1-2. a) Zvini lezvi Jehovha a zvi wonako laha a vanhu va tsandza-vahlayi va tlhangeneko Cilalelweni ca Hosi? (Wona mufota wa kapa.) b) Zvini hi to wulawula hi zvona ka ndzima leyi?

ALAKANYELA lezvi Jehovha a zvi wonako laha a vanhu va tsandza-vahlayi misaveni yontlhe va tlhangeneko Cilalelweni ca Hosi. Jehovha a nga cuwuki a ntsengo wa vanhu va nga kona hi kutala ka vona; kanilezvi i cuwuka mun’we ni mun’wani wabye a nga kona. Hi cikombiso, wa va wona lava va tsumbekako lembe ni lembe vata Cilalelweni. Cikari ka vona, ku na ni lava va tako hambu lezvi kuzvilava va xanisiwako nguvhu. A van’wani a vati vhiki ni vhiki mitlhanganweni, kanilezvi va wona Cialakanyiso kota mutlhangano wa lisima nguvhu va faneleko kuva ka wona. Jehovha i wona ni lava va tako Cialakanyisweni hi khati go sangula — kuzvilava na vo tela ku ta zvi wona basi.

² Hakunene, Jehovha wa tsaka hi ku wona vanhu vo tala na va hi Cialakanyisweni. (Luka 22:19) Hambulezvo, Jehovha a nga tsakisiwi nguvhu hi ntsengo wa vanhu va tako. I tsakisiwa nguvhu hi cigelo ci va mahako vata — leco hi cona ci nga ca lisima ka Jehovha. Ka ndzima leyi, hi ta hlamula ciwutiso leci ca lisima nguvhu: Zvini zvi hi kucako a kuya mutlhanganweni wa lembe ni lembe wa ku alakanya kufa ka Jesu, ni mitlhanganweni yontlhe hi mahako vhiki ni vhiki, leyi Jehovha a longiselelako lava va mu randzako ke?

3-4. a) Hikuyini hi yako mitlhanganweni? b) I tshamela muni hi gi kombisako hi kuya mitlhanganweni? c) Hi kota ya lezvi zvi wuliwako ka 1 Va Le Korinte 11:23-26, hikuyini hi nga faneliko ku luza Cialakanyiso?

³ A cigelo-tshinya ci hi mahako hiya mitlhanganweni hi ku yin’we ya tindlela ta ku khozela Jehovha. Hiya mitlhanganweni kambe  hakuva hi kwalomo Jehovha a hi gondzisako kona. A vanhu va matshandza a va vhumeli ku va nga gondzisiwa nchumu hi mun’wani. (3 Joh. 9) Kanilezvi, hina hi zvi lava nguvhu a ku gondzisiwa hi Jehovha ni hlengeletano leyi a yi tirisako. — Isa. 48:17, 18; Joh. 6:45.

⁴ Loku hiya mitlhanganweni hi komba lezvaku hi vanhu vo ti koramisa — va longileko va tlhela va ti yimisela ku gondzisiwa. Ka wusiku ga Cialakanyiso ca kufa ka Jesu, a hi ku khwatsi hiya ka mutlhangano lowu wa lisima hi lezvi hi faneleko kuva kona basi; kanilezvi hi patsa ni ku ti koramisa hi ingisa cileletelo ca Jesu caku: “Simamani ku maha lezvi kasi mu ndzi alakanya hi zvona.” (Lera 1 Va Le Korinte 11:23-26.) A mutlhangano lowu wu tiyisa kutsumba ka hina hi lezvi zvi tako, wu tlhela wu hi alakanyisa ni lezvi Jehovha a hi randzisako zvona. Hambulezvo, Jehovha wa zvi tiva ku lomu ka lembe a hi lavi ku tiyisiwa khati gin’we basi — hi lava ku tiyisiwa makhati yo tala. Hikwalaho, i hi longiselela mitlhangano vhiki ni vhiki a tlhela a hi kuca kuva kona. A kutikoramisa ku hi kuca lezvaku hiya. Vhiki ni vhiki hi mbheta tihora to hlaya na hi longisela mitlhangano leyo ni kuva ka yona.

