1-2. Cini ci mahako ku a malandza ya Jehovha ma tsaka? (Jakobe 1:22-25)

 JEHOVHA ni N’wana wakwe wo randzeka va lava lezvaku hi tsaka. A mutsali wa Lisimu 119:2 i wulile lezvi: ‘Va katekile [va tsaka] lava va hlayisako wumboni gakwe, lava va mu lavako hi mbilu yabye yontlhe.’ A cin’wani kambe, Jesu i te: “Ku katekile lava va zwako a Mhaka ya Nungungulu va yi hlayisa!” — Luka 11:28.

² Kota vakhozeli va Jehovha, hi vanhu vo tsaka. Hikuyini? Hi na zvigelo zvo tala. Kanilezvi a ca lisima ka zvontlhe hi ku hi lera Mhaka ya Nungungulu hi kukhandzakanya hi tlhela hi ti karatela ku hanya hi lezvi hi zvi gondzako. — Lera Jakobe 1:22-25.

3. Hi vhunekisa kuyini a cikhati leci hi hanyako hi lezvi hi zvi gondzako lomu ka Mhaka ya Nungungulu?

³ Ku na ni tindlela to tala hi vhunekako hi tona loku hiva “vamahi va mhaka”. A yin’we ya tona hi ku ha zvi tiva lezvaku lego i zambo ga lisima kasi hi tsakisa Jehovha. A ku tiva lezvo zvi maha ku hi tsaka. (Mutsh. 12:13) Laha hi hanyako hi lezvi hi zvi gondzako lomu ka Mhaka ya Nungungulu yi pimiselweko, hi chukwatisa wutomi ga mingango ya hina hi tlhela hi tiyisa wunghana legi hi nga nago ni vamakabye. Lezvo kuzvilava zvi humelele wutomini ga wena. A cin’wani kambe, hi potsa zvikarato zvo tala lezvi zvi kumanako ni lava va kalako va nga ingisi milayo ya Jehovha. Kunene, ha vhumelelana na Hosi Dhavhidha. Andzhako ka loku a wulawulile hi milayo, ni zvileletelo ni kulamula ka Jehovha ka lisimu lakwe, i gumesile hi ku wula magezu lawa: ‘Loyi a zvi hlayisako i na ni nchachazelo wa hombe’. — Lis. 19:7-11.

4. Hikuyini zvi karatako ku hiva vamahi va Mhaka ya Nungungulu?

⁴ Kasi hiva vamahi va Mhaka ya Nungungulu, hi fanele ku lera ni ku gondza Bhibhiliya kasi hi zvi zwisisa lezvi Jehovha a lavako lezvaku hi maha. Kanilezvi hi lisine, a hi contlhe cikhati  zvi olovako hakuva hi tshama na hi khomekile. Hikwalaho, hi fanele ku ti nyika cikhati ca ku hi maha lezvo. Makunu, a hi vhuxeteni mawonela yo kari ma to hi vhuna ku gondza Bhibhiliya siku ni siku. Niku hi ta tlhela hi wona lezvi zvi nga hi vhunako ku hi ehleketa hi lezvi hi lerako, hi tlhela hi wona tindlela ti nga hi vhunako ku hi tirisa lezvi hi lerako wutomini ga hina.

TI NYIKE CIKHATI CA KU LERA MHAKA YA NUNGUNGULU

5. Zvilo muni zvi hi gelako cikhati co tala?

⁵ A kutala ka vanhu va Jehovha va tshama na va khomekile nguvhu. Hi mbheta cikhati co tala na hi khatalela zvilo zvo hambanahambana zva lisima. Hi cikombiso, a kutala ka vamakabye va maha mitiro ya kutihanyisa kasi ku ti khatalela ni ku khatalela mingango yabye. (1 Tim. 5:8) A maKristu yo tala ma khatalela maxaka yabye ma babyako kutani ma khosaheleko. Hontlheni hi fanele ku khatalela lihanyo la hina niku lezvo zviga cikhati. Ahandle ka zvontlhe lezvo, hi na ni zviavelo lomu bandleni. A ca lisima ka zvontlhe ku hi hiseka ntirweni wa kuchumayela. Ndzeni ka zvontlhe lezvo u faneleko ku maha, u nga ci kumisa kuyini cikhati ca ku lera Bhibhiliya siku ni siku, u ehleketa hi lezvi u lerako ni ku tirisa lezvi u gondzako?

