HI NGA WONA KUTSAKISA KA ZVONA! A Muvangi wa hina i tsumbisa ku hi nyika wutomi ga pindzukelwa kwalaha misaveni. Hambulezvo, a kutala ka vanhu zva va karatela a ku zvi kholwa. Ve ngalo: ‘A ku hanya ni kufa zvi maha cipandze ca wutomi. Ni wihi loku siku gi chikela i tafa.’ A van’wani va li zva koteka ku hanya kala kupindzuka, kanilezvi a hi laha misaveni. Va wula lezvaku a ku hanya kala kupindzuka zvi koteka ntsena loku ufa u guma uya tilweni. U zvi wonisa kuyini?

Na u nga se hlamula ciwutiso leci, ranga hi ku kambisisa mihlamulo ya Bhibhiliya ya zviwutiso lezvi zva zvinharu: A ndlela leyi a munhu a nga mahiwa hi yona yi komba ku i wa ta hanya malembe mangani? Gi wa hi gihi kungo go sangula ga Nungungulu xungetano hi vanhu ni misava? A kufa ku tisile kuyini ka vanhu?

Ka zvontlhe zvilo zvo hanya lezvi Nungungulu a zvi vangileko laha misaveni, a munhu i vangilwe hi ndlela yo hlawuleka nguvhu. Hikuyini hi wulako lezvo? A Bhibhiliya gi wula lezvaku a munhu hi yena yece a vangilweko hi “mufananiso” wa Nungungulu. (Genesisi 1:26, 27) Lezvo zvi wula yini? Zvi wula ku a munhu i vangilwe na a hi ni matshamela yo fana ni lawa ya Nungungulu, yo kota lirandzo ni ku tiva zva kululama.

A cin’wani hi ku a munhu wa zvi kota ku pimisa, ku ehleketa, ku tiva zva zvi nene ni zvo biha, niku i na ni kuxuva ka ku lava kuva ni kuzwanana na Nungungulu. Lezvo hi zvona zvi hi mahako hi wona kusaseka ni kukula ka zvontlhe lezvi Nungungulu a zvi vangileko, hi tlhela hi tsakela wucenje ni zvin’wani. A ca lisima ka zvontlhe hi ku a munhu wa zvi kota ku khozela Muvangi. A matshamela lawo ma maha munhu ava wo hambana nguvhu ni zvontlhe lezvi zvi hanyako laha misaveni.

Hikwalaho, ehleketa hi mhaka leyi: Loku ku wa hi ku Nungungulu i wa lava lezvaku a vanhu va hanya cikhatanyana basi, xana i wa ta va nyika matshamela lawo yo hlamalisa ni wuzvikoti ga ku ma chukwatisa? A lisine hi ku Nungungulu i nyikile vanhu a matshamela lawo yo hlawuleka kasi va hanya kala kupindzuka kwalaha misaveni.

Kanilezvi, a vokari va li Nungungulu i wa nga lavi ku hi hanya kala kupindzuka laha misaveni. Va wula lezvaku a misava yi mahelwe ku hi hanya ka yona cikhatanyana basi kasi ku hloliwa lava va ringanelwako hi ku ya hanya le tilweni na Nungungulu kala kupindzuka. Loku lezvo zvi wa hi lisine, xana Nungungulu  i wa nga tava ni nandzu hi kota ya zvontlhe zvo biha zvi tatileko tiko inyamutlha? Lezvo zvi wa ta hambana ni lezvi yena a nga tshamisa zvona. Xungetano hi Nungungulu, a Bhibhiliya gi li: “A mitiro yakwe yi mbhelele; hakuva tontlhe tindlela takwe ti lulamile; i Nungungulu wa kutsumbeka, loyi a nga hiko na kukanganyisa; i na ni wunene, i lulamile.” — Dhewuteronome 32:4.

A Bhibhiliya gi veka kubaseni a kungo ga Nungungulu xungetano hi misava hi ku wula magezu lawa: ‘A matilo nja Jehovha, kanilezvi a misava i yi nyikile ka vanana va vanhu.’ (Lisimu 115:16) Kunene, Nungungulu i vangile misava kasi yiva wutshamu go saseka ga ku tshama vanhu. I chelile zvontlhe zvi lavekako kasi hi ti buza kala kupindzuka. — Genesisi 2:8, 9.

