Loku ku hi ku Nungungulu a hi yena a vangako kuxaniseka, hikuyini ku nga ni tindlala, wusiwana ga hombe, tiyimpi to tshisa, mababyi yo kala muri, ni timhango ta ntumbuluko ke? A Bhibhiliya, gi komba zvilo zvinharu zva tshinya zvi vangako kuxaniseka ka vanhu, ku nga lezvi:

1. A vanhu va ti randza wutsumbu, va na ni wunavenave, ni livengo. A ‘mun’we a fumela mun’wani a mu yisa khombyeni.’ (Mutshawuteli 8:9) A kutala ka zvikhati a vanhu va vangelwa tixanisa hi vanhu vo kala kumbhelela, va ku ti randza wutsumbu, ni va tihanyi.

2. Cikhati ni ku tshuka zvi humelela. A kutala ka zvikhati a vanhu va xaniseka hi kota ya ku ‘vontlhe va chikelelwa hi cikhati, zvi dzuka zvi va humela’. (Mutshawuteli 9:11) Lezvo zvi maheka hi ku a vanhu va tshuka va kumeka ka wutshamu ga hava ni cikhati ca hava kambe, ka maheka timhango, a vanhu va tala ku ti hunda loku va tlharihisiwa kutani ku va maha zvihoxo.

3. Mufumeli wo biha wa misava. A Bhibhiliya gi zvi veka kubaseni ku cini khwatsi khwatsi ci vangako kuxaniseka ka vanhu. Gi ngalo: ‘A  tiko gontlhe gi le ntan’wini wa loyi wa kubiha.’ (1 Johani 5:19) A munhu loye “wa kubiha” hi Sathani, a nga civangwa ca moya ca ntamu loyi kusanguleni a nga hi ngilozi ya Nungungulu kanilezvi ‘a nga yimangi lisineni’. (Johani 8:44) A tingilozi tin’wani ti no ti patsa na Sathani ti tsika ku ingisa Nungungulu hi ku lava ku tatisa kunavela ka tona ka hava, hi ndlela leyo ti se ti maha madhimoni ha toce. (Genesisi 6:1-5) Hikwalaho, kusukela loku Sathani ni madhimoni yakwe va tsikile ku ingisa, va vhuvhumisa wubihi ni tihanyi laha misaveni. Lezvo zviya zvi woneka nguvhu masikwini ya hina. Zvezvi Sathani i zangarile nguvhu niku i ‘khohlisa tiko gontlhe’, lezvi zvi vangako “khombo” laha misaveni. (Kuvhululelwa 12:9, 12) Phela Sathani i na ni xapi futsi. I tsaka hi ku wona vanhu na va xaniseka. Zvi la su dlunya lezvaku Sathani hi yena a va vangelako kuxaniseka vanhu, a hi Nungungulu.

ALAKANYELA LEZVI: Vanhu vo kala ku zwela wusiwana ni vamahi va zvilo zvo biha basi va nga va vangelako tixanisa a vanhu vo kala nandzu. A kuhambana ni lezvo, a Bhibhiliya gi ngalo: ‘Nungungulu lirandzo.’ (1 Johani 4:8) Mayelano ni wumunhu gakwe ga lirandzo, a Bhibhiliya gi li ‘a kubiha ku le kule na Nungungulu, ni kugoha a ku kona ka Nyamintamu’. — Joba 34:10.

Hambulezvo, u nga ti wutisa ku: ‘Xana Nungungulu wa ntamu wontlhe i ta vhumelela Sathani lezvaku a simama ku fuma hi ndlela ya hava kala rini?’ Kota lezvi hi zvi wonileko, Nungungulu wa venga wubihi, niku zva mu bayisa nguvhu a ku hi wona na hi xaniseka. A kuhundza lezvo, a Mhaka yakwe ya hi kuca yiku: ‘Vekani hehla ka yena kontlhe a kukarateka ka n’wina, hakuva wa mu khatalela.’ (1 Pedro 5:7) Nungungulu wa hi randza niku i na ni ntamu wa ku fuvisa kuxaniseka kontlhe ni wukanganyisi gontlhe, kota lezvi zvi to tlhamuselwa ka ndzima yi landzelako. *