Nungungulu i te ngalo ka Adhamu: “A siku lego u ta nga yiga [a sinya], u tafa.” (Genesisi 2:17) A nayo lowu wu wa nga ta zwisiseka loku ku wa hi ku khwatsi Adhamu i wa mahelwe ku khosahala a gumesa afa.

Adhamu na Evha va wa nga hi na cilaveko ca ku vaga a sinya leyo kasi va hanya hakuva ku wa hi ni tisinya to tala ta ku pswala mihandzu lomu jardhim ya Edheni. (Genesisi 2:9) Hi ku ngagi a siya leyo, Adhamu na Evha va wa ta komba lezvaku va wa ingisa Loyi a nga va nyikile wutomi. Va wa ta komba kambe lezvaku va wa zvi tiva lezvaku Nungungulu hi yena a nga ni fanelo ya ku va byela lezvi va faneleko ku maha.

Kasi ku zwisisa lezvaku hikuyini Adhamu na Evha va fileko, hi fanele ku hlola bhulo legi gi khumbako hontlheni. Sathani i tirisile a nyoka kasi a wula mawunwa yo tshisa. A matimu ya Bhibhiliya ma wula lezvi: ‘A nyoka yi wa hi ni mano ku hundza zvihari zvontlhe zva tiko, lezvi Jehovha Nungungulu a nga wa zvi mahile. Yi ku ngalo ka wasati: Hakunene Nungungulu i wulile lezvaku mu ngagi ni sinya yin’we ya simu ke?’ — Genesisi 3:1.

Evha a hlamula aku: ‘Hi ngaga a mihandzu ya tisinya tontlhe, kanilezvi a mihandzu ya sinya leyi yi nga cikari ka simu, Nungungulu i te ngalo, mu nga ta yiga, hambu ni ku yi henya, kasi mu ngafi. Ni nyoka yi ku ngalo ka wasati: Mu nga tafa futsi; hi lezvaku Nungungulu wa zvi tiva lezvaku, a siku lego mu gako yona, a mahlo ya n’wina ma ta vhululeka, mu kota Nungungulu, mu tiva kusasa ni kubiha.’ Hi ndlela leyo, Sathani i lumbetile Jehovha a ku muhembi loyi a nga va tsona a zvilo zva zvi nene a vapswali va hina vo sangula. — Genesisi 3:2-5.

Evha i no kholwa lezvi a nga zvizwa. A yi cuwukisa khwatsi a sinya. A yi wona lezvaku yi sasekile niku wa navetisa ku giwa! A se khaya mihandzu ya kona aga. A Bhibhiliya gi gumesa giku: ‘I no ya nyika ni nuna wakwe kambe, yenawu i noga.’ — Genesisi 3:6.

Hi nga alakanya lezvi zvi nga mu bayisisa zvona Nungungulu a ku wona a vana vakwe va ku va randza na va tsika ku mu ingisa ha womu! Zvini a mahileko? Ka Adhamu, Jehovha i te ngalo: ‘U [ta] tlhelela misaveni; hakuva wena u humesilwe ka yona. Wena u ntshuri, u ta tlhelela tshurini.’ (Genesisi 3:17-19) Hi kota ya lezvo, ‘wontlhe masiku ya kuhanya ka Adhamu ma wa hi 930 wa malembe, zvonake i nofa’. (Genesisi 5:5) Adhamu a nga yangi  tilweni kutani ka gin’wani wutshamu. Na a nga se vangiwa hi Jehovha hi ku tirisa a ntshuri wa misava, Adhamu i wa nga hi kona. Hikwalaho a cikhati leci a ngafa i no luza wutomi, a miri wakwe wu tlhela wa maha ntshuri. A nga havi kona. A hi ku bayisa ka zvona.

Hi kota ya lezvi va nga tsika ku ingisa ha womu, Adhamu na Evha va luzile ku mbhelela ni lungelo ga ku hanya kala kupindzuka. A miri wabye wu cica; va nga havi vanhu vo mbhelela va tlhela va kuma ciwonho, niku va no thapelisa a ciwonho cabye ka vontlhe a vana vabye. A ciwonho cabye a ci khumbi vona basi. Va Le Roma 5:12 i ngalo: “A ku khwatsi hi lezvi a ciwonho ci nga nghena tikweni hi kota ya munhu mun’we [Adhamu], ni kufa ku tile hi kota ya ciwonho; hikwalaho a kufa ku no thapela vanhu vontlhe, hakuva vontlhe va wonhile.”

A Bhibhiliya gi tlhamusela a ciwonho ni kufa kota “nguwo leyi yi khubhunyetako matiko wontlhe, ni kumba lowu wu fenengetileko yontlhe mifumo”. (Isaya 25:7) A nguwo leyi yi khubhunyeta vanhu a ku fana ni vhenene ya ku a nga kona a zvi kotako ku pona. Kunene, hi kota ya Adhamu ‘vontlhe vafa’. (1 Va Le Korinte 15:22) Niku ku vhuka a ciwutiso leci ci mahilweko hi mupostoli Pawule caku: “Himani a to ndzi tlhatlhisa mirini lowu wu ndzi yisako kufeni ke?” Himani a nga zvi kotako? — Va Le Roma 7:24.