1-2. a) Jehovha i wulawulile ni vanhu hi ndlela muni? b) Zvini hi to wulawula hi zvona ka ndzima leyi?

KUSUKELA kale, Jehovha wa wulawula na hina vanhu. A kale i tirisile vaphrofeti, tingilozi, ni N’wana wakwe Jesu Kristu kasi ku byela vanhu lezvi a zvi lavako. (Am. 3:7; Gal. 3:19; Kuv. 1:1) Inyamutlha, i wulawula na hina hi ku tirisa a Mhaka yakwe, a Bhibhiliya. I vhunile vanhu lezvaku va tsala Bhibhiliya kasi hi tiva a maalakanyo yakwe, hi zwisisa tindlela takwe.

² A cikhati leci Jesu a nga hi laha misaveni, Jehovha i wulawulile makhati manharu hi kwale tilweni. A hi bhuleni hi lezvi a nga wula ka makhati lawo, kasi hi wona lezvi hi nga gondzako, ni lezvi hi vhunekisako zvona.

3. Kota lezvi zvi tsalilweko ka Marku 1:9-11, zvini lezvi Jehovha a nga wula a cikhati leci Jesu a nga bhabhatiswa? Lezvi Jehovha a nga wula, zvi tiyisekisa zvilo muni zva zvinharu zva lisima xungetano hi Jesu?

³ Ka Marku 1:9-11 hi kuma khati go sangula legi Jehovha a nga wulawula hi le tilweni. (Lera.) Marku i tsalile lezvi: “Wena u N’wana wa mina ndzi ku randzako, ndza xalala hi wena.” Zvi wonekisa ku Jesu i tsakile nguvhu hi kuzwa gezu ga Papayi wakwe na a kombisa ku wa mu randza niku wa mu tsumba! Lezvi Jehovha a nga wula, zvi tiyisekisa zvilo zvinharu zva lisima xungetano hi Jesu: Co sangula, Jesu i N’wana wa Jehovha. Ca wumbiri, Jehovha wa mu randza N’wana wakwe. A ca wunharu, Jehovha wa xalala hi N’wana wakwe. A hi kambisiseni khwatsi a zvilo lezvi zva zvinharu.

4. A cikhati leci Jesu a nga bhabhatiswa, wuxaka muni ga giswa ni go hlawuleka a nga sangula kuva nago na Nungungulu?

⁴ “Wena u N’wana wa mina.” Hi magezu lawa, Jehovha i wo komba lezvaku Jesu, a N’wana wakwe wo randzeka, makunu i wa sangulile kuva ni wuxaka ga giswa ni go hlawuleka naye. A cikhati leci Jesu a nga hi le tilweni, i wa hi n’wana wa Nungungulu  kota yin’we ya tingilozi. Kanilezvi laha a nga bhabhatiswa, i no totiwa hi moya wo basa. Ka khati lego, Nungungulu i no komba lezvaku Jesu, kota N’wana wakwe a totilweko, makunu i wa rindzela ku tlhela tilweni a yava Hosi ni Mupristi wa Hombe a yimisilweko hi yena. (Luka 1:31-33; Mah. 1:8, 9; 2:17) Hikwalaho, laha Jesu a nga bhabhatiswa, a Papayi wakwe Jehovha i wa hi ni cigelo co zwala ca ku wula ku: “Wena u N’wana wa mina.” — Luka 3:22.

5. Hi nga ci pimanyisisa kuyini a cikombiso ca Jehovha mhakeni ya ku kombisa lirandzo ni ku tiyisa van’wani?

⁵ Hi “wena . . . ndzi ku randzako.” A cikombiso ca Jehovha ca ku tiyisekisa munhu lezvaku wa mu randza, ci hi gondzisa ku zva lisima a ku hlota tindlela ta ku tiyisa van’wani. (Joh. 5:20) Ha tsaka loku a wokari hi mu nyikako lisima a kombisa lirandzo a tlhela a hi dzundza hi nchumu wo kari wa wu nene hi wu mahileko. A vamakabye va hina bandleni ni va ngango wa hina, vonawu va zvi xuva ku hi va randza hi tlhela hi va tiyisa. Loku hi dzundza van’wani, hi tiyisa a kukholwa kabye hi tlhela hi va kuca ku simama va tirela Jehovha hi kutsumbeka. Nguvhunguvhu a vapswali va fanele ku tiyisa a vana vabye. Loku va va dzundza hi mbilu yontlhe va tlhela va kombisa lezvaku va va randza, zvi va vhuna ku kula khwatsi.

