NDZIMA YA CIGONDZO N.° 42
U nga kanakani a ku u le lisineni
“Hlolani a zvilo zvontlhe; mu namarela ka lezvi zvi nga zvi nene.” — 1 TES. 5:21.
LISIMU 142 Hi khoma zvi tiya kutsumbeni ka hina
LEZVI HI TO GONDZA *
1. Hikuyini a vanhu vo tala va nga li tiviko ku a lisine hi lihi mhakeni ya wukhongeli?
INYAMUTLHA ku na ni tichichi to tala nguvhu ti ti byelako ku maKristu niku ti khozela Nungungulu kota lezvi a zvi lavisako zvona. Hi cigelo leco a vanhu vo tala va nga yi tiviko ku a lisine hi lihi. Va wutisa zvilo zvo kota lezvi: “A wukhongeli gontlhe ga mu tsakisa Nungungulu kutani gin’we basi gi mu tsakisako?” Wena ke, wa kholwa hi mbilu yontlhe a ku lezvi hi gondzisako lisine niku lezvi a Vakustumunyu va Jehovha va khozelisako zvontlhe hi zvalezvi Jehovha a zvi lavako ke? A ku zva koteka futsi a ku a munhu a li tiva lisine ka mhaka leyi a tlhela a tiyiseka? A hi wone lisine la mhaka.
2. Hi kuya hi 1 Va Le Tesalonika 1:5, hikuyini Pawule a nga tiyiseka ku lezvi a nga kari a zvi kholwa lisine?
2 Mupostoli Pawule i wa nga kanakani a ku i lisineni. (Lera 1 Va Le Tesalonika 1:5.) I wa nga kholwi ku i lisineni hi ku tsakisiwa hi ku kholwa basi. Phela Pawule i wa randza ku gondza Mhaka ya Nungungulu zvi eta. I wa kholwa ku “yontlhelele Mitsalo yi pimisilwe hi Nungungulu”. (2 Tim. 3:16) Makunu, zvini a zvi polileko lomu ka Mitsalo? I gondzile zvilo zvi nga mu maha a kholwa hi mbilu yontlhe a ku Jesu hi yena Mesiya loyi ku nga tsumbisilwe ku i tata, lezvi a varangeli va wukhongeli ga ciJudha va nga hlawula ku nga cheli kota hi zvona. A vakanganyisi lavo va wa ti byela ku va gondzisa vanhu a lisine hi Nungungulu, kanilezvi va wa maha lezvi Nungungulu a zvi nyenyako. (Tit. 1:16) Pawule i wa hambene ni rangeli lavo, i wa nga hlawuli cipandze cokari lomu ka Mhaka ya Nungungulu a kholwa cona a kaneta lezvi zvin’wani. I wa longile ku gondzisa ni ku hanya hi wusungukati “gontlhe ga Nungungulu”. — Miti. 20:27.
3. Zvi lava ku hi tiva mihlamulo ya zviwutiso zvontlhe hi nga nazvo kasi hi kholwa ku hi le lisineni ke? (Wona ni kwadru: “ A kupima ka Jehovha ni mitiro yakwe zvi tele nguvhu, a hi nge zvi koti ni ku zvi hlayela.”)
3 A vokari va zvi wonisa ku a wukhongeli ga lisine gi fanele ku hlamula zviwutiso zvontlhe, hambu lezvi a Bhibhiliya gi kalako gi nga hi na hlamulo. Ku ngava lezvaku lezvo zva zwisiseka? Wona cikombiso ca Pawule. I kucile maKristu-kuloni aku “hlolani a zvilo zvontlhe”; hambulezvo i tlhelile a komba lezvaku ku wa hi ni zvilo zvo tala a nga kala a nga zvi zwisisi. (1 Tes. 5:21) I tsalile lezvi: “A hi na kutiva ko mbhelela”, a tlhela aku: “A hi woni khwatsi. Zvi fana ni loku hi ti wona laha ka woni ga simbi.” (1 Kor. 13:9, 12) Pawule i wa nga tivi zvilo zvontlhe. Na hinawu a hi tivi zvontlhe. Kanilezvi, Pawule i wa tiva lisine-tshinya xungetano hi Jehovha. Lezvi a nga zvi tiva zvi wa ringana ku a tiyiseka lezvaku lezvi a nga zvi kholwa lisine!
