ZVA KOTEKA KU TI HLAWULELA A WUMANDZIKO U GI LAVAKO KE? A vanhu vo kari va kholwa lezvaku Nungungulu i sina a gemile lezvi a wutomi gabye gi to tshamisa zvona; a va na ku hlawula. Loku va tsandzeka ku tatisa makungo yo kari, va li a ku na ndlela yaku va zvi kota hakuva “Nungungulu i sina a zvi vekisile zvezvo!”

A van’wani va mbhela ntamu hi ku nga zvi tivi ku va ta hanyisa kuyini tikweni legi go tala hi zvikarato ni wubihi. Zvi nga maha va zamile ku chukwatisa wutomi gakwe, kanilezvi a tiyimpi, ni wugevenga, ni timhango ta ntumbuluko, ni mababyi zvi daya makungo yabye. Zvi chikela laha kaku va ti wutisa ku: ‘Kasi ndzi ti xanisela yini?’

Lisine ku a zviyimo zvo kari zva kuhanya zvi nga khumba makungo ya wena. (Mutshawuteli 9:11) Kanilezvi, loku zvita mhakeni ya wumandziko ga wena, hi wena u faneleko ku hlawula. A Bhibhiliya gi komba lezvaku a wumandziko ga wena gi khegela ka lezvi u hlawulako. Wona lezvi gi wulako.

Mosi, a murangeli wa tiko ga Izrayeli wa kale, i byelile vanhu lava va nga hi kusuhani ni ku nghena Tikweni ga Citsumbiso, aku: ‘Ndzi vekile mahlweni ka n’wina a wutomi ni kufa, a zvikatekiso ni makhombo. Hikwalaho hlawula wutomi kasi wa fela ku hanya, wena ni pswalo wa wena; u randza Jehovha Nungungulu wa wena, u ingisa a gezu gakwe, u namarela ka yena.’ — Dhewuteronome 30:15, 19, 20.

‘Ndzi vekile mahlweni ka n’wina a wutomi ni kufa, a zvikatekiso ni makhombo. Hikwalaho hlawula wutomi.’ — Dhewuteronome 30:19

Kunene, Jehovha i tlhatlhisile vaIzrayeli wukhumbini le Gibhite a tlhela a va nyika kutsumba ka ku hanya na va tsakile Tikweni ga Citsumbiso. Kanilezvi zvi wa nga ta maheka halahala. Kasi va kuma makatekwa lawo, va wa fanele ku “hlawula wutomi”. Hi ndlela muni? Hi ‘ku randza Nungungulu, ni ku ingisa gezu gakwe, ni ku namarela ka yena’.

Nyamutlha wenawu u fanele ku hlawula. Lezvi u to hlawula hi zvona zvi to wula lezvi a wumandziko ga wena gi to tshamisa zvona. Loku u hlawula ku randza Nungungulu, ni ku ingisa gezu gakwe u tlhela u namarela ka yena, wo hlawula wutomi — a wutomi ga pindzukelwa paradhiseni kwalaha misaveni. Kanilezvi zvi wula yini a ku randza Nungungulu, ni ku ingisa gezu gakwe, ni ku namarela ka yena?

A lirandzo i tshamela go sangula ga Nungungulu. Mupostoli Johani i tsalile lezvi: “Nungungulu lirandzo.” (1 Johani 4:8) Hi cigelo leco, a cikhati leci Jesu a nga wutisiwa ku hi wihi a nayo wa hombe ka yontlhe, i te: ‘Randza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe.’ (Matewu 22:37) A kuzwanana ka lisine na Jehovha Nungungulu ku seketelwa hi lirandzo, na ku nga hi ku ingisa hi ku mu chava. Kanilezvi hikuyini hi faneleko ku hlawula ku randza Nungungulu?

Lezvi Jehovha a va randzisako zvona vanhu zvi fana ni lezvi a vapswali va randzisako zvona vana vabye. Hambu lezvi va nga mbhelelangiko, a vapswali va nga ni lirandzo va gondzisa vana vabye, va va tiyisa, va va seketela, va tlhela va va laya hakuva va lava lezvaku va tsaka va tlhela va humelela wutomini. Zvini lezvi a vapswali va zvi rindzelako ka vana vabye? Va rindzela lezvaku va va randza va tlhela va hanya hi lezvi va va gondzisako kasi va humelela  wutomini. Hi ndlela yo fana, Jehovha, a Papayi wa hina wo mbhelela, i rindzela lezvaku hi kombisa kubonga hi zvontlhe lezvi a hi mahelako.

