1. Zvini zvi tako maalakanyweni ya wena a cikhati u ehleketako hi Jehovha?

 U TSHUKILE u zama ku alakanyela lezvi Jehovha a nga zvona? Loku u wulawula naye hi mukhongelo, zvini zvi tako maalakanyweni ya wena? Hambu lezvi Jehovha a nga wonekiko, a Bhibhiliya gi mu tlhamusela hi tindlela to hambanahambana. Jehovha i vitaniwa kota ‘gambo ni citlhangu’ ni “ndzilo wu hisako.” (Lis. 84:11; Mah. 12:29) Ezekiyeli i tlhamusele Jehovha ka muwoniso wo kari a ku i fanana ni ribye ga safira, ni kungangamela ka suku ni kungangamela ka wura ga nyazimi. (Ezek. 1:26-28) A mitlhamuselo yo kari xungetano hi Jehovha yi nga hi hlamalisa nguvhu kutani ku hi chavisa.

2. Zvini zvi nga mahako ku a vokari zvi va karatela ku tshinela ka Jehovha?

² Kota lezvi hi kalako ku zvi kota ku mu wona Jehovha, zvi nga tshuka zvi hi karatela ku kholwa lezvaku wa hi randza. A vokari va alakanya lezvaku Jehovha a a nge tshuki a va randza hi kota ya lezvi va zvi hanyileko kale. Kuzvilava a va tshukangi va va ni papayi wa ku va randza. Jehovha wa ku zwisisa kutizwa loko ni lezvi ku hi khumbisako zvona. Kasi ku hi vhuna, i hi tivisa a matshamela yakwe yo saseka lomu ka Mhaka yakwe.

3. Hikuyini hi faneleko ku veka kupima ka lirandzo la Jehovha?

³ A gin’we ga magezu gi mu tlhamuselako khwatsi Jehovha lirandzo. (1 Joh. 4:8) Jehovha lirandzo. Lezvo zvi khumba zvontlhe a mahako. A lirandzo la Nungungulu la hana nguvhu niku li na ni ntamu, laha ka kuza a li kombisa ni ka lava va kalako ku mu randza. (Mat. 5:44, 45) Ka ndzima leyi, hi ta wona Jehovha hi laha kusuhani ni lirandzo lakwe. Laha hi yako hi gondza nguvhu xungetano hi Nungungulu wa hina, hi taya hi mu randza nguvhu.

 JEHOVHA WA HI RANDZA NGUVHU

4. U ti zwisa kuyini hi lirandzo la Jehovha? (Wona ni mufota.)

⁴ “Jehovha i na ni tipswalo ta hombe.” (Jak. 5:11) Lomu ka Bhibhiliya, Jehovha i ti fananisa ni mamani wa lirandzo. (Isa. 66:12, 13) Hi nga alakanyela a mamani loyi a khatalelako a cin’wanana cakwe hi ndlela ya lirandzo. I ci wungarela lomu cifuveni cakwe a wulawula naco hi gezu ga ginene ni ga lirandzo. Loku ci rila kutani kuzwa kubayisa i ci nyika lezvi ci zvi lavako. Loku hi karatekile, hi nga tiyiseka lezvaku Jehovha i ta hi kombisa lirandzo. A mutsali wa tisimu i tsalile lezvi: ‘Laha ndzi nga karateka mbilwini, wena u tangalisile a muhefemulo wa mina.’— Lis. 94:19.

5. Li wula yini ka wena a lirandzo li nga mbheliko la Jehovha?

⁵ Jehovha i tsumbekile. (Lis. 103:8) A nga hi tsukuli loku hi maha nchumu wa kubiha. A tiko ga Izrayeli gi wa tshama hi ku khunguvanyisa Jehovha, hambulezvo i kombisile lirandzo lakwe li nga mbheliko ka vanhu vakwe va nga ti sola hi magezu lawa: ‘Wena wa randzeka mahlweni ka mina, ni ku dzundzeka, kambe ndzi ku randzile’. (Isa. 43:4, 5) A lirandzo la Nungungulu a li cicangi. Contlhe cikhati hi nga li tsumba. Hambu loku hi mahile a zviwonho zva hombe, Jehovha a nga hi tsiki. Loku hi ti sola hi wuya ka Jehovha hi ta wona lezvaku a lirandzo lakwe hi hina a li cicangi. I tsumbisa ku hi “tsetselela hi matsenya.” (Isa. 55:7) A Bhibhiliya gi tlhamusela lezvaku a kutsetselela loko ku hi nyika ‘zvikhati zva kuhumutwa hi le ka’ Jehovha. — Miti. 3:19.

