1. Hikuyini a siku ga Cialakanyiso gi nga ga lisima ka lembe? (Luka 22:19, 20)

 KA VANHU va Jehovha, a siku ga Cialakanyiso ca kufa ka Kristu ga lisima nguvhu laha ka lembe. Cimaho leci basi Jesu a byelileko valandzeli vakwe hi ku kongoma lezvaku va ci maha. (Lera Luka 22:19, 20.) Hi ni zvigelo zvo tala zvi hi mahako hi rindzela Cialakanyiso. A hi kambisiseni zvokari.

2. Zvigelo muni zvi mahako ku a Cialakanyiso civa ca lisima nguvhu ka hina?

² A Cialakanyiso ci hi vhuna ku ehleketa hi lisima la hakhelo ya kutlhatlhisa. Ci hi alakanyisa tindlela ta lezvi hi nga wu bongisako zvona a muphahlo wa Jesu. (2 Kor. 5:14, 15) Ci tlhela ci hi nyika lungelo ga ku “tiyisana” ni vamakabye va hina. (Rom. 1:12) Lembe ni lembe kuta vanhu vo tala va holileko hi tlhelo ga moya. A vokari vo kuceka ku tlhelela ka Jehovha hi kota ya lezvi va amukelwako hi lirandzo. Niku a vanhu vo tala va timbilu tinene va kuceka ku sangula ku gondza Bhibhiliya hi kota ya lezvi va zvi wonako seyo ni ku zvizwa. Zvontlhe lezvo zvi maha ku a Cialakanyiso civa ca lisima nguvhu ka hina!

3. A Cialakanyiso ci hi tlhanganisisa kuyini ni vamakabye misaveni yontlhe? (Wona ni mufota.)

³ Ehleketa kambe hi lezvi a Cialakanyiso ci hi tlhanganisisako zvona ni vamakabye misaveni yontlhe. A Vakustumunyu va Jehovha va tlhangana misaveni yontlhe andzhako ka ku pela ka gambo. Hontlheni hizwa kanelo yi khanyisako khwatsi a lisima la hakhelo ya kutlhatlhisa. Hi yimbelela tisimu timbiri ta ku dhumisa, ku hundzisiwa a pawa ni vhinyo, hi tlhela hi wula ku “amen” hi mbilu yontlhe ka yontlhe mikhongelo ya mune. Ndzeni ka 24 wa tihora, a mabandla wontlhe ma ta ngha ma mahile a zvilo lezvo zvontlhe. Hi nga alakanyela lezvi Jehovha na Jesu va to ti  zwisa zvona laha va to wona hontlheni misaveni yontlhe na hi tlhangene hi va dhumisa hi ndlela leyi!

4. Zvini hi to bhula hi zvona ka ndzima leyi?

⁴ Ka ndzima leyi hi ta bhula hi zviwutiso lezvi: Hi nga ti longiselisa kuyini a timbilu ta hina kasi hi ti buza hi Cialakanyiso? Hi nga va vhunisa kuyini van’wani kasi va vhuneka hi Cialakanyiso? Niku hi nga va vhunisa kuyini lava va holileko? A mihlamulo ya zviwutiso lezvi yi ta hi vhuna ku hi longa khwatsi kasi hi vhuneka hi cimaho leci ca lisima nguvhu.

HI NGA TI LONGISELISA KUYINI A TIMBILU TA HINA KASI HI TI BUZA HI CIALAKANYISO?

5. a) Hikuyini hi faneleko ku ehleketa hi lisima la hakhelo ya kutlhatlhisa? (Lisimu 49:7, 8) b) Zvini u nga gondza ka vhidhio Hikuyini Jesu a fileko?