5. Hikuyini a vanhu vo ti koramisa va vhumelako ku rambiwa hi Jehovha?

⁵ Lembe ni lembe, Jehovha i ramba vanhu kasi a ta va gondzisa; lava va ku ti koramisa va vhumela kuta va ta gondzisiwa. (Isa. 50:4) A vanhu lavo va ti buza hi Cialakanyiso, va tlhela va sangula kuta ka mitlhangano leyi yin’wani. (Zak. 8:20-23) Hina na vona ha ti buza hi ku gondzisiwa ni ku rangelwa hi Jehovha, a ‘muvhuni . . . ni mutiruli wa [hina]’. (Lis. 40:17) Hakunene, a ku na nchumu wo nandziha nguvhu — kutani wa lisima — a ku hundza ku vhumela ku ta gondzisiwa hi Jehovha na Jesu, a N’wana wakwe a mu randzako nguvhu! — Mat. 17:5; 18:20; 28:20.

6. Cini ci nga vhuna wanuna wo kari lezvaku a cica mawonela yakwe ata Cialakanyisweni?

⁶ Lembe ni lembe, hi ramba vanhu vo tala hi laha hi zvi kotako hi kona lezvaku vata Cialakanyisweni ca kufa ka Jesu. Lava vo ti koramisa va vhumela kuta va tlhela va ta vhuneka. Wona cikombiso leci: Ka malembe ma hundzileko, a wanuna wo kari i no nyikiwa cirambo ca Cialakanyiso, a guma a byela makabye wa hina lezvaku a nga ta zvi kota kuya. Hambulezvo ka wusiku ga Cialakanyiso, a makabye wa hina a nga kholwangi laha a nga mu wona na a nghena lomu Salawini ya Mufumo! A wanuna loye i no hlamala hi lezvi a nga amukeliswa zvona, a se sangula kuta mitlhanganweni vhiki ni vhiki. Ndzeni ka lembe, i no luza mitlhangano yinharu basi. Maku cini ci nga mu vhuna ku sangula kuta mitlhanganweni yontlhe? A nga cicangi mawonela yakwe halahala, hi ku i wa hi munhu wo ti koramisa. A makabye loyi a nga mu ramba, i no guma aku: “Wanuna wa ku ti koramisa nguvhu.” Handle ko kanakana, a wanuna loye i rambilwe hi Jehovha lezvaku a ta mu khozela. Zvezvi makabye a bhabhatisilweko. — 1 Ped. 5:5; Joh. 6:44.

7. Lezvi hi zvi gondzako mitlhanganweni ni lomu ka Bhibhiliya zvi nga hi vhunisa kuyini kuva vanhu vo ti koramisa?

⁷ Lezvi hi gondzako mitlhanganweni ni lezvi hi lerako lomu ka Bhibhiliya zvi nga hi vhuna kuva vanhu vo ti koramisa. Laha ku kiyelako mavhiki matsongwani kasi hiva ni Cialakanyiso, a mitlhangano ya hina yi tolovela ku wulawula hi cikombiso ca Jesu ni kutikoramisa loku a ku kombisileko hi ku nyikela wutomi gakwe kota hakhelo ya kutlhatlhisa. Loku ku kiyela masiku ma tsongwani, hi kuciwa ku lera zvipandze zva Bhibhiliya zva zvimaho zvi yelanako ni kufa ni kuvhuka ka Jesu. Lezvi hi gondzako mitlhanganweni, ni lezvi hi lerako ka matimu lawo ya Bhibhiliya zvi hi vhuna ku hi wu bonga nguvhu a muphahlo lowu Jesu a hi maheleko. Lezvo zvi hi kuca ku pimanyisa a kutikoramisa  kakwe ni ku maha kurandza ka Jehovha, hambu loku zvi hi karatela. — Luka 22:41, 42.

8. Jesu i kombisile kutiya-hlana hi ndlela muni?

⁸ A ndlela yin’wani ya ku pimanyisa Jesu ku kombisa kutiya-hlana. Hi nga ehleketa hi kutiya-hlana loku a nga ku kombisa na ku kiyela masiku matsongwani kasi afa. I wa zvi tiva khwatsi ku a valala vakwe va wa ta mu wisa tingana, va muba, va gumesa va mu daya laha mhandzeni. (Mat. 20:17-19) Hambulezvo, i no ti nyikela hi yece kasi a dawa. Laha a cikhati ci nga chikela, i no byela vapostoli vakwe vo kutsumbeka lava a nga hi navo lomu Getsemane aku: “Sukani hi famba. Loyi a ndzi nyikelako i laha kusuhani.” (Mat. 26:36, 46) Laha a citshungu ci nga hi ni matlhari ci nga chikela kasi ku ta mu khoma, i no tekela ku tshinela laha phambeni, a ci byela ku hi yena Jesu, a tlhela a byela masochwa lezvaku ma tsika vapostoli vakwe va famba. (Joh. 18:3-8) Hi nga wona kutiya-hlana ka hombe nguvhu loku Jesu a ku kombisileko! Inyamutlha, a maKristu ma totilweko ni lawa ya tiyivhu tin’wani, ma ti karatela ku pimanyisa Jesu hi ku kombisa kutiya-hlana. Hi ndlela muni?