6. Zvini lezvi Zakaria 2:8 a hi gondzisako hi Jehovha?

⁶ Lera Zakaria 2:8. Kota lezvi Jehovha a hi randzako i hatlisa ku khumbeka hi kutizwa ka hina niku wa zvi lava nguvhu ku hi vhikela. Wa bayiseka loku hi bayisekile. Hikwalaho, hi nga tiyiseka lezvaku i ta hi hlamula loku hi khongela, hiku: ‘Ndzi hlayise ku khwatsi i ndzololo ya tihlo’. (Lis. 17:8) A tihlo gi na ni wukheta nguvhu niku ciro ca lisima laha ka miri. Makunu loku Jehovha a hi fananisa ni ndzololwani ya tihlo gakwe, zvi fana ni loku aku: ‘Ni wihi a mu mahelako zvilo zva hava n’wina vanhu va mina i maha zva hava ka nchumu wu nga wa lisima nguvhu ka mina.’

7. Hikuyini hi faneleko ku tiyisa a kutsumba ka hina ka lirandzo la Jehovha?

⁷ Jehovha i lava ku hi tiyiseka lezvaku i randza mun’we ni mun’wani wa hina. Kanilezvi wa zvi tiva ku hi kota ya lezvi hi nga zvi hanya hi nga  ha ti wutisa ku zva koteka ku a hi randza? Kutani kuzvilava zvezvi hi kari hi yimisana ni zviyimo zvi hi mahako hi kanakanela a lirandzo la Jehovha. Zvini zvi to tiyisa a kutsumba ka hina? Gondza lezvi Jehovha a kombisisako zvona a lirandzo lakwe ka Jesu, ka vatotilweko ni ka hina hontlheni.

LEZVI JEHOVHA A LI KOMBISISAKO ZVONA LIRANDZO LAKWE

8. Hikuyini Jesu a nga tiyiseka lezvaku a Papayi wakwe wa mu randza?

⁸ Hi malembe yo tala, Jehovha ni N’wana wakwe wo randzeka va kombisana lirandzo la hombe. A wunghana gabye ga kale nguvhu a ku hundza wuako gontlhe. Kota lezvi hi lerako ka Matewu 17:5, Jehovha i kombisile laha kubaseni a lirandzo lakwe hi Jesu. Jehovha loku i wa zvi lavile na a no wula ntsena ku: ‘Loyi hi yena ndzi xalalako hi yena.’ Hambulezvo, i wa lava ku hi tiva lezvi a mu randzisako zvona Jesu, hikwalaho, i mu vitanile ku, i “N’wana wa mina ndzi mu randzako”. Jehovha i wa hi ni matshandza hi lezvi Jesu a nga hi zvona ni lezvi a nga lava ku zvi maha. (Efe. 1:7) Niku Jesu i wa nga kanakani lezvaku a Papayi wakwe i wa mu randza. I wa tiyiseka lezvaku a lirandzo la Papayi wakwe li wa hi la lisine. I wulile hi makhati yo tala hi kutsumba lezvaku Papayi i wa mu randza. — Joh. 3:35; 10:17; 17:24.

9. Magezu muni ma tlhamuselako lirandzo la Jehovha hi vatotilweko? Tlhamusela. (Va Le Roma 5:5)

⁹ Jehovha i tlhela a kombisa lirandzo lakwe ka vatotilweko. (Lera Va Le Roma 5:5.) Wona magezu lawa ya ku, “li chululilwe”. A disionario go kari ga Bhibhiliya gi zvi tlhamuselisa lezvi, “ngone ka hina a ku khwatsi i congo”. A magezu ya mufananiso lowu, ma zvi kombisa khwatsi lezvi Jehovha a va randzisako zvona vatotilweko. A vatotilweko va zvi tiva ku ‘va randziwa hi Nungungulu’. (Jud. 1) Mupostoli Johani i tlhamusele lezvi va ti zwisako zvona laha a nga tsala ku: “Hi nga wonani lezvi Papayi a nga hi randzisa zvona laha ka kuza a hi maha hi vitaniwa ku hi vana va Nungungulu!” (1 Joh. 3:1) A ku a lirandzo la Jehovha lo gamela ka vatotilweko basi? Ahihi, Jehovha i kombisile lirandzo lakwe ka hontlheni.