6. Hi cihi cigelo hi nga naco ca ku tsumba Jesu Kristu?

⁶ “Ndza xalala hi wena.” A magezu lawa ma komba lezvaku Jehovha i wa tiyiseka ku Jesu i wa ta tsumbeka a maha kurandza ka Papayi wakwe. Jehovha wa mu tsumba nguvhu a N’wana wakwe. Maku, hinawu hi nga tiyiseka hi mbilu yontlhe lezvaku Jesu i ta tsumbeka a tatisa zvitsumbiso zvontlhe zva Jehovha. (2 Kor. 1:20) Loku hi ehleketa hi cikombiso ca Jesu, zvi ta hi nyika ntamu wa ku simama hi landzela nkondzo wakwe. Jehovha yenawu a nga kanakani lezvaku a vanhu vakwe kota  ntlawa, va ta simama ku gondza ka N’wana wakwe. — 1 Ped. 2:21.

7. Hi kuya hi lezvi zvi tsalilweko ka Matewu 17:1-5, Jehovha i wulawulile hi le tilweni ka cikhati muni? Zvini a nga wula ka khati lego?

⁷ Lera Matewu 17:1-5. A khati ga wumbiri legi Jehovha a nga wulawula hi le tilweni, kuve cikhati leci Jesu a nga “hundzuka,” kutani ku, a nga cica ciyimo. Jesu i wa rambile Pedro, na Jakobe, na Johani lezvaku vaya le hehla ka citsunga co leha. A cikhati va nga hi seyo, va nova ni muwoniso wo hlamalisa. A nghohe ya Jesu yi no woninga, a tinguwo takwe ti hatima. Ku no woneka vanhu vambiri na va wulawula na Jesu xungetano hi kufa ni kuvhuka kakwe ku nga hata. A vanhu lavo, a mun’we i wa fana na Mosi, loyi mun’wani na Elija. Hambu lezvi a vapostoli lava va vanharu va nga “etlele”, va no wu wona a muwoniso lowo a cikhati leci va nga vhuka. (Luka 9:29-32) Va no guma va fenengetwa hi refu go ngangamela, vazwa gezu hi lomu refini. Lego gi wa hi gezu ga Nungungulu! A ku fana ni cikhati leci Jesu a nga bhabhatiswa, Jehovha i no komba kambe lezvaku wa xalala hi N’wana wakwe niku wa mu randza. I te: “Loyi hi yena N’wana wa mina ndzi mu randzako, loyi ndzi xalalako hi yena.” Kanilezvi ka khati legi, i no engetela zvin’wani, aku: “Mu ingiseni.”

8. Jesu ni vapizani vakwe va vhunekisile kuyini hi muwoniso wa kungangamela kakwe?

⁸ A muwoniso lowo wu nyikile masema ya kungangamela ni ntamu wa Jesu a cikhati leci a nga wa tava Hosi ya Mufumo wa Nungungulu. Handle ko kanakana, Jesu i tiyisilwe nguvhu hi muwoniso lowu, a kuma ntamu wa ku lwisana ni zvontlhe a nga wa ta kumana nazvo — tixanisa ni kufa hi ndlela yo bayisa nguvhu. A muwoniso lowu kambe wu tiyisile a kukholwa ka vapizani vakwe wu tlhela wu va nyika ntamu wa ku lwisana ni zviringo zva kukholwa, lezvi va nga wa ta kumana nazvo ka malembe ma nga landzela. Loku ku hundzile cipimo ca 30 wa malembe, mupostoli Pedro i kumbukile a muwoniso lowu, a komba lezvaku i wa ha wu alakanya khwatsi. — 2 Ped. 1:16-18.

9. Wusungukati muni ga gi nene legi Jesu a nga nyika vapizani vakwe?

⁹ “Mu ingiseni.” Hi magezu lawa, Jehovha i kombile kubaseni lezvaku i lava ku hi demba ndleve ka lezvi a N’wana wakwe a nga wula hi tlhela hi zvi ingisa. Zvini a nga wula Jesu a cikhati a nga hi laha misaveni? I wulile zvilo zvo tala zva lisima hi faneleko ku zvi ingisa. Hi cikombiso, i gondzisile vapizani vakwe hi lirandzo lezvi va nga fanele ku chumayelisa zvona mahungu ya ma nene, a tlhela a va alakanyisa hi kuphindaphinda lezvaku va fanele ku tshama na va rindzela. (Mat. 24:42; 28:19, 20) I va kucile ku va ti karata nguvhu ni ku simama va timisela. (Luka 13:24) I kucile vapizani vakwe kambe a ku va fanele ku randzana, va zwanana, va tlhela va ingisa milayo yakwe. (Joh. 15:10, 12, 13) Hi ngazwa wusungukati ga gi nene legi Jesu a nga nyika vapizani vakwe! A wusungukati legi ga ha tira ni nyamutlha, a ku fana ni cikhatini ca Jesu.

10-11. Hi nga kombisa kuyini lezvaku ha mu ingisa Jesu?