Kasi hi ingisa a gezu ga Nungungulu hi fanele ku tiva lezvi a hi byelako. Kota lezvi hi kalako hi ngazwi gezu gakwe hi kukongoma, hi ingisa Nungungulu hi ku lera ni ku hanya hi lezvi zvi nga lomu ka Mhaka yakwe, a Bhibhiliya. — 1 Johani 5:3.

Kasi ku komba a lisima la ku ingisa gezu ga Nungungulu, Jesu i te: ‘A munhu a nga ta hanya hi cibaba coce, kanilezvi hi timhaka tontlhelele leti ti humako non’wini wa Nungungulu.’ (Matewu 4:4) A ku gondza hi tiva Nungungulu zva lisima a ku fana ni kuga zvakuga. Kanilezvi, a wutivi ga Nungungulu ga lisima nguvhu ku hundza zvakuga. Hikuyini? Solomoni, a Hosi yo tlhariha, i tlhamusele lezvi: ‘A wutlhari i ndzhuti [“ga vhikela”, Tradução do Novo Mundo], kota lezvi mali yi nga ndzhuti; kanilezvi a wuchukwana ga wutivi hi lezvaku a wutlhari gi hlayisa wutomi ga lava va nga nago.’ (Mutshawuteli 7:12) A wutivi ni wutlhari zvi tako hi ka Nungungulu zvi nga hi vhikela zvi tlhela zvi hi vhuna ku maha zviboho zva wutlhari lezvi zvi to hi yisa wutomini ga pindzukelwa cikhatini ci tako.

Ka ndzima yi hundzileko hi wulawulile hi mufananiso wa Jesu, waku: “A nyangwa ya wutomi yi hlonganile, ni ndlela yi yako kona yi khumile, mbatsongwani lava va yi kumako.” (Matewu 7:13, 14) Kasi hi vhuneka khwatsi hi tlhela hi chikela lomu hi yako kona, ku nga wutomini ga pindzukelwa, hi fanele ku famba hi ndlela leyo na hi rangelwa hi munhu wo tlhariha. Hikwalaho, hi na ni cigelo co zwala ca kuva hi ti karatela kuva ni wuxaka ga hombe na Nungungulu. (Lisimu 16:8) Kanilezvi hi nga zvi mahisa kuyini?

Siku ni siku, ku na ni zvilo zvo tala lezvi hi faneleko ku maha ni zvin’wani zvo tala nguvhu hi zvi xuvako ku maha. A zvilo lezvo zvi nga hi kama kutani ku hi colopetela laha ka kuza hi nga ha ci kumi cikhati ca ku ehleketa hi lezvi Nungungulu a zvi lavako ka hina. Hi cigelo leco a Bhibhiliya gi hi tlharihisa giku: ‘Ti woneleni khwatsi a kufambeni ka n’wina, mu nge khwatsi a mu tlharihangi, kanilezvi khwatsi hi vatlharihileko. Tirisani [khwatsi] cikhati, hakuva masiku ma bihile.’ (Va Le Efesusi 5:15, 16) Hi nga simama ku namarela ka Nungungulu hi ku wona wuxaka ga hina naye kota nchumu wa lisima nguvhu wutomini ga hina. — Matewu 6:33.

A wu nge zvi koti ku cica lezvi u mahileko kale, kanilezvi u nga maha co kari kasi wena ni lava u va randzako muva ni wumandziko ga gi nene. A Bhibhiliya gi komba lezvaku a Papayi wa hina wa le tilweni, Jehovha Nungungulu, wa hi randza nguvhu niku wa hi byela lezvi a lavako ku hi maha. Hi nga wona magezu ya muphrofeti Mika:

‘Wena munhu, u tivisilwe zvinene; ni lezvi Jehovha a zvi lavako ka wena, hi lezvaku u maha le’zva kululama, u randza wuxinji, ni ku famba hi kutikoramisa zvin’we ni Nungungulu wa wena.’ — Mika 6:8.

U ta vhumela ku famba na Jehovha u kuma makatekwa ya kala kupindzuka lawa a tsumbisako lava va mahako lezvo ke? Hlawula hi wece!