Kasi a zvigondzani zva Bhibhiliya zvi zvi kota ku chumayela, zvi wa fanele ku tiya hlanha. Va wa fanele ku kanela “mahungu yo saseka” ka vanhu va timbilu ti nene, ni “siku ga ku ti photela” ga Nungungulu ka vakubiha.

Makabye J. H. Hoskin, a nga tshama Canadá, i tiyile hlanha a chumayela hambu lezvi a nga vhukelwa. Kusanguleni ka lembe ga 1921, i no kumana ni mufundisa wo kari wa Metodhista. Makabye Hoskin, i sangulisile lezvi a bhulo gabye: “Ndzi xuva ku hiva ni mabhulo yo nandziha xungetano hi Bhibhiliya. Hambu loku hi nga zwani ka mhaka yo kari, hi nga gemeta bhulo ga hina hi ndlela ya yi nene hi tlhela hi hambana hi kurula.” Kanilezvi, lezvo a zvi mahekangi. Loku makabye Hoskin a zvi alakanya, i wula lezvi: “Zvalezvo hi nga sangula ku bhula, i no vhala livati yi vanga guwa ga ku tlhela ndzi alakanya ku a vhidro ga yona ga hombe gi pandzekile gi ku hohlo.”

A wanuna loye wa muMetodhista i no banguleka aku: “Famba chumayela lava va nga hiko maKristu.” Makabye Hoskin i no miyela. Kanilezvi, a cikhati a nga kari a famba, i no ti byela lezvi: ‘Kuveni hi wena u kalako u nga hi muKristu!’

A cikhati leci a wanuna loye a nga kari a gondzisa lomu chichini yakwe hi mandziko wa kona, i no simama ku wulawula zvo biha hi makabye Hoskin. Loku a zvi alakanya, i wula lezvi: “I no byela tiyivhu takwe a ku ndzi munhu wo hemba nguvhu ka vontlhe va vileko kona ga dhoropa lego, a va byela ku a va faneli ku ndzi amukela. A tlhela aku ndzi fanele ku dawa.” Kanilezvi makabye Hoskin, a nga tsikangi ku chumayela. I no simama a chumayela a tlhela a bhula ni vanhu vo tala nguvhu. I wulile lezvi: “A ndzi no ku tsaka hi ku chumayela ka wutshamu legi. A vokari va waza va ndzi byela lezvi: ‘Ha zvi tiva ku lowu u mahako i ntiro wa Nungungulu!’ Va tlhela vaku: ‘Hi ku vhuna hi yini kasi u nga vhumali nchumu?’”

Kasi ku vhuna lava va nga kombisa kutsakela, a Zvigondzani zva Bhibhiliya zvi no humesa programa ya ku gondza Bhibhiliya lomu ka revhista The Golden Age. * A cipandze ci nga wulawula hi ku gondzisa vaswa ci wa hi ni zviwutiso lezvi a vapswali va nga wa ta bhulisana hi zvona ni vana vabye. A vapswali va wa fanele ku wutisa zviwutiso lezvo va guma va vhuna vana vabye a ku kuma mihlamulo ya kona lomu ka Bhibhiliya. A zviwutiso zvo fana ni leci caku: “A Bhibhiliya gi na ni mabhuku mangani?” zvi wa vhuna vanana a ku tiva zvitsongwani hi Bhibhiliya. A zvin’wani zvo fana ni leci caku: “A maKristu wontlhe ma fanele ku rindzela ku vhukelwa hi ndlela yo kari ke?” zvi wa  longisela vanana kasi va chumayela na va nga chavi nchumu.

Lomu ka bhuku O Plano Divino das Eras ku wa hi ni cipandze ci nga mahelwa Zvigondzani zva Bhibhiliya zvi kulako hi tlhelo ga moya. A cipandze leco ci wa hi ni zviwutiso zvo tlhotlha kupima zvi nga seketelwa ka vholume yo sangula ya bhuku Estudos das Escrituras. A zvipandze lezvo zvi vhunile vanhu vo tala nguvhu va nga kari va lera mabhuku lawo. Kanilezvi, a revhista The Golden Age ga 21 ka Dezembro wa 1921, gi tivisile lezvaku a zvipandze lezvo zvi wa nga ta ha humesiwa. Hikuyini?

A vamakabye lava va nga rangela ka cikhati leco va no wona ku lava va sangulako ku gondza Bhibhiliya zvi wa lava ku va gondza hi ku ya hi mhaka ni mhaka. Kasi ku va vhuna, ku no humesiwa bhuku A Harpa de Deus, hi Novembro wa 1921. Lava va nga vhumela ku teka a bhuku legi va wa sangula kurso kambe ya ku ti gondzisa Bhibhiliya. A kurso leyo yi vhunile lava va nga lera bhuku legi a ku tiva lezvaku “Nungungulu i lava ku katekisa vanhu hi ku va nyika wutomi ga pindzukelwa.” Yi wa mahisiwa kuyini a kurso leyo?

Loku a munhu a teka bhuku legi, i wa nyikiwa cikartawana ci nga komba laha a nga fanele ku lera. Ka vhiki gi nga landzela, i wa nyikiwa kartawu gi nga hi ni zviwutiso zvi yelanako ni mahungu lawa a nga lera. Le magumo ka kartawu lego, ku wa kombiwa cipandze leci a nga fanele ku lera ka vhiki gi nga landzela.

Vhiki ni vhiki ndzeni ka 12 wa mavhiki, a cigondzani ci wa nyikiwa a kartawu gin’we hi bandla ga lomu cipandzeni ca yena. A kutala ka zvikhati, i wa nyikiwa kartawu lego hi vamakabye va khosaheleko kutani lava va nga kala va nga ha zvi koti a ku famba va chumayela hi muti ni muti. Hi cikombiso, makabye Anna K. Gardner, wa le Millvale, a Pennsylvania, le Estados Unidos, i wula lezvi: “A cikhati leci a bhuku A Harpa de Deus gi nga humesiwa, makunu makabye wa mina Thayle, loyi zvi nga mu karatela ku famba, i nova ni ntiro wa ku vhiki ni vhiki a ya nyikela makartawu ya zviwutiso.” Loku a cigondzani ci mbheta kurso leyo, makunu ku wa famba muhuweleli kasi a ya mu gondzisa zvin’wani xungetano hi Bhibhiliya.

Kumbheleni ka lembe ga 1921, Makabye J. F.  Rutherford i no rumela papilo mabandleni. Ka papilo lego, i no wula lezvaku “ka lembe lego ku nyikilwe wukustumunyu khwatsi ni ka matshamu yo tala ku hundza ni ka gihi lembe ndzeni ka malembe ya ku tshovela”. Laha a nga wulawula hi ntiro wu nga ha fanele ku mahiwa, i no wula lezvi: “Ka ha hi ni ntiro wa hombe wu faneleko ku mahiwa. Kucani vamakabye va nghena ntirweni lowu wa wu nene nguvhu.” Zvi wonekisa ku a Zvigondzani zva Bhibhiliya zvi gi ingisile a wusungukati lego. Hi 1922, va chumayele Mufumo hi ndlela ya ku cima va wa nga se tshuka va chumayelisa lezvo.