6. Zvini zvi nga ku vhunako ku u rangisa ku lera Bhibhiliya wutomini ga wena? (Wona ni mufota.)

⁶ A ku lera Bhibhiliya cin’we ca zvilo “zva lisima nguvhu” ka hina maKristu. Hikwalaho, hi fanele ku zvi rangisa wutomini ga hina. (Filp. 1:10) Xungetano hi munhu wo tsaka, a Lisimu lo sangula li wula lezvi: ‘A tsakela a nayo wa Jehovha, a wu ehleketa mumu ni wusiku’. (Lis. 1:1, 2) Zvi laha kubaseni ku lezvo zvi komba ku hi fanele ku ti nyika cikhati ca ku hi lera Bhibhiliya. Hi cihi cikhati ca cinene ca ku hi lera Bhibhiliya? A hlamulo wu nga hambana hi kuya hi mun’we ni mun’wani wa hina. Kanilezvi hi ku tsema, cikhati leci zvi nga ku olovelako ku u lera Bhibhiliya siku ni siku. A makabye wo kari wa ku hi Victor i wulile lezvi: “Ndzi randza ku lera Bhibhiliya ni mixo.  Hambu lezvi ndzi kalako ndzi nga zvi randzi ku vindzuka, ni mixo a ku na zvilo zvo tala zva ku zvi nga ndzi colopetela. A maalakanyo ya mina ma ngha ma pepile niku zva ndzi olovela a ku veka kupima.” Kuzvilava lezvo wenawu zva ku humelela. Ti wutise lezvi: ‘Ka mina, hi cihi cikhati ca cinene ca ku ndzi lera Bhibhiliya?’

EHLEKETA HI LEZVI U LERAKO

7-8. Zvini zvi nga mahako ku hi nga vhuneki khwatsi hi lezvi hi lerako? Nyika mufananiso.

⁷ Hambulezvo, lisine ku hi nga tshuka hi lera mahungu yo tala hi kukhandzakanya na hi nga vhuneki khwatsi hi lezvi hi lerako. U tshuka u lera zvokari, andzhako ka cikhatanyana u pola lezvaku zvitsongwani u zvi alakanyako? Hontlheni lezvo zva hi humelela. A ya hava hi ku lezvo zvi nga humelela a cikhati leci hi lerako Bhibhiliya. Kuzvilava hi ti mahele makungo ya zvipimo zvo kari hi faneleko ku lera siku ni siku. Lezvo zva dzundzeka. Hi fanele ku ti mahela makungo hi tlhela hi ti karatela ku ma tatisa. (1 Kor. 9:26) Hambulezvo, a ku lera Bhibhiliya masangulo — masangulo ya manene, kanilezvi masangulo basi. Ku laveka zvotala kasi hi vhuneka khwatsi hi lezvi hi lerako lomu ka Mhaka ya Nungungulu.

⁸ Ehleketa hi mufananiso lowu: A mati ya lisima kasi a tisinya ti hanya khwatsi. Kanilezvi loku a vhula yina nguvhu yi nga nyimi, a misava yi nga tala hi mati. Loku lezvo zvi humelela zvi nge vhuni nchumu ku yina kambe. A misava yi lava cikhati ca ku yi pswonga mati kasi ma vhuna tisinya. Hi kufanana, hi fanele ku potsa ku lera Bhibhiliya hi kuhatlisa laha ka kuza ku nga sali cikhati ca ku hi ehleketa hi lezvi hi lerako, ku zvi alakanya, ni ku zvi tirisa. — Jak. 1:24.