10. Hi cini cikombiso ca hombe ka zvontlhe ca lirandzo la Jehovha?

¹⁰ Hi cihi cikombiso ca hombe ka zvontlhe ca lirandzo la Jehovha? I hakhelo ya kutlhatlhisa — a cikombiso ca hombe ca lirandzo wuakweni gontlhe! (Joh. 3:16; Rom. 5:8) Jehovha i nyikele N’wana wakwe wa lisima, a vhumela ku a fela vanhu vontlhe kasi a zviwonho zva hina zvi tsetselelwa zvi tlhela zvi koteka ku hiva vanghana Vakwe. (1 Joh. 4:10) Loku hi ehleketa nguvhu hi tsengo lowu Jehovha na Jesu va nga wu hakhela, hi ta zwisisa nguvhu lezvi va randzisako zvona mun’we ni mun’wani wa hina. (Gal. 2:20) A hakhelo ya kutlhatlhisa a yi hakhelwangi hi kota ya lezvi a kululama ka Jehovha ku nga lava lezvo. Kanilezvi cinyikiwo ca lirandzo. Jehovha i kombisile lirandzo lakwe hi hina hi ku nyikela loyi a nga wa lisima nguvhu kakwe — Jesu. Jehovha i vhumelile lezvaku a N’wana wakwe a xaniseka a tlhela afa kasi ku vhuneka hina.

11. Zvini hi gondzako ka Jeremia 31:3?

¹¹ Jehovha a ngo hi randza ntsena, kanilezvi i tlhela a hi byela lezvi a hi randzisako zvona. (Lera Jeremia 31:3.) Jehovha i hi kokile kakwe hi lezvi a hi randzako. (Fananisa na Deuteronome 7:7, 8.) A ku na munhu kutani nchumu wu nga hi hambanisako ni lirandzo lelo. (Rom. 8:38, 39) A lirandzo lelo li ku maha u ti zwisa kuyini? Lera Lisimu 23, u tlhela u wona lezvi a lirandzo la Jehovha ni kukhatala kakwe ka ku nene ku mu khumbisileko zvona Dhavhidha ni lezvi ku nga hi khumbisako zvona hontlheni.

A LIRANDZO LA JEHOVHA LI KU MAHA U TI ZWISA KUYINI?

12. U nga li songisa kuyini Lisimu 23?

¹² Lera Lisimu 23:1-6. Lisimu 23 hi lona li kombisako kutsumbeka ka lirandzo la Jehovha  ni kukhatala kakwe ka kunene. Dhavhidha, a mutsali wa lisimu leli, i tlhamusela a kutiya ka lirandzo li nga hi kona cikari kakwe ni ka Murisi wakwe, Jehovha. Dhavhidha i wa tizwa na a vhikelekile hi ku tsika Jehovha a mu rangela niku i wa khegela ka wurangeli Gakwe hi kumbhelela. Dhavhidha i wa zvi tiva lezvaku Jehovha i wa ta kombisa lirandzo lakwe hi yena ka masiku wontlhe wutomini gakwe. Zvini zvi nga mu tiyisekisa lezvo?

13. Hikuyini Dhavhidha a nga tsumba kukhatala ka Jehovha?

¹³ ‘Ndzi nga ta vhumala nchumu.’ Dhavhidha i wa tizwa na a khatalelwa khwatsi hakuva Jehovha contlhe cikhati i wa mu nyika zvontlhe a nga zvi lava. I wa tlhela a ti buza hi wunghana ni tipswalo ta Jehovha. Hi cigelo leco a nga tiyiseka lezvaku hambu ko mu humelela yini ka masiku ma nga hata, Jehovha i wa ta simama a khatala hi zvontlhe zvilaveko zvakwe. Kota lezvi Dhavhidha a nga tsumba lezvaku Jehovha wa mu randza, lezvo zvi mu vhunile ku a nga karateki, kanilezvi a xalala a tlhela a tsaka. — Lis. 16:11.

