Loku u lava ku mu tiva khwatsi munhu, leci ci to ku vhuna, ku tiva lezvi a zvi mahileko ni zvikarato a zvi hlulileko. Hi kufanana, loku u lava ku mu tiva khwatsi Nungungulu, u fanele ku tiva lezvi a zvi mahileko. Laha u to maha lezvo, kuzvilava u ta hlamala nguvhu hi ku pola lezvaku a kutala ka lezvi a nga zvi maha cikhatini ci nga hundza zvi vhuna hina niku zvi vhulula ndlela ya ku hi kuma zva zvi nene cikhatini ci tako.

Jehovha Nungungulu hi yena Muvangi wa Hombe nguvhu loyi a nga vanga zvilo zvontlhe, ni “matshamela yakwe ma nga wonekiko, . . . ma woneka maku dlunya kusukela kuvangiweni ka tiko, hakuva ma kombisiwa hi zvilo lezvi a zvi mahileko.” (Va Le Roma 1:20) Hi ‘yena a vangileko misava hi ntamu wakwe. A seketela tiko hi wutivi gakwe, hi kupima kakwe a tshambuluta tilo.’ (Jeremiya 10:12) Lezvi a zvivangwa zvakwe zvi nga sasekisa zvona zvi komba ku wa khatala hi hina.

Ehleketa hi lezvi Jehovha a nga mahisa zvona ku a wutomi ga hina gi nandziha hi ku hi vanga hi “mufananiso wakwe”. (Genesisi 1:27) Lezvo zvi wula ku i hi vangile hi ndlela ya ku hi zvi kota ku ma pimanyisa kutsongwani a matshamela yakwe ma kombisiwako hi yena yece. I hi vangile hi ndlela ya ku hi zvi kota ku zwisisa mawonela yakwe ni milayo yakwe. Laha hi ti karatelako ku hanya hi zvona, hi hanyela co ci tiva hi tlhela hi kuma litsako. A ca hombe ku hundza lezvo, i hi vangile hi ndlela ya ku zvi koteka ku hiva ni wunghana naye.

Loku hi wona lezvi Nungungulu a zvi vangileko laha misaveni, ha zvi wona lezvi a ti zwisako zvona hi hina. Ka magezu ya mupostoli Pawule, Nungungulu i kombile lezvaku “a nga ti fihlangi ku hi yena mani, hakuva i no [hi] mahela zva zvi nene hi ku [hi] nisela tivhula hi le tilweni ni ku [hi] nyika tinguva ta mihandzu, ni zvakuga zvo tala, a tata timbilu ta [hina] hi kutsaka”. (Mitiro 14:17) Nungungulu i hi nyikile zvo hundza lezvi zvi lavekako kasi hi hanya. I hi nyikile zvilo zvo tala ni zva zvi nene nguvhu kasi hizwa ku nandziha ka wutomi. Phela lezvo i no hi dambuletisa basi. Ka ha hi ni zvo tala nguvhu lezvi a lavako ku hi mahela.

Jehovha i vangile misava kasi a vanhu va hanya ka yona kala kupindzuka. A Bhibhiliya gi li: “A misava i yi nyikile ka vanana va vanhu”, gi tlhela gi ku ‘a nga yi  mahelangi a kuva ciwula, kanilezvi i yi mahele kuva wutshamu go aka kona’. (Lisimu 115:16; Isaya 45:18) I yi mahele ku ku hanya vanhu va matshamela muni kona hi cikhati muni? A Bhibhiliya gi li: ‘A valulamileko va taga tshomba ya tiko, va aka ka gona kala kupindzuka.’ — Lisimu 37:29.

Kasi lezvo zvi koteka, Jehovha i vangile Adhamu na Evha, a vanhu vo sangula, a va veka paradhiseni kwalaha misaveni “kasi ku gi rima ni ku gi gongola” kutani ku gi hlayisa. (Genesisi 2:8, 15) Nungungulu i no va nyika mitiro leyi ya yimbiri yo tsakisa nguvhu, aku: ‘Pswalani, mu andza, mu tata misava, mu yi fumela.’ (Genesisi 1:28) Maku lezvo zvi komba ku Adhamu na Evha va wa ta hanya wutomi go nandziha nguvhu kala kupindzuka kwalaha misaveni. Kanilezvi, va tsikile ku ingisa Nungungulu. Hi kota ya lezvo va luzile thomo ga kuva cikari ka “valulamileko” lava ‘va toga tshomba ya tiko’, a wusiwana ga kona, kambe ne! Kota lezvi hi to zvi wona, lezvi va nga zvi maha a zvi cicangi kungo ga Nungungulu hi hina ni misava. Hambulezvo a hi rangeni hi ku wulawula hi zvin’wani lezvi Nungungulu a zvi mahileko.

