‘Jehovha, ndzi ta rila kala rini, na wena u nga zvizwi ke? Ndza rila ka wena hi kota ya tihanyi ta vanhu, kanilezvi a ku hanyisi!’ (Habhakuka 1:2, 3) A magezu lawo ma wulilwe hi Habhakuka, a wanuna wo lulama a nga tsakela tipswalo ta Nungungulu. Xana a magezu yakwe ma komba ku i wa nga hi na ku kholwa? Ne ni kutsongwani! Nungungulu i tiyisile Habhakuka aku Yena i wa gemile cikhati leci a to fuvisa hi cona kuxaniseka. — Habhakuka 2:2, 3.

Loku wena kutani xaka ga wena gi xaniseka, zva olova ku tekela ku pimisa ku Nungungulu wa hlwela ku maha cokari, laha ka ku i wa fanele ku maha kwalaha ni kwalaha. Kunene, a Bhibhiliya ga hi tiyisa giku: ‘A Hosi [Jehovha] a yi hlweli ku maha lezvi yi nga tsumbisa zvona, kota lezvi van’wani va alakanyako lezvaku ya hlwela. Kanilezvi yi timisela ha n’wina, hakuva a yi randzi lezvaku ku lova ni mun’we, kanilezvi yi randza lezvaku vontlhe va hundzuluka.’ — 2 Pedro 3:9.

Zvezvanyana! Jesu i kombile lezvaku a cizukulwana co kari ci wa ta wona a zviyimo zvo tala zvi nga wa ta komba masiku yo gumesa ya “tiko”. (Matewu 24:3-42) A kutatiseka ka zviphrofeto zva Jesu masikwini ya hina zvi komba ku a cikhati ca kuva Nungungulu a maha co kari hi zvikarato zva vanhu ci laha nyongeni. *

Kanilezvi Nungungulu i ta ku fuvisisa kuyini kuxaniseka kontlhe? A cikhati leci Jesu a nga hi laha misaveni, i kombisile ntamu wa Nungungulu hi ku humuta vanhu lava va nga xaniseka. Wona zvikombiso zvo kari.

Timhango ta ntumbuluko: A cikhati leci Jesu ni vapostoli vakwe va nga endza hi ngalava lomu Bimbini ga Galileya, ku noba a moya wa hombe wu nga ndlengandlengisa a ngalava yabye yi lava ku mbombomela. Kanilezvi Jesu i kombile lezvaku yena ni Papayi wakwe va zvi kota ku wonelela mintamu ya ntumbuluko. (Va Le Kolosi 1:15, 16) Jesu i no wula basi, aku: “Miyela, uku hwi!” Zvini zvi nga maheka? “A moya wu no nyima, kuva ni kurula ka hombe.” — Marku 4:35-39, Tradução do Novo Mundo.

Mababyi: Jesu i wa tiviwa nguvhu hi wuzvikoti gakwe ga ku hanyisa zvikhumu ni zvilima, a ku patsa ni lava va nga xaniseka hi nyokani, hlokonho, ni man’wani mababyi. I no “hanyisa vontlhe lava va nga kari va babya”. — Matewu 4:23, 24; 8:16; 11:2-5.

Kuvhumaleka ka zvakuga: Jesu i tirisile ntamu lowu a nga nyikilwe hi Papayi wakwe lezvaku a engetela zvakuga hi mpimo wa hombe. A Bhibhiliya gi wula lezvaku a cikhati leci Jesu a nga kari a maha ntiro wakwe wa kuchumayela laha misaveni, i gisile vanhu vo tala hi makhati mambiri. — Matewu 14:14-21; 15:32-38.

Kufa: A ntamu wa Jehovha wa ku vhuxa vafileko wu ti kombile a cikhati leci Jesu a nga vhuxa vanhu vanharu hi ka vafileko. A mun’we wa lava a nga va vhuxa hi ka vafileko ku wa hundza mune wa masiku na a file. — Marku 5:35-42; Luka 7:11-16; Johani 11:3-44.