14. Jehovha a nga hi khatalelisa kuyini hi lirandzo?

¹⁴ Jehovha wa hi khatalela hi lirandzo, nguvhunguvhu loku hi humelelwa hi zvilo zva kubiha. Claire, a loyi a tirileko Bheteli hi 20 wa malembe ni ku hundza, i wa nga zvi tivi ku i ta wu vhunisa kuyini a ngango wakwe a cikhati wu nga humelelwe hi zvikarato zva hombe zvo landzelelana. A papayi wakwe i no biwa hi mababyi ya tromboze, a ndzisana yakwe ya wasati yi susiwa bandleni, a ngango wakwe wu luza ntiro ni muti wabye. Jehovha i ku kombisile kuyini kukhatala kakwe ka lirandzo hi vona? Claire, i wula lezvi: “Contlhe cikhati Jehovha i mahile ku a ngango wa mina wu kuma zvontlhe zvi nga laveka siku ni siku. Khati ni khati, lezvi Jehovha  a nga hi nyika zvi wa hundza ni cihi hi nga ci alakanyela! Hi zvikhati zvo tala ndzi ehleketa hi lezvi Jehovha a hi vhunisileko zvona niku ndzi nga ta tshuka ndzi rivala lirandzo lakwe. A kualakanya lezvo zva ndzi vhuna ku simama ndzi tirela Jehovha na ndzi tsakile hambu loku ndzi humelelwa hi zvikarato zvin’wani.”

15. Hikuyini Dhavhidha a nga tizwa na a tangalisilwe? (Wona ni mufota.)

¹⁵ ‘Wa [tangalisa] muhefemulo wa mina’. Ka zvikhati zvo kari, Dhavhidha i wa tizwa na a bayisekile hi kota ya zvikarato ni zviringo a nga kumana nazvo. (Lis. 18:4-6) Hambulezvo, a lirandzo ni kukhatala ka Jehovha zvi mu tangalisile. Jehovha i yisile munghana wakwe a kareleko “mikoveni yo nyuka” ni “matini ya malenga.” Hi kota ya lezvo, Dhavhidha i tiyisilwe niku i simamile a tirela Jehovha na a tsakile. — Lis. 18:28-32.

16. A lirandzo la Jehovha li ku tangalisisa kuyini?

¹⁶ Hi ndlela yo fana, nyamutlha ‘tipswalo ta Jehovha a ku hi nga se lova’ loku hi kumana ni zviringo ni zvikarato. (Miko. 3:22; Kol. 1:11) Wona cikombiso ca Rachel. I karatekile nguvhu a cikhati leci a nuna wakwe a nga tsika yena na Jehovha ndzeni ka ntungu wa COVID-19. Zvini lezvi Jehovha a nga mu mahela? I wula lezvi: “Jehovha i mahile ku ndzi tizwa na ndzi randziwa. I ndzi randzele hi vanghana va nga mbheta cikhati na mina, va ndzi nyika zvakuga, va ndzi rumelela timesaje ni mitsalo, va hleka na mina, ni ku simama va ndzi alakanyisa lezvaku Jehovha i wa kari a ndzi khatalela. Ndza mu bonga Jehovha hi kukhandzakanya hi ku ndzi nyika a ngango wa hombe ni wa lirandzo.”

17. Hikuyini Dhavhidha a nga kala ku ‘chava zva kubiha’?

¹⁷ ‘Ndzi nga ta chava zva kubiha, hakuva wena u zvin’we na mina.’ A zvikhati zvo tala a wutomi ga Dhavhidha gi wa hi mhangweni, niku i wa hi ni valala vo tala va ntamu. Hambulezvo a lirandzo la Jehovha li mu mahile a tizwa na a hlayisekile a tlhela a vhikeleka. Dhavhidha i wa zvi tiva ku Jehovha i wa hi zvin’we naye ka zviyimo zvontlhe, niku lezvo zvi wa mu tiyisa. Hikwalaho, i no yimbelela aku: ‘[Jehovha] i lo ndzi tlhatlhisa kuchaveni ka mina kontlhe.’ (Lis. 34:4) A kuchava ka Dhavhidha ku wa hi ka lisine, kanilezvi a lirandzo la Jehovha li wa hi ni ntamu a ku hundza kuchava kakwe.

