A TINDZIMA to sangula ti komba lezvi a wutomi gi nga bindzisako zvona loku a munhu a kumana ni zvikarato zva hombe. Laha u lwisanako ni zvikarato zva wena, u nga tshuka u karateka u ti wutisa ku a hi chukwana ufa ke, kutani u ku kona ku ni munhu a khatalako hi wena ke. Tiyiseka lezvaku Nungungulu wa khatala hi wena ndzeni ka zvikarato zva wena. U wa lisima ka yena.

Loyi a nga tsala Lisimu 86 i wulile magezu ma kombako ku i wa tsumba Nungungulu. I te: ‘Ndzi ta kombela ka wena cikhatini ca kuxaniseka ka mina, hakuva wena u ta ndzi hlamula.’ (Lisimu 86:7) Hambulezvo, u nga ha ti wutisa lezvi: “Nungungulu i ta ndzi hlamulisa kuyini ‘cikhatini ca kuxaniseka ka mina”?’

Hambu lezvi ka ku Nungungulu a nga tshuka a nga tekeli ku susa zvikarato zva wena, a Mhaka yakwe, a Bhibhiliya, gi ku tiyisekisa lezvaku a nga ku nyika kurula ku to ku vhuna ku timisela a zvikarato lezvo. Gi li: “Mu nga karateki hi nchumu, kanilezvi timhakeni tontlhe tivisani Nungungulu zvontlhe lezvi zvi mu karatako hi ku kombela ni ku khongotela, na mu kari mu bonga; a kurula ka Nungungulu loku ku hundzako a kupima kontlhe, ku ta hlayisa a timbilu ta n’wina ni maalakanyo ya n’wina.” (Va Le Filipi 4:6, 7) Hi kombela lezvaku u wona lezvi a mavhesi lawa ma landzelako ma kombisako zvona lezvaku Nungungulu wa hi randza a tlhela a hi khatalela.

“Ci hava ni [cinjingiri] cin’we ci kalako ci nga woniwi hi Nungungulu. . . . N’wina mu va lisima nguvhu a ku hundza zvinjingiri zvo tala.” — Luka 12:6, 7, tlhamuselo wa lahasi.

ZVI ALAKANYELE KHWATSI: A zvinyanyani zva zvi tsongwani zvo kota zvinjingiri zvi wonekisa ku khwatsi a hi zva lisima. Hambulezvo, Nungungulu wa khatala hi zvona. Zvontlhe wa zvi wona. Zvontlhe zvivangwa zvakwe zva lisima. A ka Nungungulu, a vanhu va ni lisima ku hundza zvinjingiri. A vanhu hi vona va lisima nguvhu ka  zvontlhe a nga zvi vanga laha misaveni; i va vangile hi “mufananiso” wakwe, niku zva koteka ku va ti karatela kuva ni matshamela ya ma nene lawa a nga nawo va tlhela va ma kombisa. — Genesisi 1:26, 27.

‘Jehovha, u ndzi hlolile, wa ndzi tiva. . . . U tiva maalakanyo ya mina. . . . Ndzi hlole . . . u tiva a maalakanyo ya mina.’ — Lisimu 139:1, 2, 23.

ZVI ALAKANYELE KHWATSI: Nungungulu wa ku tiva khwatsi. Wa zvi tiva lezvi zvi nga mbilwini ya wena ni lezvi zvi ku karatako. Hambu lezvi ka ku a van’wani a va nge zvi zwisisi khwatsi lezvi zvi ku karatako ni hlomulo wa wena, Nungungulu wa khatala hi wena niku i lava ku ku vhuna. Leco cigelo ca ku u simama u hanya.

‘Zwana mukombelo wa mina, Jehovha. . . . Koramisa a ndleve ya wena loku ndzi vitana, hatlisa u ndzi hlamula. . . . I tazwa a mukombelo wa loyi a vhumalako.’ — Lisimu 102:1, 2, 17.

ZVI ALAKANYELE KHWATSI: Zvi fana ni loku Jehovha a hlayela mihloti leyi a vanhu va rilako kusukela loku va sangulile ku xaniseka. (Lisimu 56:8) Laho ku patsiwa ni mihloti ya wena. Jehovha a nga zvi rivali a zvikarato zva wena ni mihloti u rilako hakuva wa khatala hi wena.

‘U nga mbheli ntamu, hakuva ndzi Nungungulu wa wena! Ndzi ta ku tiyisa, ndzi ku vhunetela . . . Mina Jehovha Nungungulu wa wena . . . [Ndzi li]: U nga chavi, ndzi ta ku vhunetela.’ — Isaya 41:10, 13.

ZVI ALAKANYELE KHWATSI: Nungungulu i longile ku ku vhuna. Loku uwa, i ta ku vhuxa.

“Nungungulu i no randza nguvhu tiko laha ka kuza a nyikela N’wana wakwe a pswalilweko yece, kasi ni wihi loyi a kholwako kakwe a nga lovisiwi, kanilezvi a kuma wutomi ga pindzukelwa.” — Johani 3:16.

ZVI ALAKANYELE KHWATSI: Phela wena u wa lisima nguvhu ka Nungungulu. I zile a nyikela N’wana wakwe Jesu kota muphahlo kasi ku vhuna wena — lezvo ne na a nga kurumetwangi. A muphahlo lowo, wu vhulula ndlela ya ku u hanya wutomi ga gi nene ni go tsakisa kala kupindzuka. *