A Bhibhiliya gi vitaniwa ku i Mhaka ya Nungungulu. Hikuyini Nungungulu a nga hi nyika Bhibhiliya? A ca hombe i wa fela ku hi mu tiva. (Mavingu 2:1-5) Lisine ku a Bhibhiliya a gi hlamuli zviwutiso zvontlhe hi nga nazvo xungetano hi Nungungulu, niku a ku na bhuku gi hlamulako. (Mutshawuteli 3:11) Hambulezvo zvontlhe lezvi zvi nga lomu ka Bhibhiliya zva hi vhuna ku mu tiva. Hi tiva matshamela yakwe hi ku wona lezvi a nga tirisanisa zvona ni vanhu. Hi tlhela hi tiva ku vanhu va matshamela muni a va tsakelako ni lava a kalako a nga va tsakeli. (Lisimu 15:1-5) Hi tiva a mahanyela ni makhozelela lawa ma mu tsakisako. Hi tlhela hi tiva mawonela yakwe hi titshomba. A Bhibhiliya kambe gi hi komba khwatsi a matshamela ya Jehovha ka lezvi a N’wana wakwe, Jesu Kristu, a nga gondzisa ni lezvi a nga maha. — Johani 14:9.

A cin’wani ci nga maha ku Jehovha a hi nyika Mhaka yakwe, a Bhibhiliya, i wa lava ku hi tiva ndlela ya ku hanyela co ci tiva na hi tsakile kambe. Lomu ka Bhibhiliya, Jehovha i hi komba ndlela ya kuva ni wutomi ga ngango go tsakisa, ya ku xalala hi lezvi hi nga nazvo ni ya ku lwisana ni zvikarato. Kota lezvi hi nga zvi wona kusanguleni ka revhista legi kambe, a Bhibhiliya gi na ni mihlamulo ya zviwutiso zva lisima nguvhu wutomini, zvo kota lezvi: Hikuyini hi xanisekako zva tanani mu ta wona? Wutomi muni hi to gi hanya cikhatini ci tako? Gi tlhela gi tlhamusela ku zvini lezvi Nungungulu a nga zvi maha kasi lezvi a nga zvi lava kusanguleni zvi maheka.

Ku ni zvin’wani zvo tala zvi kombako ku a Bhibhiliya i bhuku gi tako hi ka Nungungulu go hambana ni mabhuku wontlhe. Hambu lezvi gi tsalilweko ndzeni ka 1600 wa malembe hi cipimo ca 40 wa vavanuna, gi wulawula hi mhaka-tshinya yin’we. Lezvo zvi komba ku a mahungu ya gona mata hi ka Nungungulu. (2 Timote 3:16) Loku va kambisisa mabhuku ya kale yo tsaliwa hi mandla, ku woneka lezvaku a mahungu ya Bhibhiliya a ma ciciwangi kala nyamutlha; lezvo zva kala ka mabhuku man’wani ya kale. A cin’wani kambe va zamile ku gi vhalela kasi a vanhu va nga gi kumi, va nga hundzuluseli, ne va nga leri. Kanilezvi, a va zvi kotangi. A Bhibhiliya hi gona bhuku gi teleko nguvhu nyamutlha gi tlhela gi hundzuluselwa hi tirimi to tala. Lezvi a Bhibhiliya gi ponileko kala masikwini ya hina, cikombiso ca lezvaku ‘a mhaka ya Nungungulu wa hina yi ta simama kala kupindzuka’. — Isaya 40:8.

