A ku zwela wusiwana “wutlhari kutani wutivi legi a vanhu va nga nago ga ku zwisisa lezvi a mun’wani a ti zwisako zvona, hi ku ti veka ka ciyimo ca munhu loye.” Dr. Rick Hanson, a nga tlhari yo kari i wulile lezvaku “a ku zwela wusiwana zvi lomu ka marambu ya hina.”

ALAKANYELA LEZVI: Hikuyini hi nga pswaliwa na hi hi ni wutlhari kutani wutivi ga ku kombisa ku zwela wusiwana, gi nga tshamela ga ku a zvihari a zvi nago? A Bhibhiliya gi li Nungungulu i vangile vanhu hi mufananiso wakwe. (Genesisi 1:26) Kunene, hi mahilwe hi mufananiso wa Nungungulu zvi wulako ku hi nga kombisa wumunhu gakwe hi tlhela hi kombisa matshamela yakwe ya ma nene. Hikwalaho, a cikhati leci a ku zwela wusiwana ku kucako vanhu vo khatala lezvaku va vhuna van’wani, vo wonekelisa a ku zwela wusiwana ka Muvangi wabye, Jehovha Nungungulu. — Mavingu 14:31.

Nungungulu wa hi zwela wusiwana niku a nga zvi lavi ku hi wona na hi xaniseka. Xungetano hi vaIzrayeli va kale, lava va nga timisela malembe yo tala le Gibhite na va hi tikhumbi, va guma va xaniseka hi 40 wa malembe lomu ciwuleni, a Bhibhiliya gi ngalo: ‘Lomu zvikaratweni zvabye zvontlhe i no karateka zvin’we navo.’ (Isaya 63:9) Wona lezvaku a hi ku khwatsi Nungungulu i wo tiva zvikarato zvabye basi. Kanilezvi i wa tlhela azwa kubayisa loku va nga kuzwa. I te: ‘Ndza tiva a hlomulo wabye.’ (Eksodhusi 3:7) A tlhela aku: ‘Loyi a mu khumbako i khumba a ndzololwani ya tihlo ga [mina].’ (Zakariya 2:8) Loku a van’wani va hi zangarisa, a mbilu yakwe yi bayiseka ni leti ta hina.

A Bhibhiliya gi hi tiyisekisa lezvaku hambu loku hi tshuka hi tizwa nandzu hi ti wona na hi nga ringanelwi hi ku Nungungulu a hi zwela wusiwana, ‘Nungungulu wa hombe ku hundza timbilu ta hina, wa zvi tiva zvontlhe’. (1 Johani 3:19, 20) Nungungulu wa hi tiva khwatsi a ku hundza hina venyi. Wa zvi tiva khwatsi zviyimo zva hina zvontlhe, maalakanyo ya hina, ni lezvi hi ti zwisako zvona. Wa hi zwela wusiwana.

A Mitsalo ya hi tiyisa

• ‘Jehovha i ta ku hlamula loku u kombela, ni loku u vitana, yena i taku: Ndzi laha!’ — ISAYA 58:9.

• ‘Hakuva ndza alakanya lezvi ndzi xuvako ha n’wina, ku wula Jehovha: Maalakanyo ya kurula, na ma nga hi ya khombo, lezvaku mu tsumba a masiku ma ha tako. Mu ta ndzi vitana, mu famba mu ndzi khongela, mina ndzi ta mu ingisa.’ — JEREMIYA 29:11, 12.

• ‘Chela a mihloti ya mina lomu ka nghotso ya wena; a yi tsaliwangi lomu bhukwini ga wena ke?’ — LISIMU 56:8.

Xana a ku tiva ku Nungungulu wa hi zwela wusiwana a zvi hi vhuni ku yimisana ni zvikarato hi kumanako nazvo ke? Zwana tshango ga Mariya. I ngalo:

“Ndzi wa zvi wonisa ku khwatsi a wutomi ga bindza niku a gi lulamangi andzhako ka ku felwa hi jaha ga mina ga 18 wa malembe gi nga mbheta malembe mambiri na gi babya hi kankro. Ndzi no zangarela Jehovha hi lezvi a nga kala ku mu hanyisa!

Andzhako ka 6 wa malembe, a munghana wo kari wa lirandzo ni wo zwela wusiwana wa le bandleni i no ndzi ingisela laha ndzi nga ti phofula lezvi ndzi nga ti zwisa zvona zvaku Jehovha a nga ndzi randzi. Andzhako ka ku ndzi ingisela hi 4 wa tihora na a nga ndzi tsemarisi, i no tshaha vhesi go kari gi nga ndzi khumba nguvhu ku nga 1 Johani 3:19, 20, a nge: ‘Nungungulu wa hombe ku hundza timbilu ta hina, wa zvi tiva zvontlhe.’ I no tlhamusela lezvaku Jehovha wa zvi zwisisa a zvikarato zva hina.

Hambu lezvi ndzi nga chavelelwe zvi ndzi karatele a ku tsika ku zangarela Jehovha! Ndzi no guma ndzi gondza Lisimu 94:19, li nge: ‘Laha ndzi nga karateka mbilwini, wena u tangalisile a muhefemulo wa mina.’ Ndzi ti zwisile ku khwatsi a vhesi legi gi wa no tsalelwa mina! Hi kugumesa, ndzi polile ku zva ndzi tangalisa a ku bhula na Jehovha ndzi mu byela zvikarato zva mina, na ndzi tiva ku wa ingisela niku wa zvi zwisisa.”

Hi nga wona lezvi zvi chavelelisako zvona a ku tiva ku Nungungulu wa zvi zwisisa lezvi hi ti zwisako zvona niku wa hi zwela wusiwana! Kanilezvi, hikuyini ku nga ni kuxaniseka ko tala? Ku ngava lezvaku Nungungulu o hi tsayisa hi kuva hi mahile zvo biha? Xana Nungungulu i ta fuvisa a kuxaniseka kontlhe? A zviwutiso lezvi zvi ta hlamuliwa ka tindzima ti landzelako.