Hi cikombiso, Sally * wa le Estados Unidos a nga biwa hi cingulo a luza zvontlhe, i tlhamusela lezvi: “Ndzi karatekile nguvhu laha ka kuza ndzi vhumala ni co maha. Hi masiku yo tala, ndzi wa ti zwisa ku khwatsi ndzo lava kufa.”

A cikarato cin’wani hi loku hi felwa hi munhu hi mu randzako. Hi cikombiso, Janice wa le Austrália i bika lawa: “A cikhati ndzi nga felwa hi vana va mina va vambiri, a mbilu ya mina yi noya hi ku hlakala; zvi lavile ku ndzi rolela zvipalavati zva kona ndzi tlhavinyetela hi laha ndzi zvi kotako hi kona kasi ndzi zvi kota ku timisela. Ndzi no byela Nungungulu ndziku: ‘A mbilu ya mina yi pandzekile, a ndza ha zvi koti ku timisela! Ndzi tsike ndzifa basi. A ndza ha zvi lavi ku hanya.’”

Daniel i kumene ni cikarato ca ku a sati wakwe a maha wubhayi. A zvi no ku mu pandza mbilu! I tlhamusela lezvi: “A cikhati leci a sati wa mina a nga ndzi byela ku i etlele ni wanuna mun’wani, zvi bayisile ku khwatsi ndzo tlhaviwa hi mukwana. A kubayisa loko ku phindaphindile hi makhati yo tala — zvi tlhela zvi teka tihweti to tala na zva ha zwala.”

Ka Murindzeli lowu, hi ta wona ku hikuyini zvi nga chukwana ku simama u hanya hambu:

• Loku u welwe hi mhango ya ntumbuluko

• Loku u felwa hi munhu u mu randzako

• Loku a nuna kutani sati a maha wubhayi

• Loku u hi ni mababyi ya hombe

• Loku u wona ku i chukwana ku ufa

Makunu, kasi ku sangula, a hi wone ku u nga zvi kotisa kuyini ku timisela loku u welwe hi mhango ya ntumbuluko.