4. Cini ci nga hi vhunako ku tiyiseka ku hi le lisineni, niku zvini hi to zvi wona xungetano hi maKristu ya lisine?
4 A cin’we ca lezvi zvi to hi vhuna ku tiyiseka ku hi le lisineni ku fananisa lezvi Jesu a nga komba ku hi fanele ku mu khozelisa zvona Jehovha ni lezvi a Vakustumunyu va Jehovha va mahisako zvona. Ka ndzima leyi, hi ta wona zvilo lezvi zva mune ma mahako maKristu ya lisine: (1) a ma khozeli zvifananiso, (2) ma kombisa cichavo hi vito ga Jehovha, (3) ma randza lisine, (4) ma randzana hi mbilu yontlhe.
A HI KHOZELI ZVIFANANISO
5. Zvini hi nga gondzako ka Jesu xungetano hi ndlela ya yi nene ya ku khozela Nungungulu, niku hi nga zvi tirisisa kuyini lezvi a nga gondzisa?
5 A cikhati leci Jesu a nga hi le tilweni, ni cikhati a nga hi laha misaveni, i wa khozela Jehovha basi hakuva i mu randza nguvhu. (Luka 4:8) I kucile vapizani vakwe a ku vonawu va maha zvezvo. Jesu ni vapizani vakwe a va tshukangi va tirisa zvifananiso kasi ku khozela Jehovha. Kota lezvi zvi nga kotekiko ku hi mu wona Jehovha Nungungulu, a ku na munhu a nga mahako nchumu wo fana na Jehovha, ne ni kutsongwani! (Isa. 46:5) Ahati ku maha zvifananiso zva lava va vitaniwako ku vobasa ke, ni ku khongela ka zvona? Ka nayo wa wumbiri ka leyi ya Khume, Jehovha i wulile lezvi: ‘U nga ti maheli cifananiso ci vatlilweko co fanana ni zvilo lezvi zvi nga le hehla tilweni, hambu ni lezvi zvi nga lahasi misaveni . . . U nga zvi khizameli.’ (Ekso. 20:4, 5) Ka magezu lawa, lava va lavako ku tsakisa Nungungulu va zvi zwisisa ku a nga zvi lavi a ku hi khozela zvifananiso.
6. A Vakustumunyu va Jehovha inyamutlha va landzela cikombiso ca mani mhakeni ya ku khozela?
6 A titlhari ta ku gondza matimu ti wula lezvaku cikhatini ca vapostoli, a maKristu ma wa khozela Nungungulu basi. Hi cikombiso, a bhuku Matimu ya chichi ya wuKristu (hi ciNgiza), gi wula lezvaku a maKristu yo sangula “ma wa ta ma nyenya nguvhu” a mawonela ya ku tirisa zvifananiso wukhozelini. A Vakustumunyu va Jehovha inyamutlha va landzela cikombiso ca maKristu yo sangula. A hi mahi mikhongelo ka zvifananiso kutani ka lava va vitaniwako ku vobasa; ne ka Jesu. A hi khozeli ni cihi ci yimelako mufumo wa tiko, co kota bhandera kutani zvin’wani. Hambu koba leci ci dhumako, hi ti yimisele ku ingisa magezu ya Jesu, yaku: “Khozela Jehovha Nungungulu wa wena.” — Mat. 4:10.
7. A Vakustumunyu va Jehovha va hambanisa kuyini ni wukhongeli gontlhe legi gin’wani?
7 Inyamutlha a vanhu vo tala va tsaka hi ku ingisela varangeli va wukhongeli va nduma. Va va randza laha ku khwatsi vo va khozela. A vanhu vo tala nguvhu vaya tichichini tabye, va maha mihlengo hi mali ya talela ga cima kasi ku nyika vona kutani ku seketela tihlengeletano leti vona va ti seketelako. A vokari va kholwa ni cihi a varangeli lavo va ci wulako. Loku va wona varangeli lavo va tsaka ku khwatsi hi loku va no wona Nungungulu! A kuhambana ni vanhu lavo, lava hakunene va khozelako Jehovha a va fevheli vanhu ne ku va landzela. Hambu lezvi hi kombisako cichavo ka lava va rangelako, hi hanya hi magezu yo dlunyateka lawa Jesu a nga wula, yaku: “N’wina n’wentlhe mu vamakabye.” (Mat. 23:8-10) A hi khozeli munhu, kani murangeli wa wukhongeli kani murangeli wa politika. A hi seketeli lezvi va zamako ku zvi maha, ne a hi ti ngheniseli ka zvona niku a hi va tiko. Mhakeni leyi, hina Vakustumunyu va Jehovha hi hambene nguvhu ni vontlhe lava va ti byelako ku maKristu. — Joh. 18:36.