¹⁰ Jesu i te: “Ni wihi a yimako ni lisine wa ingisa a gezu ga mina.” (Joh. 18:37) Hi komba lezvaku ha ingisa a gezu gakwe loku hi ‘simama ku timiselana ni ku tsetselelana’ hi mbilu yontlhe. (Kol. 3:13; Luka 17:3, 4) Hi komba ku ha ingisa a gezu gakwe kambe hi ku chumayela mahungu ya ma nene hi kuhiseka hi “zvikhati zva zvi nene ni ka zvikhati zvo nonoha”. — 2 Tim. 4:2.

¹¹ Jesu kambe i te: “A tiyivhu ta mina ta ingisa  a gezu ga mina.” (Joh. 10:27) A vapizani va Kristu a va ingisi gezu gakwe hi ku demba ndleve ka lezvi a wulako basi; kanilezvi hi ku tlhela va zvi maha. A va colopetelwi hi “ku karateka hi wutomi”. (Luka 21:34) Kanilezvi, va rangisa ku ingisa milayo ya Jesu wutomini gabye hambu loku va kumana ni zviyimo zvo karata. Ku ni vamakabye vo tala va timiselako zvikarato zva hombe, zvo kota ku xanisiwa hi valala, wusiwana go vhumala ni cipeneti, ni makhombo ya ntumbuluko. A vamakabye lavo, va ti yimisele ku simama va tsumbeka ka Jehovha hambu loku vo xanisekisa kuyini. A vamakabye lavo, Jesu i va tiyisekisa lezvi: “Ni wihi loyi a vhumelako milayo ya mina a tlhela a yi hlayisa wa ndzi randza. Makunu loyi a ndzi randzako, i ta randziwa hi Papayi wa mina.” — Joh. 14:21.

12. Hi yihi ndlela yin’wani ya ku komba lezvaku ha mu ingisa Jesu?

¹² A ndlela yin’wani ya ku komba lezvaku ha mu ingisa Jesu ku tirisana khwatsi ni lava a va yimisileko kasi ku hi rangela. (Mah. 13:7, 17) A hlengeletano ya Nungungulu yi cicile zvilo zvo tala ka malembana lawa. A zvilo lezvo zvi patsa lezvi hi chumayelisako zvona, matirisela ya zvilo zvo kari kuchumayeleni, lezvi hi mahisako zvona a mitlhangano, ni lezvi hi akisako zvona ni ku vhuxisa ni ku hlayisa a tiSalawu ta Mufumo. Ha zvi bonga nguvhu a zvileletelo lezvo zvi chikelako hi cikhati ci nene, lezvi zvi kombisako lirandzo la Jehovha zvi tlhela zvi mahelwa ku vhuna hina. Laha hi ti karatelako ku zvi landzela, ha tiyiseka lezvaku Jehovha i ta hi katekisa.

13. Hi vhunekisa kuyini hi ku ingisa a gezu ga Jesu?

¹³ Ha vhuneka loku hi ingisa zvontlhe lezvi Jesu a nga gondzisa. Jesu i tiyisekisile a vapizani vakwe lezvaku va wa ta pepa hi lezvi a nga kari a va gondzisa. I te: “N’wina n’wentlhe mu tirako ni ku bindziwa, ndzi ta mu humuta. . . . Hakuva a pingu wa mina a wu gogonyi ni ndzhwalo wa mina wa vevuka.” (Mat. 11:28-30) A Mhaka ya Nungungulu — leyi yi patsako mune wa tiIvhangeli ti hlawutelako matimu ya ntiro wa Jesu — ya hi pepisa, yi hi nyika ntamu hi tlhelo ga moya, yi tlhela yi hi tlharihisa. (Lis. 19:7; 23:3) Jesu i te: Va “katekile lava va zwako a mhaka ya Nungungulu va yi hlayisa!” — Luka 11:28.

14-15. a) Hi kuya hi lezvi zvi tsalilweko ka Johani 12:27, 28, hi gihi khati ga wunharu legi Jehovha a nga wulawula hi le tilweni? b) Hikuyini a magezu ya Jehovha ma nga mu chavelela Jesu ma tlhela ma mu tiyisa?

¹⁴ Lera Johani 12:27, 28. Lomu ka Ivhangeli  ya Johani hi kuma khati ga wunharu legi Jehovha a nga wulawula hi le tilweni. Ka khati lego, Jesu i wa hi le Jerusalema ka Phasika gakwe go gumesa na ku kiyela masiku matsongwani kasi a dawa. I no wula lezvi: “Ndza karateka.” A khongela aku: “Papayi, dhumisa a vito ga wena.” A Papayi wakwe i no guma a wulawula hi le tilweni aku: “Ndzi gi dhumisile, ndzi ta tlhela ndzi gi dhumisa.”