9. Zvini hi faneleko ku maha loku hi tolovela ku lera Bhibhiliya hi kuhatlisa?

⁹ U tshuka u pola ku ka zvikhati zvin’wani u lera Bhibhiliya hi kuhatlisa? Zvini u faneleko ku maha? Hungula zambo. Ti karatele ku u ehleketa hi lezvi u lerako kutani wa ha hi ku lera. Lezvo a zvi faneli ku ku chavisa. Loku u zvi wonisa ku khwatsi a wusungukati ga ku u ehleketa hi lezvi u lerako ga karata  ka wena kuzvilava u nga wona a ku ehleketa kota ndlela ya ku pimisa hi lezvi u lerako. U nga boha ku engetela a cikhati ca wena ca ku gondza kasi u patsa ni cikhati ca ku u ehleketa hi lezvi u gondzako. A cin’wani kambe, u nga boha ku lera mavhesi matsongwani kasi u tirisa cikhati leci ci salako lezvaku u ehleketa hi lezvi u lerako. Victor, loyi a sinako a kumbukilwe, i wulile lezvi: “Ndzi lera Bhibhiliya kutsongwani, kuzvilava cipimo cin’we basi. Kota lezvi ndzi lerako ni mixo, ndza zvi kota ku ehleketa hi lezvi ndzi lerako siku gontlhe.” Kani u lera hi cikhati muni, a ca lisima ku u lera hi zambo gi to ku vhuna ku u vhuneka hi lezvi u lerako. — Lis. 119:97; wona kwadru “ Zviwutiso u nga ehleketako hi zvona.”

10. Nyika mufananiso wa lezvi u nga zvi tirisisako zvona lezvi u lerako. (1 Va Le Tesalonika 5:17, 18)

¹⁰ Kani u lera Bhibhiliya hi cikhati muni, kani cikhati co kota kwihi u mbhetako na u lera, hlota tindlela ta ku tirisa lezvi u lerako. Laha u lerako mavhesi yo kari, ti wutise lezvi: ‘Ndzi nga ma tirisisa kuyini a mahungu lawa zvezvi kutani cikhatini ci tako? Hi cikombiso, a hi nga zvi veke laha ka ku a kulera ka wena ku patsa 1 Va Le Tesalonika 5:17, 18. (Lera.) Andzhako ka ku lera mavhesi lawa ya mambiri, kuzvilava u nga nyima u ehleketa hi ku wa khongela hi kukhandzakanya ke. A cin’wani kambe, u nga ehleketa hi zvilo lezvi u zvi bongako. Kuzvilava u nga ti yimisela ku bonga Jehovha hi zvilo zvinharu zvo kongoma. Hambu loku wo mbheta timinuto titsongwani basi na u ehleketa hi lezvi u lerako lomu ka Bhibhiliya, zvi nga ku vhuna ku uva muzwi ni mumahi wa Mhaka ya Nungungulu. Ehleketa hi lezvi a ku phinda a mahela legi siku ni siku zvi nga ku vhunisako zvona a cikhati leci u lerako Bhibhiliya! Kunene, u ta kula kota mumahi wa Mhaka ya Nungungulu. Hambulezvo, ahanti ke loku u zvi wonisa ku khwatsi ku na ni zvotala u faneleko ku cica?

TI VEKELE MIXUVO ZVI KOTEKAKO KU YI TATISA

11. Hikuyini ka zvikhati zvin’wani hi nga mbhelako ntamu? Nyika cikombiso.

¹¹ A cikhati leci hi lerako Bhibhiliya ni ku hlota tindlela ta ku tirisa wusungukati ga gona, hi nga tshuka hi mbhela ntamu. Ehleketa hi lezvi: Nyamutlha, a kulera ka wena ka Bhibhiliya ku patsa a wusungukati ga ku u ngavi ni cihlawulela. (Jak. 2:1-8) U pola lezvaku u fanele ku chukwatisa ka ndlela leyi u va khomako hi yona van’wani, hikwalaho u se boha ku cica zvokari. Lezvo zvi sasekile. A mandziko a kulera ka wena ka Bhibhiliya ku khanyisa a lisima la ku ti wonela ka lezvi u wulawulako. (Jak. 3:1-12) U pola lezvaku ka zvikhati zvin’wani a magezu ya wena  ma tshuka ma nga dzundzeki. Hikwalaho, u boha ku u ta wulawula zvilo zva zvinene zvi akako van’wani. A mondlwani, a kulera ka wena ka Bhibhiliya ku patsa citlharihiso ca ku nga mahi wunghana ni tiko. (Jak. 4:4-12) U pola lezvaku u fanele ku hlawula khwatsi lezvi u ti hungatako hi zvona. Hi siku ga wumune, kuzvilava u nga tizwa na u mbhelile ntamu hi zvontlhe lezvi u faneleko ku cica.

12. Hikuyini u nga faneliko ku mbhela ntamu loku a cikhati leci u lerako Bhibhiliya u pola lezvaku u fanele ku cica zvokari? (Wona ni tlhamuselo wa lahasi.)

