Hi kuya hi 1 Va Le Korinte 15:8, Pawule i te: ‘Hi kugumesa, i no woneka ka minawu wa ku khwatsi ndzi no pswaliwa a masiku na ma nga se chikela.’ A kale, hi wa tlhamusela lezvaku Pawule i wa wula lezvi zvi nga mu humelela a cikhati leci a ngava ni muwoniso wa Jesu kungangameleni ka le tilweni. Zvi wa ku khwatsi hi loku Sawule a no nyikiwa thomo ga ku pswaliwa kutani ku vhuxiwa hi ka moya a cikhati na ci nga se chikela — na ka ha kiyela malembe yo tala kasi a kuvhuka ka tshamela lego ku maheka. Hambulezvo, andzhako ka ku gi gondza zvi eta a vhesi legi ku wonekile lezvaku i chukwana ku cica a tlhamuselo wa gona.

Lisine ku laha Pawule i wa wulawula hi lezvi zvi nga humelela a cikhati leci a ngava muKristu. Kanilezvi zvini a nga lava ku wula a cikhati leci a ngaku i ‘pswalilwe a masiku na ma nga se chikela’? Ku na ni zvotala zva ku zva koteka ku ngha ku hi zvona a nga lava ku wula.

A kuhundzuluka kakwe ku vile ka citshuketi ni ko chavisa. A kutala ka zvikhati loku a munhu a pswaliwa na ma nga se chikela a masiku yakwe, zvi tolovela ku maheka na zvi nga rindzelwangi. A cikhati leci Sawule (loyi hi ndzhako ka cikhati a nga vitaniwa ku hi Pawule) a ngaya Dhamasku kasi ku ya xanisa maKristu, i wa nga zvi rindzelangi a ku wona muwoniso wa Jesu a vhuxilweko hi ka vafileko. A kuhundzuluka ka Pawule a ku vangi ka citshuketi ka yena yece, kanilezvi ni ka maKristu lawa a nga lava ku ya ma xanisa dhoropeni lego. A cin’wani kambe, lezvi zvi nga humelela zvi chavisile nguvhu laha ka kuza ava cikhumu hi cikhati co kari. — Miti. 9:1-9, 17-19.

I hundzulukile hi “cikhati ca ku kala ci nga hi cona”. A gezu ga ciGreki gi hundzuluselweko giku ku “pswaliwa a masiku na ma nga se chikela” gi nga ha wula kambe lezvaku ku pswaliwa hi “cikhati ca ku kala ci nga hi cona”. A Bhibhiliya go kari gi vitaniwako ku i A Bíblia de Jerusalém gi zvi wulisile lezvi: “Zvi wa ku khwatsi ndzi no pswaliwa hi cikhati ca ku a nga kona a nga zvi rindzele.” A cikhati leci Pawule a nga hundzuluka, Jesu i wa tlhelile tilweni. A kuhambana ni lava Pawule a va kumbukileko ka mavhesi ya mahlweni ka legi, yena i wa nga mu wonangi Jesu a cikhati a nga vhuxiwa, na a nga seya tilweni. (1 Kor. 15:4-8) Lezvi Jesu a nga woneka ka Pawule na zvi nga rindzelwangi, zvi mu nyikile thomo Pawule ga ku a wona Jesu andzhako ka ku vhuxiwa hi ka vafileko, hambu lezvi zvi nga wonekisa ku khwatsi zvi vile hi “cikhati ca ku kala ci nga hi cona”.

I wa wulawula hi yena wutsumbu hi ndlela yo ti koramisa. Hi kuya hi titlhari to kari, a gezu legi Pawule a nga gi tirisa laha gi nga zwalisa ku khwatsi i wo solasola. Loku ku hi ku hi lezvo zvi nga hi maalakanyweni yakwe, i wa zwisisa ku i wa nga ringanelwi hi kuva ni lungelo legi a nga nyikilwe. Hi lisine, i tlhelile aya mahlweni aku: “Hi mina wa mutsongwani ka vapostoli, niku a ndzi ringani ku vitaniwa ku ndzi mupostoli hakuva ndzi xanisile a bandla ga Nungungulu. Kanilezvi hi kota ya tipswalo ta Nungungulu ndzi lezvi ndzi nga zvona.” — 1 Kor. 15:9, 10.

Hikwalaho, zvi wonekisa ku khwatsi Pawule i wa wulawula hi lezvi Jesu a nga wonekisa zvona ka yena hi citshuketi, ne na zvi nga rindzelwangi, hi cikhati ci nga rindzelwangiko leci a nga hundzuluka hi cona, kutani hi lezvi a nga kala a nga ringanelwi hi kuva ni kuvhululelwa loko ko hlamalisa. Kani hi cihi, Pawule i wa zvi nyika nguvhu lisima lezvi zvi nga mu humelela. A zvi mu siyelangi kukanakana ka lezvaku Jesu i wa vhuxilwe hi ka vafileko. Makunu, a zvi hlamalisi lezvi a kutala ka zvikhati a nga wulawula hi tshango legi gi mahekileko na zvi nga rindzelwangi laha a nga chumayela van’wani xungetano hi ku vhuxiwa ka Jesu hi ka vafileko. — Miti. 22:6-11; 26:13-18.