¹⁵ Jesu i wa karateka hi ntiro wa hombe lowu a nga hi nawo wa ku simama a tsumbeka ka Jehovha. I wa zvi tiva ku i ta xanisiwa zva tanani mu ta wona, a biwa ku ku phum, a tlhela a dawa hi ndlela ya xapi. (Mat. 26:38) A ca hombe ka zvontlhe, Jesu i wa lava ku dhumisa vito ga Papayi wakwe. Phela Jesu i wa lumbetiwa ku wa rukatela. Maku i wa karateka hi ku alakanya lezvaku a kufa kakwe ku wa ta rukisa Jehovha. Handle ko kanakana, lezvi Jehovha a nga tiyisekisa Jesu zvi mu tiyisile nguvhu! Makunu i wa tiyiseka lezvaku a vito ga Jehovha gi wa ta dhumisiwa. A magezu ya Papayi wakwe ma mu chavelele ma tlhela ma mu tiyisa ka lezvi zvi nga hata. Ka vontlhe va nga hi kona laho, kuzvilava hi Jesu basi a nga zvizwa ku zvini a nga wula Papayi wakwe. Hambulezvo, Jehovha i mahile zvontlhe kasi a magezu yakwe ma tsaliwa kasi ku vhuna hina. — Joh. 12:29, 30.

16. Hikuyini hi nga tshukako hi karateka hi kurukiwa ka vito ga Jehovha?

¹⁶ A ku fana na Jesu, hinawu hi nga tshuka hi karateka hi kurukiwa ka vito ga Jehovha. Kuzvilava hinawu ha xanisiwa na hi nga hi na  nandzu. Kutani ha karateka hi mawunwa xungetano hi hina ma hangalaswako hi valala. Hi nga alakanyela lezvaku a vito ni hlengeletano ya Jehovha zva chakisiwa. Loku lezvo zvi hi karata, a magezu ya Jehovha ma hi chavelela nguvhu. A hi faneli ku karateka ku hundza mpimo hi zvona. A mhaka yo tiya hi ku “a kurula ka Nungungulu loku ku hundzako a kupima kontlhe, ku ta hlayisa a timbilu ta [hina] ni maalakanyo ya [hina] ha Kristu Jesu”. (Filp. 4:6, 7) Contlhe cikhati, Jehovha i ta dhumisa vito gakwe. I ta tirisa a Mufumo wakwe kasi ku basisa malandza yakwe yo tsumbeka ka zviruko zvontlhe lezvi ma chakiswako hi zvona hi Sathani ni tiko gakwe. — Lis. 94:22, 23; Isa. 65:17.

17. Hi kuya hi Isaya 30:21, Jehovha i wulawulisa kuyini na hina nyamutlha?

¹⁷ Ni nyamutlha Jehovha wa ha wulawula na hina. (Lera Isaya 30:21.) Lisine ku a hi gizwi gezu ga Nungungulu na a wulawula hi le tilweni. Hambulezvo, i hi nyikile Mhaka yakwe, a Bhibhiliya, leyi yi hi nyikako zvileletelo. Ahandle ka lezvo, a moya wa Jehovha wu kuca “nandza go tsumbeka” lezvaku gi tshama hi ku ma nyika zvakuga a malandza yakwe. (Luka 12:42) Ku na ni mabhuku yo tala ma gandlilweko, lomu ka michini, tivhidiyu, ni mahungu man’wani yo ingisela lawa ma nga hi vhunako ku tshama hi tiyile kukholweni.

18. A magezu ya Jehovha ma tiyisa kukholwa ka wena ma tlhela ma ku tiyisa hlana hi ndlela muni?

¹⁸ Hi nga tshuki hi rivala lezvi Jehovha a nga wula a cikhati leci a N’wana wakwe a nga hi laha misaveni! Hi xuva lezvaku a magezu ya Jehovha Nungungulu ma tsalilweko lomu ka Bhibhiliya ma hi tiyisekisa lezvaku a nga ta tsika nchumu ci wonheka, ni lezvaku i ta lulamisa ni cihi ca hava hi mahelweko hi Sathani ni tiko gakwe. Ahandle ka lezvo, a hi simameni ku demba khwatsi ndleve hi ingisa gezu ga Jehovha. Loku hi maha lezvo, hi ta zvi kota ku hlula zvikarato zvontlhe hi kumanako nazvo zvezvi ni lezvi zva ha tako, hambu zvi no tshamisa kuyini. A Bhibhiliya gi hi alakanyisa lezvi: “Zva laveka ku mu timisela, kasi loku mu mahile a kurandza ka Nungungulu, mu amukela lezvi zvi tsumbisilweko.” — Mah. 10:36.