A GEZU gi hundzuluselweko ku “kareta” ka lirimi lo sangula, lomu ka Wuhundzuluseli ga Misava Yiswa gi nga ha wula ni wihi nchumu hi wu tirisako kasi hi famba hi wona. (Miti. 8:28, 29, 38) Hambulezvo, zvi wonekisa ku khwatsi a muEtiopia i wa famba hi kareta ya hombe nguvhu a ku hundza kareta ya yitsongwani yi nga tirisiwa yimpini kutani ka mapalisana ya kutsutsuma. Wona zvigelo zvo kari zvi hi mahako hi wula lezvo.

A muEtiopia i wa hi hosana ya hombe yi ngaya ka matshamu ya le kule. I wa hi “hosana yi nga fumelwa hi Kandake, a hosi ya cisati ya vaEtiyopiya, loyi a nga wonelela a tshomba yontlhe ya Kandake.” (Miti. 8: 27) A Etiopia wa kale i wa patsa a Sudão wa masikwini ya hina ni cipandze ca le dzongeni wa Gibhite wa masiku ya hina. Hambu lezvi kuzvilava a wanuna loye a nga kala ku famba hi kareta yaleyi ya yin’we ka tipfhumba tontlhe a nga maha, kuzvilava i tekile zvilo zvo tala zvi nga wa ta laveka ka lipfhumba lakwe la hombe. A tikareta to kari ti nga tirisiwa ka zana ga malembe go sangula Nguveni ya Hina kasi ku pakela vanhu, ti wa hi ni mune wa marodha. Hi kuya hi tlhamuselo wo kari xungetano hi bhuku ga Mitiro, “ka tikareta leto zvi wa koteka ku teka zvilo zvo tala, ti wa maha ku a lipfhumba liva la linene niku kuzvilava ti wa maha ku a vanhu va maha lipfhumba lo leha”.

A muEtiopia i wo lera a cikhati leci Filipu a nga tshinela kakwe. A matimu ma tlhamusela ku ‘Filipu i no tsutsuma, a famba hi laha reveni ga kareta, [azwa thenwa] na yi lera a bhuku ga muphrofeti Isaya’. (Miti. 8:30) A tikareta a ti mahelwangi ku famba hi tona ka lipfhumba lo hatlisa. Hi kota ya lezvi a tikareta leto ti nga famba khwatsi zvi mahile ku a thenwa yi zvi kota ku lera na yi famba ni ku tlhela zvi koteka ku Filipu a yi kuma na a famba hi minenge.

A muEtiopia “i no kombela Filipu lezvaku a khilela a tshama naye.” (Miti. 8:31) Ka tikareta ta mapalisana ya kutsutsuma, a vatsutsumi va wa fambisa na va yimile. Hambulezvo, ka tikareta ta ku endza hi tona, ku wa tava ni wutshamu ga ku ringana ku a thenwa leyo na Filipu va tshama.

Hi kota ya lezvi Mitiro cipimo 8 a wulako ni zvilo zvin’wani a matimu ma kombako, a mabhuku ya hina ma kombisa mifota ya hosana ya muEtiopia na a famba hi kareta ya hombe wutshan’wini ga kareta ya yitsongwani yi tirisiwako yimpini kutani ka mapalisana ya kutsutsuma.