HI KOMBISA CICHAVO HI VITO GA JEHOVHA
A maKristu ya lisine ma tizwa matshandza hi ku vhuna van’wani a ku tiva Jehovha (Wona paragrafo 8-10) *
8. Hi zvi tivisa kuyini lezvaku Jehovha i lava ku a vito gakwe gi dhumiswa niku gi tiviwa hi vanhu vontlhe?
8 Ka khati go kari, Jesu i no khongela, aku: “Papayi, dhumisa a vito ga wena.” Jehovha i no hlamula ha yece hi le tilweni hi gezu go dzindza nguvhu a tsumbisa lezvaku i wa ta gi dhumisa a vito gakwe futsi. (Joh. 12:28) Ka cikhati contlhe leci Jesu a nga tira laha misaveni, i dhumisile vito ga Papayi wakwe. (Joh. 17:26) Hikwalaho, a maKristu ya lisine ma tizwa matshandza hi ku tirisa vito ga Nungungulu ni ku vhuna van’wani lezvaku va gi tiva.
9. A maKristu yo sangula ma kombisile kuyini lezvaku ma wa hi ni cichavo hi vito ga Nungungulu?
9 Na ku nga se hundza cikhati co leha a bandla ga wuKristu na gi yimisilwe, Jehovha i no “sangula ku hlawula vanhu . . . va [nga wa ta] vitaniwa hi vito gakwe.” (Miti. 15:14) A maKristu lawo yo sangula ma wa tizwa matshandza hi ku tirisa vito ga Nungungulu ni ku vhuna van’wani lezvaku va gi tiva. Va gi tirisile nguvhu a vito ga Nungungulu laha va nga kari va chumayela ni ka lezvi va nga tsala. * Va kombisile khwatsi a ku va wa hi vanhu va nga vitaniwa hi vito ga Nungungulu. — Miti. 2:14, 21.
10. Hi zvi tivisa kuyini lezvaku a Vakustumunyu va Jehovha hi vona voce va tivekisako vito ga Jehovha?
10 A Vakustumunyu va Jehovha vanhu va seketelako a vito ga Nungungulu ke? Wona lisine la zvilo. Inyamutlha, a varangeli va wukhongeli go tala va maha zvontlhe va zvi kotako kasi a vanhu va nga zvi tivi ku Nungungulu i na ni vito. Va gi susile ka maBhibhiliya yabye, niku ka zvikhati zvin’wani, va betela ni ku gi tirisiwa tichichini tabye. * Hi mani a nga kanetako ku a Vakustumunyu va Jehovha hi vona voce va kombisako cichavo ci faneleko hi vito ga Jehovha va tlhela va gi dzundza ke? Hi vhuna vanhu a ku tiva vito ga Nungungulu a ku hundza ni gihi wukhongeli. Hi ndlela leyo, hi maha zvontlhe zvi nga ntan’wini wa hina kasi hi hanya hi lezvi a vito ga hina gi wulako zvona: A Vakustumunyu va Jehovha. (Isa. 43:10-12) Hi gandlile cipimo ca 240 wa timiliyoni ta Bhibhiliya Wuhundzuluseli ga misava yiswa, legi gi nga ni vito ga Jehovha ka matshamu lawa gi susilweko lomu ka maBhibhiliya man’wani. Hi humesa mabhuku kambe ma seketelwako ka Bhibhiliya hi 1000 wa tirimi ni kuhundza, lawa ma tirisako vito ga Jehovha!
