvona u tlhela u tiva ni ndzima yi to gondziwa. Loku u hi lomo, u wa nga ta tizwa na u lahlekile. Makunu cini ci nga wa ta vhuna vanhu a ku va zwanana, va hanya hi kurula ni ku maha zvilo hi fanelo ni nayo ahandle ka moya wo basa? — Zef. 3:9.

13. Na hi alakanya lezvi zvi wuliwako ka Jakobe 3:17, zvini hi faneleko ku ti wutisa?

¹³ Lezvi u nga mahako: Jehovha i lava lezvaku a  vanhu vakwe va “hlayisa a wumun’we ga moya hi ciboho ca kurula”. (Efe. 4:1-3) Makunu, ti wutise lezvi: ‘Ndza maha zvontlhe ndzi zvi kotako kasi a bandla gi zwanana gi tlhela giva ni kurula ke? Ndza va ingisa lava va rangelako? Ndzi munhu wo tsumbeka ka vamakabye, nguvhunguvhu loku ndzi hi mun’we wa lava va rangelako? Ndza hlayisa cikhati, ndzi randza ku vhuna van’wani ni ku va tirela ke?’ (Lera Jakobe 3:17.) Loku u wona ku zvi kona u faneleko ku chukwatisa, khongela kasi a moya wo basa wu ku vhuna. Laha u yako u tsika moya wo basa wu ku vhuna ku chukwatisa wumunhu ga wena wu tlhela wu ku rangela ka lezvi u zvi mahako, a vamakabye va taya va ku randza nguvhu.

14. Hi kuya hi Va Le Kolosi 1:9, 10, Jehovha i va gondzisisile kuyini a vanhu vakwe ka zana ga malembe go sangula?

¹⁴ Cikhatini ca maKristu yo sangula: Jehovha wa xalala nguvhu hi ku gondzisa a vanhu vakwe. (Lis. 32:8) I lava lezvaku va mu tiva, va mu randza, va tlhela va hanya kala kupindzuka kota vana vakwe a va randzako nguvhu. Zvontlhe lezvo na zvi nga koteki loku i wa nga va gondzisi. (Joh. 17:3) Ka zana ga malembe go sangula, Jehovha i gondzisile vanhu vakwe hi ku tirisa bandla ga wuKristu. (Lera Va Le Kolosi 1:9, 10.) A moya wo basa— ku nga “muvhuni” loyi Jesu a nga va tsumbisile — wu vhunile nguvhu mhakeni leyi ya ku gondzisa. (Joh. 14:16) Wu vhunile vapizani a ku zwisisa a Mhaka ya Nungungulu wu tlhela wu va vhuna ku alakanya zvilo zvo tala lezvi Jesu a nga zvi wulile ni ku zvi maha — lezvi va nga guma va tsala lomu ka tiIvhangeli hi ndzhako ka cikhati. Zvontlhe lezvi va nga zvi tiva zvi tiyisile a lirandzo labye hi Jehovha ni N’wana wakwe va tlhela va randzana.

15. Cini ci ku kombako ku Jehovha wa tatisa lezvi a nga tsumbisa ka Isaya 2:2, 3?

¹⁵ Inyamutlha: Jehovha i phrofetile lezvaku “masikwini yo gumesa”, a vanhu va matiko wontlhe va ta khitikana vaya citsungeni cakwe co fananisa kasi va ya gondzisiwa a tindlela takwe.  (Lera Isaya 2:2, 3.) A ciphrofeto leco ha ci wona na ci tatiseka. Ha zvi wona ku a wukhozeli ga lisine gi nene nguvhu a ku hundza wukhozeli gontlhe ga mawunwa. Jehovha i hi nyika zvakuga zva talela ga cima! Zvo ya hi ku halakela! (Isa. 25:6) I hi nyika zvakuga lezvo zvo tala ni zvo hambanahambana hi ku tirisa “nandza go tsumbeka ni go tlhariha”. Hi cikombiso, hi nga lera tindzima, hi ingisela tikanelo, hi tlhela hi wona tivhidhio ta zvibhonekana. (Mat. 24:45) Hi ti zwisa ku khwatsi hi Elihu, a munghana wa Joba, loyi a ngaku: ‘Himani a gondzisako ku fanana na [Nungungulu ke]?’ — Joba 36:22.

16. Zvini u nga mahako kasi u kula hi tlhelo ga moya?

¹⁶ Lezvi u nga mahako: A moya wa Nungungulu wu ta ku vhuna ku hanya hi lezvi u lerako ni lezvi u gondzako lomu ka Mhaka yakwe. Khongela a ku fana ni mutsali wa tisimu, loyi a ngaku: ‘Jehovha, ndzi gondzise a ndlela ya wena, ndzi ta famba [lisineni la] wena; maha mbilu ya mina yi chava vito ga wena.’ (Lis. 86:11) Simama kuga zvakuga zva moya lezvi Jehovha a hi nyikako hi ku tirisa a Mhaka yakwe ni hlengeletano yakwe. U nga tsakisiwi hi ku tiva zvilo basi. Ti karatele ku ti kholwisa a lisine leli u gondzako u tlhela u hanya hi lona. A moya wa Jehovha wu nga ku vhuna ku zvi maha lezvo. Ti karatele ku tiyisa vamakabye kambe. (Mah. 10:24, 25) Hikuyini? Hakuva zviro zva ngango wa wena wa moya. Khongela kasi a moya wo basa wu ku vhuna ku nyika mihlamulo yo huma mbilwini mitlhanganweni ya wuKristu ni ku maha zvontlhe u zvi kotako loku u hi ni cipandze. Loku u maha lezvo, u komba Jehovha ni N’wana wakwe lezvaku wa ti randza “tiyivhu” takwe ta lisima. — Joh. 21:15-17.

17. U nga kombisa kuyini lezvaku wa seketela a hlengeletano ya Jehovha hi kutsumbeka?

¹⁷ Zvezvanyana, laha misaveni ku to sala a hlengeletano leyi yi rangelwako hi moya wa Nungungulu do. Hikwalaho, tira hi kuhiseka ni hlengeletano ya Jehovha. Chumayela vontlhe u va kumako, u pimanyisa Nungungulu a nga hiko na cihlawulela, loyi a randzako vanhu vontlhe. Mu pimanyise mhakeni ya ku randza ku maha zvilo hi fanelo ni nayo hi ku ti karatela ku laha bandleni kuva ni kurula ni kuzwanana. Ingisa a Mugondzisi wa wena wa Hombe hi kuga zvakuga zvontlhe zva moya lezvi a hi nyikako. Loku u maha lezvo, u nga ta chava nchumu laha a tiko ga Sathani gi yako kuloveni. Kanilezvi, u ta yima u tiyile ni lava va tsumbekako va tira zvin’we ni hlengeletano ya Jehovha.