⁵ A yin’we ya tindlela ta lisima leyi hi nga longiselako hi yona a timbilu ta hina kasi hi vhuneka hi Cialakanyiso ku ehleketa hi lisima la hakhelo ya kutlhatlhisa ya Jesu Kristu. A ci kona hi nga wa ta maha hina kasi hi ti tlhatlhisa ha hoce ka ciwonho ni kufa. (Lera Lisimu 49:7, 8; tlhela u sixtira vhidhio Hikuyini Jesu a fileko) a Jehovha i mahile malulamiselo ya lezvaku Jesu a nyikela wutomi gakwe kasi ku hi ponisa. Hi wumbiri gabye, Jehovha na Jesu va ti karatile nguvhu. (Rom. 6:23) Laha hi yako hi ehleketa nguvhu hi kutikarata loku Jehovha na Jesu va ku mahileko, hi taya hi yi bonga nguvhu a hakhelo ya kutlhatlhisa. A hi woneni a zvilo zvo kari, zvo karata, lezvi Jehovha na Jesu va nga ti yimisele ku hi mahela. Kanilezvi a ku sangula a hi woneni ku zvini zvi patsekako laha ka hakhelo ya kutlhatlhisa.

6. A hakhelo ya kutlhatlhisa yi patsa yini?

⁶ A hakhelo ya kutlhatlhisa i ntsengo lowu wu hakhelwako kasi ku tekisa nchumu wo kari. A wanuna wo sangula, Adhamu, i wa mbhelele a cikhati leci a nga vangiwa. A cikhati a nga wonha, i no luza a ku tsumba ka ku hanya kala kupindzuka, niku a vana vakwe vontlhe vonawu va luzile a kutsumba loko. Kasi ku riha lezvi Adhamu a nga zvi luza, Jesu i no nyikela a wutomi gakwe go mbhelela kota muphahlo. Ka malembe wontlhe lawa a hanyileko laha misaveni, Jesu “a nga wonhangi, hambu a kukanganyisa a ku kumiwangi non’wini wakwe”. (1 Ped. 2:22) A cikhati leci Jesu a ngafa, i wa mbhelele a kufana na Adhamu na a nga se wonha. Hikwalaho, hi ku nyikela a wutomi gakwe kota muphahlo, Jesu i wo hakhela a ntsengo wa wutomi legi Adhamu a gi luzileko. — 1 Kor. 15:45; 1 Tim. 2:6.

7. Hi zvihi zviringo zvo kari lezvi Jesu a kumeneko nazvo?

⁷ Jesu i simamile a ingisa Papayi wakwe wa le tilweni hambu ka zvikhati lezvi zvi nga karata ku maha lezvo. A cikhati a nga hi n’wanana, Jesu i wa ti koramisa ka wurangeli ga vapswali vakwe vo kala ku mbhelela hambu lezvi yena a nga mbhelele. (Luka 2:51) Laha a nga hi muswa, zvi lavile ku a lwisana ni kucetelo wa van’wani lava va nga lava ku kuzvilava a tsika ku ingisa vapswali vakwe kutani ku tsika ku tsumbeka ka Jehovha. Niku a cikhati a nga hi wa hombe, Jesu i alile Sathani Dhiyabho loyi a nga mu ringa kasi ku a wonha ni ku tlhela a mu byela hi ku kongoma lezvaku a tsika ku tsumbeka ka Nungungulu. (Mat. 4:1-11) Sathani i wa ti yimisele ku maha lezvaku Jesu a wonha kasi a nga zvi koti ku nyikela muphahlo wa hakhelo ya ku tlhatlhisa.

8. Zviringo muni lezvi Jesu a zvi timiseleko?

⁸ Ka ntiro wakwe wa laha misaveni, Jesu i timisele zviringo zvin’wani. A valala vakwe va wa mu vhukela niku va zamile ku mu daya. (Luka 4:28, 29; 13:31) Zvi lavile ku a timisela zvihoxo zva valandzeli vakwe. (Mar. 9:33, 34) A cikhati leci a nga lamuliwa, i xanisilwe ni ku tseketselwa. Hi kulandzela, i delwe hi ndlela yo bayisa nguvhu a ku khwatsi cigevenga. (Mah. 12:1-3) Zvi lavile ku a timisela cipandze co gumesa ca  ciringo cakwe na a hi yece, na a nga vhikelwi hi Jehovha. b — Mat. 27:46.