A cin’wani leci Nungungulu a ci mahileko ku maha malulamiselo ya ku a kungo gakwe hi hina gi tatiseka. Kota lezvi zvi wulilweko kusanguleni, Nungungulu i wa lava ku a vanhu va hanya kala kupindzuka kwalaha misaveni. Hambulezvo, a cikhati leci Adhamu a nga wonha hi ku tsika ku ingisa Nungungulu, yena ni vana vakwe lava a nga wa ta pswala va no luza thomo ga ku hanya kala kupindzuka. A Bhibhiliya gi li: “A ku khwatsi hi lezvi a ciwonho ci nga nghena tikweni hi kota ya munhu mun’we, ni kufa ku tile hi kota ya ciwonho; hikwalaho a kufa ku no thapela vanhu vontlhe, hakuva vontlhe va wonhile.” (Va Le Roma 5:12) Lezvi Adhamu a nga zvi maha zvi vekile kungo ga Jehovha khombyeni. Maku, Jehovha i mahile yini?

Lezvi Jehovha a nga maha zvi yelana khwatsi ni matshamela yakwe. I mu nyikile nandzu Adhamu na Evha hi lezvi va nga zvi maha, niku lezvi a nga zvi maha zvi lulamile. Kanilezvi i no maha malulamiselo kasi a vhuna vana lava va nga wa ta pswala. A wutlhari gakwe gi mu vhunile ku tiva lezvi a nga wa ta mahisa zvona kasi  ku lulamisa cikarato leco, a tekela ku wula lezvi a nga wa ta maha. (Genesisi 3:15) A vanhu va wa ta tlhatlhisiwa ka ciwonho ni kufa hi ku tirisa Jesu Kristu, a N’wana wa Nungungulu. Lezvo zvi wa patsa yini?

Kasi Jehovha a tlhatlhisa vanhu ka ciwonho ca Adhamu i rumele Jesu laha misaveni ata gondzisa vanhu a ndlela ya ku kuma wutomi ni “ku nyikela wutomi gakwe kota hakhelo ya ku tlhatlhisa votala”. a (Matewu 20:28; Johani 14:6) Zvi kotekile a ku Jesu a nyikela hakhelo ya ku tlhatlhisa hakuva i wa hi munhu wo mbhelela a ku fana na Adhamu. Lisine ku Adhamu i tsikile ku ingisa; hambulezvo Jesu i ingisile Nungungulu hi ku mbhelela laha ka kuza afa. Kota lezvi Jesu a ngafa na a nga hi na nandzu, Jehovha i no mu vhuxa a tlhela a ya hanya le tilweni. Maku zvi wa koteka ku Jesu a maha lezvi Adhamu a nga zvi tsandzeka, ku nga ku va nyika wutomi ga pindzukelwa a vanhu vo ingisa. A Bhibhiliya gi hi byela lezvi: “A ku khwatsi hi lezvi a kungaingisi ka munhu mun’we ku nga maha votala vava vawonhi, a kuingisa ka munhu mun’we konawu ku ta maha votala va wuliwa vo lulama.” (Va Le Roma 5:19) Nungungulu i ta tirisa hakhelo ya ku tlhatlhisa ya Jesu kasi a maha lezvi a nga tsumbisa zvaku a vanhu va hanya kala kupindzuka kwalaha misaveni.

Lezvi Jehovha a nga zvi lulamisisa zvona zvikarato lezvi zvi vangilweko hi ku nga ingisi ka Adhamu zvi hi gondzisa zvotala hi yena. Hi gondza lezvaku a ku na nchumu ci nga mu tsandzekisako a ku maha lezvi a nga zvi sangula. Handle ko kanakana, a mhaka yakwe yi ta maheka. (Isaya 55:11) Hi tlhela hi wona lezvi Jehovha a hi randzisako zvona. A Bhibhiliya gi li: “Nungungulu i kombile ku wa hi randza hi ku rumela a N’wana wakwe a belekilweko yece ata tikweni kasi hi kuma wutomi hi kota ya yena. A lirandzo hi leli: A hi lezvaku hi hina hi nga randza Nungungulu kanilezvi hi yena a nga hi randza, a rumela a N’wana wakwe kota muphahlo kasi hi tlhela hi zwanana na Nungungulu.” — 1 Johani 4:9, 10.

“Kota lezvi Nungungulu a nga kala ku ala [ku hi nyika] N’wana wakwe” a hi kanakani lezvaku i “ta hi nyika zvilo zvontlhe” a tsumbisileko. (Va Le Roma 8:32) Zvini lezvi Nungungulu a nga tsumbisa ku i ta hi mahela? Simama ku lera revhista legi u ta zvi tiva.