A vhesi legi gi wulako zvilo zvo hlamalisa gi ngalo: ‘Loku u wona kutsimbeketwa ka zvisiwana ni kuhambunyetwa ka milayo lomu tikweni, lezvo zvi nga ku hlamalisi; hakuva loyi a tlakukileko wa cuwukiwa hi lava va mu hundzako, ni hehla ka vona vontlhe ku na ni van’wani va tlakukileko nguvhu.’— Mutsh. 5:8.

Loku hi nga ehleketi hi lezvi Jehovha a yi wonisako zvona a mhaka leyi, a vhesi legi gi zwalisa ku khwatsi gi wula tihosi ta misava basi. Kanilezvi, loku hi ehleketa khwatsi hi gona, hi ta wona lezvaku gi ni lisine lo kari xungetano hi Jehovha, leli li faneleko ku hi chavelela ni ku hi tiyisa.

Mutshawuteli 5:8 i wulawula hi hosi yi xanisako zvisiwana yi tlhela yi ala ku zvi mahela kululama. A hosi leyo, yi wa fanele ku alakanya lezvaku ya woniwa hi wokari a nga ni cikhundla ca hombe ku hundza yona, kutani a nga ni wuhosi ga ku hundza legi ga yona. Lisine futsi, zva koteka ku ku hi ni van’wani va nga ni wuhosi a ku hundza hosi leyo. A ya hava hi ku ka mifumo ya vanhu, ni valava va nga va hombe ka hosi leyo, zva koteka ku vonawu va bihile. Makunu a citshungu a ci na ka kuya kona! Ci xanisiwa hi tindlela ni matlhelo wontlhe.

A lisine hi ku hambu loku a ciyimo ci ku khwatsi a ku na ndlela ya ku ci tshuka ci cica, hi nga chavelelwa hi ku tiva lezvaku ni lava va “tlakukileko” lomu ka mifumo ya vanhu, va “cuwukiwa” hi Jehovha. Hi nga tsutsumela ka Jehovha, hi chulula timbilu ta hina ka yena. (Lis. 55:22; Filp. 4:6, 7) Ha zvi tiva lezvaku ‘a mahlo ya Jehovha ma languta misaveni yontlhe a ku tiyisa lava va nga vakwe hi timbilu tabye tontlhe’. — 2 Kro. 16:9.

Hikwalaho, Mutshawuteli 5:8, i hi alakanyisa lezvi zvi humelelako futsi tikweni legi hi hanyako ka gona. A munhu hambu a hi ni wuhosi, ku ni mun’wani a nga ni wuhosi ku hundza yena. A ca lisima ka zvontlhe, a vhesi legi gi nga hi alakanyisa a mhaka yo tiya ya ku Jehovha hi yena a nga Hosi a ku hundza vontlhe — a ku na loyi a nga ni wuhosi ku hundza yena. Zvezvi i kari a fuma hi ku tirisa N’wana wakwe Jesu Kristu, a Hosi ya Mufumo wa Nungungulu. Nungungulu wa Ntamu Wontlhe, loyi a wonako vontlhe, i lulamile hi kumbhelela. Ni N’wana wakwe Jesu Kristu, yenawu i lulamile hi kumbhelela.