9. Hi ti zwisa kuyini hi hakhelo ya kutlhatlhisa? (1 Pedro 1:8)

⁹ Kasi hi kuma a hakhelo ya kutlhatlhisa, handle ko kanakana zvi lavile ku Jesu a xaniseka nguvhu. Laha hi ehleketako hi zvontlhe lezvi Jesu a ti yimiseleko ku hi mahela hi kuzvirandza, hi engetela ku mu randza nguvhu. — Lera 1 Pedro 1:8.

10. Zvini lezvi Jehovha a nga ti yimisele ku maha hi kota ya hakhelo ya kutlhatlhisa?

¹⁰ Zvini lezvi Jehovha a nga ti yimisele ku maha kasi Jesu a nyikela muphahlo wa hakhelo ya kutlhatlhisa? Jehovha na Jesu va wa hi ni wunghana ga hombe nguvhu, go fana ni legi a papayi ni n’wana va nga vako nago. (Mav. 8:30) Makunu, hi nga ehleketa hi lezvi Jehovha a nga ti zwisa zvona laha a nga wona Jesu na a timisela zviringo zvo tala a cikhati leci a nga hi laha misaveni. Handle ko kanakana zvi mu bayisile nguvhu Jehovha a ku wona n’wana wakwe na a xanisiwa, a minyiwa a tlhela a kumana ni zviringo.

11. Tirisa cikombiso co kari kasi ku komba lezvi Jehovha a ti zwisileko zvona a cikhati leci Jesu a nga dawa.

¹¹ Ni wihi mupswali loyi a felweko hi n’wana wa ku tiva khwatsi a kubayisa loku ku vangiwako hi ku luza loko. Hi na ni kukholwa ka hombe ka lezvaku a vafileko va ta vhuka, kanilezvi lezvo a zvi vhinyi a kubayisa loku hi ku zwako loku hi felwa hi munhu hi mu randzako. A cikombiso leco ci hi vhuna ku zwisisa lezvi Jehovha a ti zwisileko zvona a cikhati leci a nga wona N’wana wakwe wo randzeka na a xaniseka ni ku dawa hi 33 Nguveni ya Hina. c — Mat. 3:17.

12. Zvini hi nga mahako na ku kiyela kutsongwani kasi ku chikela Cialakanyiso?

¹² Kusukela zvezvi kala ka siku ga Cialakanyiso, zama ku gondza zvin’wani xungetano hi hakhelo ya kutlhatlhisa ka cigondzo ca wena wutsumbu kutani ka wukhozeli ga ngango. Tirisa Bhuku go kambisisa hi gona ga Vakustumunyu va Jehovha (loku gi hi kona hi lirimi la wena) kutani mabhuku man’wani kasi u tiva zvin’wani xungetano hi hakhelo ya kutlhatlhisa. d Ti karatele ku landzela a Programa ya ku lera Bhibhiliya hi nguva ya Cialakanyiso yi kumekako laha ka Cibhukwana ca Mutlhangano ca Ntiro ni Mahanyela. Niku ka siku ga Cialakanyiso u nga rivali ku sixtira a programa ya wukhozeli ga ni mixo go hlawuleka. Loku hi longisela timbilu ta hina kasi hi vhuneka hi Cialakanyiso, hi tava hi longile ku vhuna van’wani. — Ezra 7:10.

 VHUNA VAN’WANI

13. I nchumu muni wo sangula hi nga mahako kasi a van’wani va vhuneka hi Cialakanyiso?

¹³ Hi nga va vhunisa kuyini van’wani kasi va vhuneka hi Cialakanyiso? Kunene, a nchumu wo sangula ku va ramba. Wutshan’wini ga ku ramba lava hi va kumako ntirweni wa kuchumayela basi, hi nga maha lixta ya vanhu lava hi nga va rambako. A lixta leyo yi nga patsa maxaka ya hina, vatiri-kulori, zvigondzani-kulori ni van’wani. Hambu loku hi nga hi na zvirambo zvo tala zva ku gandliwa, hi nga va rumela link ya cirambo ca lomu ka muchini. Tivani hi mani, kuzvilava a votala va ta zvi tsakela! — Mutsh. 11:6.