¹² U nga mbheli ntamu loku ku hi ni zvotala zvi lavako ku u chukwatisa kutani kucica. Leco cikombiso ca lezvaku u na ni mbilu ya yinene. A munhu wa kutikoramisa ni wo tsumbeka i gondza Bhibhiliya na a lava ku wona lezvi a nga cicako. a A cin’wani kambe, alakanya lezvaku zvi lava ku hi simama ku “ambala a munhu muswa”. (Kol. 3:10) Zvini zvi to ku vhuna ku u simama uva mumahi wa Mhaka ya Nungungulu?

13. Hi yihi ndlela ya yinene ya ku tirisa lezvi u gondzako? (Wona ni mufota.)

¹³ Wutshan’wini ga ku zama ku tirisa zvontlhe lezvi u lerako hi khati gin’we, ti vekele mixuvo zvi kotekako ku yi tatisa. (Mav. 11:2) Kuzvilava u nga tirisa mahela legi: Maha lista ya zvilo zvontlhe lezvi u lavako ku chukwatisa, hi kulandzela u hlawula cin’we kutani zvimbiri u sangula hi zvona. Lezvi zvin’wani u nghana u zvi tsika. U ta sangula hi kwihi?

14. Zvini u nga sangulako hi zvona ku cica?

¹⁴ U nga boha ku sangula hi lezvi zvi ku olovelako ku zvi tatisa. Kutani u nga hlawula ku sangula hi lezvi zvi lavekako nguvhu ku u cica. Andzhako ka loku u hlawulile, u nga kambisisa lomu ka mabhuku ya hina, kuzvilava  hi ku tirisa Índice das publicações da torre de vigia kutani Bhuku go kambisisa hi gona ga Vakustumunyu va Jehovha. Khongela ka Jehovha hi mixuvo ya wena. Mu kombele lezvaku a ku “nyika a kuxuva ni ntamu wa ku zvi maha”. (Filp. 2:13) Andzhako ka lezvo, ti karatele ku tirisa lezvi u gondzako. Loku u wona lezvaku u zvi kotile ku tatisa lezvi zvo sangula kuzvilava zvi ta ku kuca ku u cica lezvi zvin’wani. Hi lisine, a cikhati leci u to wona lezvaku u zvi kotile ku cica kutani ku chukwatisa a tshamela go kari ga wuKristu zvi ta ku olovela nguvhu a ku cica lezvi zvin’wani.

TSIKA MHAKA YA NUNGUNGULU YI ‘TIRA KA WENA’

15. A vanhu va Jehovha va hambanisa kuyini ni vanhu vo tala va lerako Bhibhiliya? (1 Va Le Tesalonika 2:13.)

¹⁵ A vanhu vo tala va lera nguvhu Bhibhiliya. Kanilezvi, a ku va kholwa hakunene lezvi a Bhibhiliya gi wulako? Xana va gi tirisa kutani ku gi tsika gi cica wutomi gabye? A ya hava hi ku a kutala ka zvikhati a hlamulo i ahihi. Lezvo zvi hambene nguvhu ni vanhu va Jehovha! A ku fana ni maKristu ya zana ga malembe go sangula, ha vhumela a Mhaka ya Nungungulu “kota lezvi hakunene yi nga yona”. A cin’wani kambe, hi ti karatela ku komba lezvaku a Bhibhiliya ga tira wutomini ga hina. — Lera 1 Va Le Tesalonika 2:13.

16. Zvini zvi nga hi vhunako ku hiva vamahi va Mhaka?

¹⁶ A hi contlhe cikhati zvi olovako a ku lera ni ku tirisa Mhaka ya Nungungulu. Kuzvilava zvi nga hi karatela ku kuma cikhati ca ku lera. Hi lera hi kuhatlisa laha ka kuza hi nga vhuneki khwatsi hi lezvi hi lerako, kutani ku mbhela ntamu hi kota ya zvilo zvo tala zvi lavako ku hi chukwatisa. Kani hi cihi a cikarato ca wena, a hi ca hombe laha ka ku zvi nga koteki ku ci hlula. U nga ci hlula hi ku vhuniwa hi Jehovha. Ngha hi ti yimisela ku vhumela civhuno cakwe, hiva vamahi va Mhaka, na ku nga hi vazwi va rivalako. Handle ko kanakana, laha hi toya hi lera nguvhu a Mhaka ya Nungungulu ni ku yi tirisa wutomini ga hina hi tava vanhu vo tsaka nguvhu. — Jak. 1:25.