Ka xaxamelo wa tindzima leti, hi gondzile zvilo zvi hi vhunako ku tiva hlamulo wa ciwutiso leci caku: Wa mu tiva Nungungulu ke? A ku sangula, a Bhibhiliya gi hi gondzisile lezvaku a vito gakwe hi Jehovha niku a tshamela gakwe ga tshinya lirandzo. Hi tivile ni lezvi a zvi mahileko ni lezvi a to zvi maha kasi zvi vhuna hina vanhu. Hambu lezvi ku nga ku ka ha hi ni zvotala hi faneleko ku gondza xungetano hi Nungungulu, kuzvilava wa ti wutisa ku zvi ta ku vhuna yini zvezvo.

Jehovha i tsumbisa lezvaku “loku wena u mu hlota, u ta mu kuma”. (1 Kronekele 28:9) Ehleketa hi nchumu wa lisima nguvhu u to wu kuma laha u hlotako Nungungulu u tlhela u mu tiva — u tava ni “wunghana go tiya” naye! (Lisimu 25:14, NM) Xana a wunghana lego gi nga ku vhunisa kuyini?

Litsako la lisine. A Bhibhiliya gi li Jehovha i “Nungungulu wo tsaka”. (1 Timote 1:11) Loku u maha munghana wakwe u tlhela u pimanyisa matshamela yakwe zvi ta ku nyika litsako la lisine, lezvi zvi to ku vhuna maalakanyweni ni nyameni. (Lisimu 33:12) U ngava ni wutomi go tsakisa kambe hi kuva ni matshamela ma nene, u hanyisana khwatsi ni van’wani, u tlhela u fambela kule ni mahanyela ya mhango. Wenawu u ta fana ni mutsali wa tisimu loyi a ngaku: ‘Zvi ndzi sasekele a ku tshama kusuhani ni Nungungulu.’ — Lisimu 73:28.

Nungungulu i ta ku khatalela a tlhela a ku hlayisa. Jehovha i tsumbisa malandza yakwe aku: ‘Ndzi ta ku gondzisa ndzi ku komba a ndlela leyi u to famba ha yona.’ (Lisimu 32:8) Lezvo zvi wula ku Jehovha i cuwuka malandza yakwe hi gin’we gin’we a tlhela a ma khatalela hi ku ya hi lezvi gin’we ni gin’wani gi zvi lavako. (Lisimu 139:1, 2) Loku makunu u tava ni wunghana go tiya na Jehovha, u ta wona lezvaku contlhe cikhati i tava na wena kasi ku ku vhuna.

U ta kuma wutomi ga gi nene cikhatini ci tako. Ahandle ka ku ku gondzisa ndlela ya ku kuma wutomi go tsakisa zvezvi, Jehovha Nungungulu i tlhela a ku nyika thomo ga ku u rindzela ku hanya wutomi ga gi nene cikhatini ci tako. (Isaya 48:17, 18) A Bhibhiliya gi li: “Kasi va kuma wutomi ga pindzukelwa va fanele ku ku tiva wena Nungungulu wece wa lisine, na Jesu Kristu loyi u mu rumileko.” (Johani 17:3) Ka masiku lawa ya zvikarato, lezvi Nungungulu a hi tsumbisako zvi nga fana ni fero yi hi tiyisako hi simama kuva ni “kutsumba ka lisine”. — Mahebheru 6:19.

Lezvi zvova zvigelo zvitsongwani basi zva ku u gondza u mu tiva khwatsi Nungungulu ni kuva ni wunghana go tiya naye. Kasi u kuma mahungu man’wani ma to ku vhuna nguvhu mhakeni leyi, u nga bhula ni Kustumunyu yo kari ya Jehovha kutani ku nghena ka saite jw.org/tsc.