WA TSHUKA u karateka laha ka kuza u zvi wona zvi hi chukwana ku ufa ke? Loku zvi ku mahekele, kuzvilava wa zvi tiva khwatsi lezvi Adriana a nga ti zwisa zvona. I wa tshama na a karatekile ku hundza mpimo, niku i wa zvi wonisa ku zvi nga ta tshuka zvi chukwata. I no guma a ya khomiwa mababyi ya ku karateka ku hundza mpimo (depressão clínica).

Wona cikombiso cin’wani ca wanuna wa le Japão wa ku hi Kaoru, loyi a nga kari a hlayisa vapswali vakwe vo khosahala seno na va babya. I li: “Zvikhati zvin’wani ndzi wa rereka hi tixanisa ta le ntirweni. Hi kufamba ka cikhati, ndzi no guma ndzi swihala ni kuga; ndzi se sangula ku zvi wona zvi hi chukwana ku ndzifa ndzi ya humula.”

A wanuna mun’wani wa le Nigéria wa ku hi Ojebode, i li: “Ndzi wa tshama na ndzi swirekile laha ka kuza ndzi rila. Hikwalaho, ndzi no hlota tindlela ta ku ti daya.” A ya ku tsakisa hi ku Ojebode, na Kaoru, na Adriana a va ti dayangi. Kanilezvi, lembe ni lembe ku ni cipimo ca 800 000 wa vanhu va ti dayako.

A kutala ka lava va ti dayako vavanuna, lava a kutala ka vona va dhanako ku kombela civhuno. Jesu i te lava va babyako va lava dhokodhela. (Luka 5:31) Hikwalaho, loku u zvi wona zvi hi chukwana ku ti daya, maha wuxinji u kombela civhuno — u nga dhani. A kutala ka lava va nga ni mababyi yo karateka ku hundza mpimo, va vhunekile nguvhu hi ku tiriwa hi dhokodhela. Ojebode, na Kaoru, na Adriana, va vhunilwe hi dhokodhela, niku zvezvi va zvi kota ku timisela zvikarato zvabye.

A vadhokodhela va nga tira munhu hi makinini yo kari kutani ku bhula naye va mu kuca ku tlhamusela lezvi a ti zwisako zvona, kutani matirela wontlhe ya mambiri. Lava va nga ni mababyi lawa ya ku karateka ku hundza mpimo va nga vhuniwa hi maxaka ni vanghana vabye loku va ti karatela ku va zwisisa, va kombisa lihlazva-mbilu, va khatala hi vona, va tlhela va va vhunetela. A munghana wa mu nene ka vontlhe hi Jehovha, loyi a hi nyikako civhuno ca ci nene lomu ka Mhaka yakwe, a Bhibhiliya.

A kutala ka lava va nga ni mababyi yo karateka ku hundza mpimo va lava ku tiriwa hi cikhati co leha niku va fanele ku gondza ku lwisana ni cikarato leci hi ku cica zvokari wutomini gabye. Kanilezvi, a ku fana na Ojebode, loku wenawu u hi ni mababyi lawa, u ngava ni litsako la ku tiva ni ku rindzela lezvaku cikhatini ci tako ku tava ni zvilo zva zvi nene. I li: “Ndzi ci rindzela hi mahlo yo pswhuka a cikhati leci Isaya 33:24 a to tatiseka. A vhesi legi, gi wulawula hi cikhati leci ku to kala ku nga hi na munhu a to: ‘Ndza babya!’” A ku fana na Ojebode, wenawu chaveleleka hi citsumbiso ca Nungungulu ca “misava yiswa”, lomu ku to kala ku nga ha hi na “kubayisa”. (Kuvhululelwa 21:1, 4) A kubayisa loku ku wuliwako ku patsa ka le mbilwini ni maalakanyweni. A kubayisa loku u ku zwako mbilwini ku ta fambela teto. A kubayisa loko u nga ta ha ku alakanya kambe, ne ku nga ta ha “wuya lomu” maalakanyweni. — Isaya 65:17.