Hi tolovelo, loku u lava ku tiva munhu, a nchumu wo sangula u mu wutisako ku: “Hi wena mani?” Loku u wo mu maha ciwutiso leci Nungungulu, i wa taku:

‘Ndzi Jehovha, hi gona vito ga mina lego.’ — Isaya 42:8.

Yena n’winyi wa gi nyika lisima vito gakwe. Nungungulu a nga chuliwangi hi munhu a vito gakwe; i ti chulile hi yece. Jehovha i te: ‘[Legi i] vito ga mina ga kala kupindzuka; i vito ga cialakanyiso ca mina zvizukulwaneni zvontlhe.’ (Eksodhusi 3:15) Lomu ka Bhibhiliya, a vito ga Nungungulu gi kumeka makhati yo tala a ku hundza zvikhundla zvakwe zvontlhe, zvo kota wa Ntamu Wontlhe, Papayi, Hosi, kutani Nungungulu; niku gi kumeka nguvhu a ku hundza mavito wontlhe ya vanhu va kumbukiwako lomu ka Bhibhiliya, vo kota Abrahama, Mosi, Dhavhidha, hambu Jesu. A mhaka yin’wani hi ku Jehovha i lava ku a vito gakwe gi tiviwa. A Bhibhiliya gi li: ‘Kasi va fela ku tiva lezvaku hi wena wece u nga ni vito ga Jehovha, loyi a Hundzeleleko Kutlakuka misaveni yontlhe.’ — Lisimu 83:18.

A vito ga Nungungulu ga lisima ka Jesu. Ka lezvi zvi vitaniwako ku Mukombelo wa Hosi, kutani Dhadhani wa Hina, Jesu i gondzisile a valandzeli vakwe a ku va kombela ka Nungungulu, vaku: “A vito ga wena a gi basisiwe.” (Matewu 6:9) Na yenawu Jesu i khongele ka Nungungulu, aku: “Papayi, dhumisa a vito ga wena.” (Johani 12:28) A nchumu wa lisima nguvhu wutomini ga Jesu ku wa hi ku dhumisa vito ga Nungungulu, niku hi zvezvo zvi nga maha ku a khongela, aku: “Ndzi va tivisile a vito ga wena, ndza ha ta gi tivekisa.” — Johani 17:26.

A vito ga Nungungulu ga lisima ka lava va mu khozelako. A vanhu va Nungungulu va hanyileko cikhatini ci nga hundza va wa zvi zwisisa ku a kuvhikelwa ni kuponisiwa kabye ku wa yelana ni vito ga Nungungulu go hlawuleka. A Bhibhiliya gi li: ‘A vito ga Jehovha i khokhola go tiya; loyi a lulamileko wa chavela ka gona a pona.’ (Mavingu 18:10) Gi tlhela giku: ‘Ni wihi a ta nga khongela vitweni ga Jehovha i ta hanyiswa.’ (Joyeli 2:32) A Bhibhiliya gi komba lezvaku lava va khozelako Nungungulu va wa ta tiviwa hi vito gakwe.  Gi li: ‘A matiko wontlhe, a gin’we ni gin’wani gi ta famba vitweni ga nungungulu wa gona, kanilezvi hina hi ta famba vitweni ga Jehovha a Nungungulu wa hina kala kupindzuka ni kupindzuka.’ — Mika 4:5; Mitiro 15:14.

A ku na mun’wani a vitaniwako hi vito legi. A titlhari to tala ti wula lezvaku a vito ga ku Jehovha gi wula ku: “I maha lezvaku zviva kona.” Ka magezu lawa Jehovha Nungungulu a nga byela Mosi i kombile lezvi a vito gakwe gi wulako zvona; i te: “Ndzi Tava Lezvi Ndzi to Hlawula Kuva Zvona.” (Eksodhusi 3:14, NM) A magezu lawa ma komba ku a vito ga Nungungulu gi wula zvo hundza ntiro wakwe kota Muvangi, loyi a vangileko zvilo zvontlhe. A vito gakwe gi komba wutlhari ni ntamu a nga nawo wa ku a ti maha ni cihi a ci lavako kutani ku maha ku a zvivangwa zvakwe zviva ni cihi a ci lavako kasi a tatisa kungo gakwe. A zvikhundla zva Nungungulu, zvo komba wuhosi gakwe, ntamu wakwe, kutani cikhundla cakwe basi. Kanilezvi a vito gakwe hi gona goce gi tlhamuselako zvontlhe lezvi a nga zvona ni lezvi a nga vako zvona.

A vito ga Nungungulu gi komba ku yena wa khatala hi hina. A tlhamuselo wa vito ga Nungungulu wu komba lezvi a zvi randzisako zvona zvivangwa zvakwe, a ku patsa na hina. Niku a kuva a tivekisile vito gakwe zvi komba ku i lava ku hi mu tiva. Ahandle ka lezvo, i rangile hi yena a hi byela vito gakwe ne na hi nga se zvi pimisa ku hi nga mu wutisa. Zvi laha kubaseni lezvaku Nungungulu i lava ku hi zvi wona khwatsi ku hakunene i kona niku zva koteka ku hi mu tshinelela hi maha wunghana naye, wutshan’wini ga ku mu wona kota nchumu laha wu yileko. — Lisimu 73:28.

Loku hi tirisa vito ga Nungungulu hi komba ku ha khatala hi yena. Kota cikombiso: A hi zvi veke laha ka ku ku ni wokari u lavako ku maha wunghana naye. U guma u mu byela lezvaku a ku vitana hi vito ga wena. U wa ta ti zwisa kuyini loku contlhe cikhati i wo ala ku ku vitana hi vito ga wena? Zva koteka ku hi kufamba ka cikhati u ti wutisa ku hakunene a munhu loye wa zvi lava kuva munghana wa wena ke. Hi zvalezvo kambe na Jehovha . Wa hi byela vito gakwe, niku i hi kuca ku hi gi tirisa. Loku hi maha lezvo, hi mu komba lezvaku hi lava kuva vanghana vakwe. Phela Jehovha wa va wona “lava va alakanyako vito gakwe”! — Malaki 3:16.

A ku tiva vito ga Nungungulu i nchumu wa lisima ni wo ranga loku hi lava ku mu tiva khwatsi. Kanilezvi a hi faneli ku nyima laho. Hi fanele ku mu tiva khwatsi a n’winyi wa vito legi. Hi fanele ku tiva matshamela yakwe kambe.