9. a) Hikuyini zvi nga tshukako zvi lava kutiya-hlana kasi kuya mitlhanganweni? b) A vamakabye va vhalelweko hi kota ya kukholwa kabye va nga vhunekisa kuyini hi kuzwa ku a hixwi mitlhanganweni?

⁹ Kasi kuta mitlhanganweni vhiki ni vhiki, kuzvilava zvi lava ku hi kombisa kutiya-hlana hi lezvi hi kumanako ni zviyimo zvo karata. A vamakabye vokari, a vaxwi mitlhanganweni hambu loku va karatekile, va mbhelile ntamu, kutani na va babya. A van’wani va tiya hlana vata mitlhanganweni hambu loku va xanisiwa hi maxaka kutani wuhosi. Phela a cikombiso ca hina ci va tiyisa nguvhu a vamakabye va hina va vhalelweko paxweni hi kota ya kukholwa kabye. (Mah. 13:3) Laha va zwako ku hi simama hi tirela Jehovha hambu lezvi hi kumanako ni zvikarato, va kuma ntamu wa ku simama va tsumbeka, va tlhela va kombisa kukholwa, ni kutiya-hlana. Mupostoli Pawule i noya hi ku zvi hanya lezvo. Laha a nga hi paxweni le Roma, i wa tsaka contlhe cikhati a nga kari azwa ku a vamakabye va simama ku tsumbeka va tirela Nungungulu. (Filp. 1:3-5, 12-14) Na ku kiyela kutsongwani kasi Pawule a huma paxweni, kutani zvezvi a nga huma, i no tsala papilo gakwe gi ngaya ka Mahebheru. Ka papilo lego, i kucile maKristu yo tsumbeka lezvaku ma simama “ku randzana kota vamakabye” ma tlhela ma nga tshuki ma tsika ku tlhangana. — Mah. 10:24, 25; 13:1.

10-11. a) Hi vamani hi faneleko ku va ramba Cialakanyisweni? b) Hi ku ya hi Va Le Efesusi 1:7, hikuyini hi faneleko ku va ramba a vanhu lavo?

¹⁰ Hi kombisa kutiya-hlana loku hi ramba maxaka, vatiri-kuloni, ni vavhizinyo lezvaku vata Cialakanyisweni. Hikuyini hi va rambako? Hi ku hi zvi bonga nguvhu lezvi Jesu na Jehovha va hi maheleko laha ka kuza hi nga zvi koti ku miyela hi nga rambi van’wani. Hi lava ku vonawu va tiva ku va nga vhunekisa kuyini hi “tipswalo” ta Jehovha leti a ti kombisileko hi hakhelo ya kutlhatlhisa. — Lera Va Le Efesusi 1:7; Kuv. 22:17.

 ¹¹ Laha hi kombisako kutiya-hlana hi kuya mitlhanganweni, hi kombisa ni tshamela gin’wani ga lisima, legi Jesu na Nungungulu va gi kombisileko hi ndlela yo hlamalisa.

12. a) A mitlhangano yi tiyisisa kuyini a lirandzo la hina hi Jehovha na Jesu? b) Va Le 2 Korinte 5:14, 15 i hi kuca ku maha yini kota ndlela ya ku pimanyisa Jesu?

¹² A lirandzo la hina hi Jehovha na Jesu li hi kuca kuya mitlhanganweni. Lezvi hi zvi gondzako mitlhanganweni leyo, zvi tiyisa lirandzo la hina hi vona, zvi tlhela zvi hi alakanyisa hi kukhandzakanya lezvi va hi maheleko. (Rom. 5:8) Nguvhunguvhu a Cialakanyiso ci hi alakanyisa lezvaku Jehovha na Jesu va hi randza nguvhu hontlheni, hambu lava va kalako va nga se li zwisisa a lisima la hakhelo ya kutlhatlhisa. Lezvo zvi hi kuca ku hi va bonga hi tlhela hi kombisa kubonga loko hi ku zama ku pimanyisa Jesu ka lezvi hi hanyisako zvona siku ni siku. (Lera 2 Va Le Korinte 5:14, 15.) Ahandle ka lezvo, a mbilu ya hina yi hi kuca ku dhumisa Jehovha hi lezvi a humesileko hakhelo ya kutlhatlhisa. A yin’we ya tindlela ta ku mu dhumisa ku hlamula hi mbilu yontlhe mitlhanganweni.