18. A ku tiyiseka lezvaku Jehovha wa hi randza zvi nga ku tiyisisa kuyini loku u chava?

¹⁸ A ku tiyiseka lezvaku Jehovha wa hi randza zvi hi tiyisisa kuyini loku hi kumana ni zviyimo zvo chavisa? A phayona go kari ga ku hi Susi, gi tlhamusela lezvi yena ni nuna wakwe va nga ti  zwisa zvona a cikhati leci a n’wana wabye a nga ti daya, i te: “Loku ku maheka zvilo zvo kari zvo biha wutomi ga wena, zvi ku khumba nguvhu zvi tlhela zvi ku maha u chava ku ku ta humelela zvin’wani zva kubiha. Kanilezvi a lirandzo la Jehovha li hi mahile hi tizwa na hi hlayisekile hi tlhela hi vhikeleka.” Rachel loyi hi mu kumbukileko kusanguleni, i alakanya lezvi: “Ka wusiku go kari laha a mbilu ya mina yi nga bayisekile nguvhu ndzi tlhela ndzi karateka nguvhu ni ku chava, ndzi no khongela ka Jehovha. Ka cikhati leco, ndzi zwile ku i wa rulisile mbilu ya mina a tlhela a ndzi tangalisa, a ku khwatsi hi lezvi a mamani a mahako ka n’wana wakwe, niku hi kulandzela ndzi no etlela. Ndzi nga ta tshuka ndzi ci rivala a cikhati leco.” A dhota go kari ga ku hi Tasos, i vhalelwe paxweni hi muni wa malembe hi kota ya lezvi a nga ala kuya wusochweni. I li zwisile kuyini a lirandzo ni kukhatala ka Jehovha? I wula lezvi: “Jehovha i ndzi nyikile zvo hundza lezvi ndzi nga zvi lava. Lezvo zvi ndzi mahile ndzi tiyiseka lezvaku ndzi nga mu tsumba. Ahandle ka lezvo, hi ku tirisa moya wakwe, Jehovha i ndzi nyikile litsako hambu lezvi a paxo gi nga hi wutshamu go swira. Lezvo zvi ndzi vhunile ku wona lezvaku loku ndzi mu tsumba nguvhu Jehovha, ndzi taya ndzi zvi wona nguvhu ku wa ndzi randza. Hikwalaho, ndzi no sangula ku tira kota phayona ga cikhati contlhe na ndzi hi paxweni.”

TSHINELA KA NUNGUNGULU WA WENA WA MUNENE

19. a) A ku tiva lezvaku Nungungulu wa hi randza zvi nga khumbisa kuyini lezvi hi wulako ka mikhongelo ya hina? b) I tlhamuselo muni wa lirandzo la Jehovha wu ku khumbako? (Wona a kwadru “ Magezu ma hi vhunako kuzwa lirandzo la Jehovha lo kufumela.”)

¹⁹ A matshango lawa hi bhulileko hi wona wontlhe ma komba lezvaku Jehovha, “a Nungungulu wa lirandzo”, i zvin’we na hina! (2 Kor. 13:11) Wa khatala hi hina. Ha tiyiseka lezvaku i ‘ta [hi] mahela wuxinji [hi lirandzo Lakwe lo tsumbeka]’. (Lis. 32:10) Laha hi ehleketako nguvhu hi lezvi a hi kombisisako zvona lirandzo lakwe, i taya ava wa lisine nguvhu niku hi ta tizwa hi hi kusuhani kakwe. Hi nga khongela kakwe na hi tlhatlhekile hi tlhela hi mu byela lezvi hi li lavisako zvona lirandzo lakwe. Hi nga mu byela zvontlhe zvi hi karatako, na hi tiyiseka lezvaku wa hi zwisisa niku i zvi lava nguvhu ku hi vhuna. — Lis. 145:18, 19.

20. A lirandzo la Jehovha li hi kokisa kuyini hi tshinela kakwe?

²⁰ A ku fana ni lezvi hi kokiwako hi ku kufumela ka ndzilo ka siku ku nga ni cirami, a lirandzo lo kufumela la Jehovha la hi tshineta kakwe. A lirandzo la Jehovha li ni ntamu nguvhu niku linene. Hikwalaho, amukela lirandzo lo kufumela la Jehovha wutomini ga wena. Niku ngha hontlheni hi nyika hlamulo hi lirandzo lakwe, hi ku: ‘Ndza mu randza Jehovha’! — Lis. 116:1.