‘A matilo nja Jehovha, kanilezvi a misava i yi nyikile ka vanana va vanhu.’ — Lisimu 115:16

A Bhibhiliya kambe gi tekela kuba hloko loku gi wulawula hi kungo ga Nungungulu xungetano hi vanhu. I byelile Adhamu na Evha lezvaku va pswala va ‘tata misava, va fumela . . . zvontlhe zvi hanyako, zvi fambako misaveni.’ (Genesisi 1:28) Hi nga wona thomo va nga hi nago ga ku wonelela ni ku engetela mimbhingano ya Paradhise misaveni! Lezvo zvi komba ku Adhamu na Evha, ni vana vabye, va wa ta hanya kala kupindzuka kwalaha misaveni, na ku nga hi le tilweni.

Makunu, hikuyini hi fako? A Bhibhiliya gi komba lezvaku a mun’we wa vana va Nungungulu va moya, loyi hi ndzhako ka cikhati a nga tiveka kota Sathani, i zamile ku wonhetela lulamiselo ga Nungungulu le Edheni. I zvi mahisile kuyini lezvo?

Sathani i no kucetela vapswali va hina vo sangula, Adhamu na Evha, lezvaku va ti patsa naye va vhukela Nungungulu. A cikhati Sathani a ngaku Nungungulu wa va tsona zvilo zva zvi nene — ku nga fanelo ya ku boha ha voce lezvi zvi nga zvi nene ni zvo biha — va hlawulile ku ti patsa na Sathani va fularela Nungungulu. Zvini va nga zvi tshovela hi ku maha lezvo? Hi kufamba ka cikhati va file, kota lezvi Nungungulu a nga wulile. Va no luza thomo ga ku hanya kala kupindzuka Paradhiseni laha misaveni. — Genesisi 2:17; 3:1-6; 5:5.

A kungaingisi ka Adhamu na Evha ku khumbile vanhu vontlhe, a ku patsa na hina nyamutlha. A Mhaka ya Nungungulu yi li: ‘Khwatsi hi lezvi a kuwonha ku nga enghena misaveni hi kota ya munhu mun’we, ni kufa ku tile hi kota ya kuwonha; hizvalezvo a kufa ku no thapela vanhu vontlhe.’ (Va Le Roma 5:12) Nyamutlha hafa hakuva a vapswali va hina vo sangula va hi thapelisile ciwonho ni kufa, na ku nga hi ku zvi no vekisiwa zvezvo hi Nungungulu.

A kungaingisi ka Adhamu na Evha le Edheni a ku cicangi kungo go sangula ga Nungungulu xungetano hi vanhu ni misava. A lirandzo lo mbhelela la Nungungulu ni kululama kakwe zvi mu kucile ku vhula ndlela ya ku hi tlhatlhisa ka ciwonho ni kufa. Mupostoli Pawule i tlhamusela lezvi: ‘A hakhelo ya kuwonha hi kufa, kanilezvi a cinyikiwo ca Nungungulu hi wutomi ga pindzukelwa ha Jesu Kristu a Hosi ya hina.’ (Va Le Roma 6:23) Hi ku hi randza Nungungulu i ‘nyikele a N’wana wakwe a belekilweko yece, kasi ni wihi loyi a kholwako kakwe a nga lovi, kanilezvi ave ni wutomi ga pindzukelwa’. (Johani 3:16) Jesu i tlhatlhisile vanhu vontlhe va nga lahlekile hi kota ya Adhamu hi ku ti nyikela hi kuzvirandza kota ndzhiho. *

Ku nga hi kale, a citsumbiso ca Nungungulu ca ku neha paradhise laha misaveni ci ta tatiseka. U ta ti buza hi wumandziko lego go tsakisa loku u ingisa citlharihiso leci ca Jesu: ‘Enghenani hi nyangwa yo hlongana; hakuva a nyangwa yi yako kulobyisweni yi anamile, ni ndlela yi komamako kona yi kulile; mbanyingi va fambako ha yona. Kanilezvi a nyangwa ya wutomi yi hlonganile, ni ndlela yi yako kona yi khumile, mbatsongwani lava va yi kumako.’ (Matewu 7:13, 14) A ku ti buza hi wumandziko go tsakisa zvi khegela ka lezvi wena u to zvi hlawula. U ta hlawula yini?