HA LI RANDZA LISINE
11. A maKristu yo sangula ma kombisile kuyini a ku ma wa li randza lisine?
11 Jesu i wa li randza lisine, a lisine hi Nungungulu ni zvontlhe lezvi a to zvi maha. A mahanyela yakwe ma wa komba ku wa li tiva lisine. I tlhelile a vhuna van’wani lezvaku va li tiva. (Joh. 18:37) A vapizani va Jesu va lisine vonawu va wa li randza nguvhu lisine. (Joh. 4:23, 24) Mupostoli Pedro i zile aku a wukhongeli ga wuKristu i “ndlela ya lisine”. (2 Ped. 2:2) Lezvi a maKristu yo sangula ma nga randza lisine, ma wa nga landzeli mikhuwo ya wukhongeli ni ya vanhu, ni mawonela ya vanhu ma nga lwisanako ni lisine. (Kol. 2:8) Ni nyamutlha, a maKristu ya lisine ma ti karatela “ku famba lisineni” hi ku zama ku zvontlhe ma zvi kholwako ni mahanyela yabye zvi yelana ni Mhaka ya Jehovha. — 3 Joh. 3, 4.
12. Zvini va mahako lava va rangelako loku va pola lezvaku lezvi va yi zwisisako zvona a mhaka yo kari xungetano hi lisine zvi fanele ku chukwatisiwa, niku hikuyini va mahako lezvo?
12 A vanhu va Nungungulu nyamutlha a va ti byeli ku va li tiva lisine lontlhe niku va ni wutivi go mbhelela. Zvikhati zvin’wani va phazama ka lezvi va tlhamuselisako zvona Bhibhiliya ni ka lezvi a mabandla ma tirisako zvona. Lezvo a zvi faneli ku hi hlamalisa, hakuva a Bhibhiliya gi zvi veka kubaseni lezvaku a vanhu va Nungungulu va wa nga ta tekela ku li zwisisa khwatsi lisine lontlhe hi khati gin’we, va wa ta li zwisisa hi kufamba ka cikhati. (Kol. 1:9, 10) Jehovha i vhuna vanhu vakwe a ku zwisisa lisine hi kutsongwani-kutsongwani; niku hi fanele ku ti yimisela ku rindzela kala hi li zwisisa khwatsi. (Mav. 4:18) Loku lava va rangelako va pola lezvaku lezvi hi yi zwisisako zvona a mhaka yo kari xungetano hi lisine zvi fanele ku chukwatisiwa, a va zvi maheli mihoni, vo tekela ku cica futsi. A tichichi to tala nyamutlha ti cica kasi ku tsakisa vanhu kutani kasi va nga hambani ni tiko. Kanilezvi, a vanhu va Jehovha va cica kasi ku tsakisa Nungungulu ni ku ti zwananisa ni lezvi Jesu a nga khozelisa zvona. (Jak. 4:4) Lezvi hi cicako a hi cici hi ku a mawonela ya vanhu ma cicile kutani hi ku landza lezvi a votala ka zvi lavako; kanilezvi, hi cica hi kuya hi lezvi hi yi zwisisako zvona mitsalo. Phela ha li randza lisine! — 1 Tes. 2:3, 4.
HI RANDZANA HI MBILU YONTLHE
13. Hi gihi tshamela ga lisima nguvhu ka maKristu ya lisine niku gi wonekisa kuyini ka Vakustumunyu va Jehovha nyamutlha?
13 Ka matshamela wontlhe lawa a bandla ga maKristu yo sangula gi nga tiviwa hi wona, a ga lisima ka wontlhe lirandzo. Jesu i te: “Loku mu randzana, a vanhu vontlhe va ta zvi tiva lezvaku mu vapizani va mina.” (Joh. 13:34, 35) Inyamutlha, a Vakustumunyu va Jehovha va misaveni yontlhe, va zwanana va tlhela va randzana nguvhu. Kani hi va tiko muni, kani hi va hlonge muni, kutani hi va mudhawuko muni, hontlheni ha zwanana. Mitlhanganweni ya hina ya bandla ni leyi ya hombe, zva woneka khwatsi a ku ha randzana futsi. Lezvo zvi hi tiyisekisa lezvaku lezvi hi khozelisako zvona hi zvalezvi Jehovha a zvi lavako.