14. Tlhamusela a ntamu lowu a cirambo ci nga nawo.

¹⁴ Loku u ramba wokari lezvaku ata Cialakanyisweni hi ku mu nyika cirambo co gandliwa kutani ca lomu ka muchini, kuzvilava a nga kuceka kuva kona futsi. Ka siku go kari, a makabye wo kari a nga hanya ka ngango wu nga hambene hi wukhongeli i no hlamala nguvhu laha a nuna wakwe a nga mu byela lezvaku i wa kari a maha makungo ya ku famba naye Cialakanyisweni. Hikuyini a nga hlamala? Hakuva i wata na a mu ramba hi malembe yo tala, kanilezvi a nga tshukangi a vhumela. Cini ci nga mu maha ku a vhumela ka khati legi? I wula lezvi: “Ndzi no nyikiwa cirambo hi dhota go kari ga lomu ndzi nga tshama kona”. A nuna wa makabye loye i noya Cialakanyisweni ka lembe lego a tlhela a simama ku famba ka malembe ma nga landzela.

15. Zvini lezvi hi nga faneliko ku zvi rivala laha hi rambako van’wani kasi vata Cialakanyisweni?

¹⁵ U nga rivali lezvaku lava hi va rambako va nga tshuka va va ni zviwutiso zvo kari — nguvhunguvhu loku ku hi ku a va se tshuka vata mitlhanganweni ya hina. Hikwalaho, hi nga ehleketa hi zviwutiso lezvi kuzvilava va to wutisa hi tlhela hi longisela mihlamulo ya kona. (Kol. 4:6) Kuzvilava a vokari va nga hi wutisa ku: ‘Zvini zvi to maheka ka cimaho leco?’ ‘Ci ta teka cikhati muni?’ ‘Ku na ni nayo wa mabohela?’ ‘Zvi lava ku hakhela kasi hi nghena?’ ‘Ku tava ni mihlengo?’ A cikhati hi rambako wokari, hi fanele ku mu wutisa ku: “U na ni ciwutiso co kari?” niku hi ku landzela hi hlamula ciwutiso cakwe. Hi nga tlhela hi mu komba vhidhio leyi  ya ku Alakanya kufa ka Jesu ni leyi ya ku Zini zi mahiwako lomu ka Salawu ya Mufumo? kasi ku vhuna a munhu loye a ku zwisisa lezvi a mitlhangano ya hina yi mahisiwako zvona. Niku lomu ka cigondzo 28 ca bhuku Ti buze hi wutomi kala kupindzuka! (hi ciPutukezi), ci na ni zvilo zvo tala zva zvinene hi nga bhulako hi zvona xungetano hi lezvi a mitlhangano ya hina yi mahisiwako zvona.

16. Zviwutiso muni lezvi lava va tota Cialakanyisweni kuzvilava va tova nazvo?

¹⁶ Andzhako ka ku wona Cialakanyiso, a vanhu vo tala va to tsakela kuzvilava va ngava ni zviwutiso zvo tala. Kuzvilava va nga wutisa ku hikuyini ne mun’we a nga kala kuga pawa ni kunwa vhinyo. Kutani hikuyini ku nga vanhu vatsongwani va ngaga pawa ni kunwa vhinyo. Kuzvilava va nga ha wutisa ku makhati mangani hi wonako a Cialakanyiso. Niku a van’wani va nga wutisa ku yontlhe a mitlhangano ya Vakustumunyu va Jehovha yi mahiwa hi ndlela yo fana ke. Hambu lezvi ka ku a kutala ka zviwutiso lezvo zva tlhamuselwa ka kanelo ya Cialakanyiso, lava va tako hi khati go sangula kuzvilava va nga lava mitlhamuselo yin’wani yo engeteleka. A ndzima yi nga lomu ka jw.org yi nge “A Ceia do Senhor – porque é que as Testemunhas de Jeová a celebram de modo diferente?” yi nga hi vhuna ku kuma mihlamulo ya zviwutiso zvabye. Hi lava ku maha zvontlhe hi zvi kotako — mahlweni, ndzeni ni ndzhako ka Cialakanyiso — kasi ku vhuna a vanhu lava ‘a timbilu tabye ti longileko’ a ku vhuneka hi lezvi va to zvi wona. — Miti. 13:48.

