A hi faneli ku alakanyela lezvaku hi kota ya lezvi va nga kala va nga hi kona basi a cikhati leci Jesu a nga yimisa a Cilalelo ca Hosi, lava va 70 va wa nga ha amukeleki kutani ku va wa mu tsikile. Jesu i wo lava ntsena a kuva ni vapostoli vakwe ka cimaho leco.

Vontlhe va wa amukeleka, lava va 12 ni lava va 70. A kuranga, Jesu i no hlawula 12 wa vavanuna cikari ka vapizani vakwe vo tala a va vitana lezvaku vapostoli. (Luka 6:12-16) Jesu i wa hi Galileya a cikhati leci a nga vitana “lava va 12” a va “ruma ku famba va chumayela a Mufumo wa Nungungulu ni ku hanyisa”. (Luka 9:1-6) Hi ndzhako ka cikhati, na a hi Judhiya, Jesu i no ‘yimisa van’wani va 70 a va ruma hi vambiri vambiri’. (Luka 9:51; 10:1) Hikwalaho, Jesu i wa hi ni valandzeli ka matshamu yo hambanahambana lomu a mahungu yakwe ma nga chumayelwa kona.

A vaJudha lava va ngava vapizani va Jesu va wa simama kuga Phasika ga lembe ni lembe, kuzvilava ni mingango yabye. (Ekso. 12:6-11, 17-20) Laha a cikhati ca kufa kakwe ci nga tshinela, Jesu ni vapostoli vakwe va noya Jerusalema. Kanilezvi a nga vitanangi vapizani vakwe vontlhe va le Judhiya, ni Galileya, ni Pereya kasi a taga navo Phasika. Zvi laha kubaseni lezvaku Jesu i wa lava kuva ni vapostoli vakwe ka cimaho leco. I no byela a vapostoli vakwe, aku: “Ndzi wa xuva nguvhu a kuga Phasika legi na n’wina na ndzi nga se xaniseka”. — Luka 22:15.

Ku wa hi ni cigelo co zwala ca lezvo. Ku wa kiyela cikhati citsongwani kasi Jesu afa kota “Yivhana ya Nungungulu leyi yi susako a ciwonho ca tiko”. (Joh. 1:29) Lezvo zvi wa ta maheka Jerusalema, lomu a miphahlo ka Nungungulu yi nga mahelwa kona hi malembe yo tala. A kufa ka Jesu ku wa ta tisa kutlhatlhisa ka hombe nguvhu ka ku hundza loku ku kotekileko hi kota ya yivhana leyi yi gilweko hi mingango ya vaIzrayeli ka wusiku legi va nga huma hi Gibhite. (1 Kor. 5:7, 8) Lezvi Jesu a zvi mahileko zvi wa ta vhulula ndlela ya ku lava va 12 vava ciseketelo ca bandla ga wuKristu. (Efe. 2:20-22) Leci ci hlamalisako hi ku a dhoropa go basa ga Jerusalema gi na ni “12 wa maribye ya ciseketelo” ma tsalilweko “12 wa mavito ya 12 wa vapostoli va Yivhana”. (Kuv. 21:10-14) Kunene, a vapostoli vo tsumbeka va wa tava ni cipandze ca lisima nguvhu kutatisekeni ka kungo ga Nungungulu. Hikwalaho, zva zwisiseka lezvaku hikuyini Jesu a nga lava kuva navo ka Phasika go gumesa ni ka lezvi zvi nga landzela, ku nga Cilalelo ca Hosi.

Lava va 70 ni vapizani lava van’wani va wa nga hi kona ka Cilalelo ca Hosi na Jesu. Hambulezvo, vontlhe a vapizani lava va kombisileko kukholwa va wa ta vhuneka hi lezvi Jesu a zvi yimisileko, ku nga Cilalelo ca Hosi. Vontlhe lava hi kufamba ka cikhati va ngava maKristu ma totilweko va nghena ka civhumelwano ca Mufumo, leci Jesu a wulawulileko hi cona ni vapostoli vakwe ka wusiku lego. — Luka 22:29, 30.