13. Hi nga kombisa kuyini ku ha mu randza nguvhu Jehovha ni N’wana wakwe? Tlhamusela.

¹³ Hi nga komba ku ha mu randza nguvhu Jehovha ni N’wana wakwe hi ku ti yimisela ku ti tsona zvokari kasi hi va tirela. A kutala ka zvikhati, kasi hiva kona mitlhanganweni hi fanele ku ti tsona zvokari. A mabandla yo tala ma maha mutlhangano mun’we ndzeni ka vhiki andzhako ka mitiro, laha a kutala ka hina hi kareleko. A wun’wani wu mahiwa kumbheleni ka vhiki, laha a van’wani va humulako. Loku hiya mitlhanganweni hambu hi karele, Jehovha wa zvi wona ke? Ina, wa zvi wona! Hi lisine, laha hi ti karatako nguvhu, hi kona Jehovha a tsakako nguvhu hi lirandzo leli hi kombisako hi yena. — Mar. 12:41-44.

14. Jesu i hi vekile cikombiso mhakeni ya ku ti tsona zvokari hi kota ya lirandzo hi ndlela muni?

¹⁴ Jesu i hi vekele cikombiso mhakeni ya ku ti tsona zvokari hi kota ya lirandzo. I wa ti yimisele ku fela vapizani vakwe, a tlhela a ti yimisela ku siku ni siku a rangisa lezvi zvi nga wa ta vhuna vona, na ku nga hi lezvi zvi to vhuna yena. Hi cikombiso, hambu ka cikhati leci a nga karele kutani ku karateka nguvhu, a nga fambelangi kule ni vapizani vakwe. (Luka 22:39-46) I vekile kupima ka lezvi zvi nga wa ta vhuna vona, na ku nga hi lezvi zvi nga wa ta vhuna  yena. (Mat. 20:28) Loku a lirandzo la hina hi Jehovha ni vamakabye va hina li tiyile ku fana ni leli la Jesu, hi ta maha zvontlhe hi zvi kotako kasi hita Cilalelweni ca Hosi ni mitlhanganweni yontlhe ya bandla.

15. Hi vamani hi khatalako nguvhunguvhu hi vona ku va vhuna?

¹⁵ Hi lumba ngango mun’we wa maKristu ya lisine misaveni yontlhe, niku ha tsaka hi ku mbheta cikhati co tala hi laha hi zvi kotako hi kona na hi ramba van’wani kasi va ta lumba ngango wa hina. Hambulezvo, hi khatala nguvhu hi ku vhuna “va laha ngangweni wa kukholwa”, nguvhunguvhu lava va nyimileko ku chumayela ni kuta mitlhanganweni. (Gal. 6:10) Hi kombisa lirandzo la hina hi vona hi ku va kuca ku vata mitlhanganweni, nguvhunguvhu Cialakanyisweni. A ku fana na Jehovha na Jesu, hinawu ha tsaka nguvhu loku lava va holileko hi tlhelo ga moya va tlhelela ka Jehovha, a Papayi ni Murisi wa hina. — Mat. 18:14.

16. a) Hi nga tiyisana hi ndlela muni, niku a mitlhangano yi ta hi vhunisa kuyini? b) Hikuyini leyi yi nga nguva ya yi nene ya ku alakanya magezu ya Jesu ma nga ka Johani 3:16?

¹⁶ Ka mavhiki ma tako, zama ku ramba vanhu vo tala hi laha u zvi kotako hi kona kasi vata Cialakanyisweni hi 19 ka Abril wa 2019. (Wona kwadru: “ U ta va ramba ke?”) Contlhe cikhati, a hi tiyisaneni hi kuta mitlhanganweni yontlhe leyi Jehovha a hi longiselelako. Laha a kugumesa ka tiko legi ku ya ko ku tshinela, a mitlhangano ya hina ya laveka nguvhu kasi ku hi vhuna ku simama hiva vanhu vo ti koramisa, vo tiya hlana, ni va lirandzo. (1 Tes. 5:8-11) Lezvi Jehovha na Jesu va hi randzako nguvhu, hinawu a hi kombiseni hi mbilu yontlhe lezvi hi va randzisako zvona! — Lera Johani 3:16.