VHUNA LAVA VA HOLILEKO HI TLHELO GA MOYA

17. A madhota ma nga va vhunisa kuyini lava va holileko hi tlhelo ga moya? (Ezekiyeli 34:12, 16)

¹⁷ Ndzeni ka nguva ya Cialakanyiso, a madhota ma nga va vhunisa kuyini lava va holileko? Va nga va vhuna hi ku va khatalela. (Lera Ezekiyeli 34:12, 16.) Na gi nga se chikela a siku ga Cialakanyiso, zama ku bhula ni vanhu vo tala va holileko hi tlhelo ga moya hi laha zvi kotekako hi kona. Va tiyisekise lezvaku wa va randza nguvhu niku wa zvi lava nguvhu a ku va vhuna ni ka cihi ci nga ntan’wini wa wena. Va rambe ku vata Cialakanyisweni. Loku vata, va hoyozeli hi  matsenya. Andzhako ka Cialakanyiso, simama ku endzela vamakabye lavo u tlhela u va vhuna hi tlhelo ga moya kasi va tlhelela ka Jehovha. — 1 Ped. 2:25.

18. Hina hontlheni hi nga va vhunisa kuyini lava va holileko? (Va Le Roma 12:10)

¹⁸ Hontlheni lomu bandleni hi nga vhuna vamakabye va holileko lava va tako Cialakanyisweni. Hi nga zvi mahisa kuyini? Hi nga va vhuna hi ku va kombisa lirandzo, wunene ni cichavo. (Lera Va Le Roma 12:10.) U nga rivali lezvaku kuzvilava zva va karatela a vamakabye lavo vo randzeka a ku tlhela va sangula kuta mitlhanganweni. Kuzvilava va nga chava hi lezvi a van’wani lomu bandleni va nga va byelako kutani ku wula xungetano hi vona. e Hikwalaho, u nga va mahi zviwutiso zvi nga wa ta va wisa tingana kutani ku wula zvilo zvi to va swira. (1 Tes. 5:11) Phela lava va holileko va ha simama kuva vamakabye va hina. A zvo ku tsakisa a ku tlhela hi khozela navo! — Lis. 119:176; Miti. 20:35.

19. Hi vhunekisa kuyini hi ku alakanya kufa ka Jesu?

¹⁹ Ha mu bonga nguvhu Jesu hi lezvi a nga hi byela ku hi alakanya a kufa kakwe lembe ni lembe niku ha zvi zwisisa ku hikuyini lezvo zvi nga zva lisima. Loku hi maha lezvo, hi hina hi vhunekako hi tlhela hi vhuna van’wani hi tindlela to tala. (Isa. 48:17, 18) Hi engetela lirandzo la hina hi Jehovha na Jesu. Hi komba lezvi hi zvi bongisako zvona lezvi va hi maheleko. Hi tiyisa a wunghana ga hina ni vamakabye va hina. Niku hi nga vhuna van’wani a ku tiva lezvi va nga ti buzisako zvona hi makatekwa ma kotekako hi kota ya hakhelo ya kutlhatlhisa. Makunu, a hi maheni zvontlhe hi zvi kotako kasi hi ti longisela a Cialakanyiso ca lembe legi — a siku ga lisima ka wontlhe laha ka lembe!