14. Hi kuya hi Va Le Kolosi 3:12-14, hi yihi yin’we ya tindlela ta ku kombisana lirandzo?
14 A Bhibhiliya gi hi kuca ku hi ‘randzana nguvhu’. (1 Ped. 4:8) A yin’we ya tindlela ta ku kombisa lirandzo lelo ku tsetselelana ni ku timiselana zvihoxo zva hina. Hi tlhela hi hlota tindlela ta ku hana ka vamakabye va hina lomu bandleni, hambu ka lava kuzvilava va hi wonheleko. (Lera Va Le Kolosi 3:12-14.) A lirandzo lelo hi cona cikombiso ca hombe ca ku hi maKristu ya lisine.
HI NA NI “KUKHOLWA KUN’WE”
15. Hi tihi tindlela tin’wani leti hi pimanyisako hi tona a cikombiso hi vekelweko hi maKristu yo sangula?
15 Ku ni tindlela tin’wani kambe hi landzelako hi tona lezvi a bandla ga maKristu yo sangula gi nga khozelisa zvona. Hi cikombiso, hi xaxametisilwe zvalezvi a maKristu lawo yo sangula ma nga xaxametisilwe zvona. A kufana na vona, hi na ni vawoneleli va zvipandze, madhota, ni malandza yo vhunetela. (Filp. 1:1; Tit. 1:5) A kufana ni maKristu yo sangula kambe, hi kombisa cichavo hi milayo ya Jehovha xungetano hi masango ni wukati, lezvi hi faneleko ku wu tirisisa zvona a nkhata, ni ku vhikela bandla kasi gi nga tshami ni vanhu va nga maha ciwonho va nga ti soli. — Miti. 15:28, 29; 1 Kor. 5:11-13; 6:9, 10; Mah. 13:4.
16. Hi gondza yini ka lezvi zvi wuliwako Ka Va Le Efesusi 4:4-6?
16 Jesu i te a votala va wa taku vapizani vakwe, kanilezvi va wa nga tava vapizani va lisine. (Mat. 7:21-23) A Bhibhiliya gonawu gi wula lezvaku masikwini yo gumesa a vanhu vo tala va wa to “wonekisa ku khwatsi va khozela Nungungulu” basi. (2 Tim. 3:1, 5) Hambulezvo, gi tlhela gi zvi veka kubaseni giku kova ni “kukholwa kun’we”, kutani wukhongeli gin’we basi gi tsakisako Nungungulu. — Lera Va Le Efesusi 4:4-6.
17. Hi vamani va nga ka wukhongeli ga lisine nyamutlha?
17 Kala laha hi wonile lezvi Jesu a nga khozelisa zvona ni lezvi a maKristu yo sangula ma nga landzelisa zvona cikombiso ca Jesu. Makunu, hi vamani va nga ka wukhongeli lego ga lisine nyamutlha? Vakustumunyu va Jehovha, a ku na van’wani. I thomo ga hombe nguvhu a kuva vanhu va Jehovha ni ku tiva lisine xungetano hi lezvi a lavako ku zvi maha. A hi simameni a ku nga kanakani a ku hi le lisineni hi tlhela hi khoma zvi tiya ka lona.
LISIMU 3 Ntamu wa hina ni kutsumba ka hina
^ par. 5 Ka ndzima leyi, hi ta wona cikombiso leci hi vekelweko hi Jesu xungetano hi lezvi hi faneleko ku mu khozelisa zvona Jehovha ni lezvi a maKristu yo sangula ma nga landzelisa zvona cikombiso cakwe. Hi ta tlhela hi wona lezvi zvi tiyisekisako lezvaku a Vakustumunyu va Jehovha nyamutlha vonawu va landzela cikombiso leco, va khozela Jehovha hi ndlela yi faneleko.
^ par. 9 Wona kwadru: “A maKristu yo sangula ma wa gi tirisa a vito ga Nungungulu ke?” ka Murindzeli wa 1 ka Julho wa 2010, paj. 6, hi ciPutukezi.
^ par. 10 Hi cikombiso, hi 2008, Papa Benedicto XVI, i leletele lezvaku a vito ga Nungungulu gi nga “tirisiwi ne gi nga kumbukiwi” ka tikhozo ta Katolika, tisimu tabye hambu ka mikhongelo yabye.
^ par. 63 TLHAMUSELO WA MUFOTA: A hlengeletano ya Jehovha yi humesile Bhibhiliya ga Wuhundzuluseli ga misava yiswa hi 200 wa tirimi ni ku hundza kasi a vanhu va lera Bhibhiliya gi nga ni vito ga Nungungulu hi lirimi labye.
