HAMBU lezvi a ku nga ingisi ka vapswali va hina vo sangula, Adhamu na Evha, ku nga tisa ciwonho ni kufa ka vanhu vontlhe, a ku cicangi a kungo ga Nungungulu hi vanhu. Hi ku tirisa Gezu gakwe gi tsalilweko, a Bhibhiliya, Nungungulu wa hi tiyisekisa hi kuphindaphinda lezvaku a kungo gakwe a gi cicangi.

• “A valulamileko va taga tshomba ya tiko, va hanya ka gona kala kupindzuka.” — Lisimu 37:29, NM.

• ‘I ta fuvisa kufa kala ku pindzuka; Hosi Nungungulu i ta hlangula mihloti tinghoheni tontlhe.’ — Isaya 25:8.

• “A nala wo gumesa a to lovisiwa kufa.” — 1 Va Le Korinte 15:26.

• “Ku nga ta hava ni kufa, hambu ni hlomulo, kutani kurila, ni kubayisa.” — Kuvhululelwa 21:4.

Nungungulu i ta “fuvisa kufa” hi ndlela muni? Kota lezvi hi zvi wonileko, a Bhibhiliya gi zvi veka kubaseni lezvaku ‘a valulamileko . . . va ta hanya kala kupindzuka’. Kanilezvi gi tlhela giku: “A nga kona munhu a lulamileko misaveni, loyi a mahako kusaseka.” (Mutshawuteli 7:20) Xana lezvo zvi wula ku Nungungulu i to tsika a milayo yakwe kasi a vanhu vo kala ku mbhelela va hanya kala kupindzuka? Ne ni ku tsongwani! A nga ta tshuka a zvi mahile lezvo hakuva ‘Nungungulu . . . a nga hembi’. (Titusi 1:2) Makunu, zvini lezvi Nungungulu a to maha kasi a tatisa a kungo gakwe?

Jehovha Nungungulu i mahile malulamiselo ya lirandzo kasi ku tlhatlhisa vanhu vontlhe ka kufa hi ku tirisa hakhelo ya kutlhatlhisa. A hakhelo ya kutlhatlhisa i ntsengo wu ringanako lezvi zvi wonhekileko lowu wu humesiwako kasi ku riha zvilo lezvo. Kota lezvi a vanhu vontlhe va nga va wonhi va konelwe kufa, a Bhibhiliya gi li: ‘A munhu a nga zvi koti ku tirula a nakulobye, hambu ku mu humesela ndzhiho ka Nungungulu. (Hakuva a kutirula ka muhefemulo wabye ka lisima, a munhu a nga zvi koti ku mahelwa kona hambu ni siku gin’we).’ — Lisimu 49:7, 8.

Loku a munhu wo kala kumbhelela afa, o hakhela zviwonho zvakwe basi; a nga zvi koti ku ti tlhatlhisa, ne hambu ku tlhatlhisa mun’wani ka ciwonho. (Va Le Roma 6:7) Ku wa laveka munhu wo mbhelela na a nga hi na ciwonho lezvaku a nyikela wutomi gakwe hi kota ya zviwonho zva hina, na ku nga hi zva yena. — Mahebheru 10:1-4.

Lezvo hi zvalezvi Nungungulu a zvi maheleko futsi. I rumele N’wana wakwe, Jesu, lezvaku ata laha misaveni kota munhu wo mbhelela ni wo kala ciwonho. (1 Pedro 2:22) Jesu i wulile lezvaku i tele ku ta “nyikela wutomi gakwe kota hakhelo ya ku tlhatlhisa votala”. (Marku 10:45) I file kasi a hakhela zviwonho zva hina a tlhela a hi tlhatlhisa ka nala wa hina kufa kasi hi kuma wutomi. — Johani 3:16.

Nyamutlha, kutatisekeni ka zviphrofeto zva Bhibhiliya, hi hanya “zvikhati zva zvikarato” zvi kombako khwatsi lezvaku hi hanya “masikwini yo gumesa” ka tiko legi go biha. (2 Timote 3:1) A masiku yo gumesa ma ta gumesa “sikwini ga kulamulwa ni kuloviswa ka vanhu lava va nga chaviko Nungungulu”. (2 Pedro 3:3, 7) Kanilezvi lava va randzako Nungungulu va ta pona a ku lovisiwa va tlhela va kuma “wutomini ga pindzukelwa”. — Matewu 25:46.

 Lava va tsandza-vahlayi va to vhuxiwa va tava ni lungelo go hanya kala kupindzuka kwalaha misaveni. Jesu i vhuxile munhu hi ka vafileko a cikhati a nga endzela a dhoropa ga Nayine. A wasati wo kari a nga sina a felwe hi nuna i no felwa hi n’wana wakwe wa mun’we, laha Jesu a nga mu wona i no mu “zwela wusiwana” a vhuxa n’wana wakwe. (Luka 7:11-15) Mupostoli Pawule i tsalile lezvi: “Ndzi na ni kutsumba ka Nungungulu . . . ka lezvaku ku tava kona a kuvhuka ka lava vo lulama ni lava vo kala ku lulama.” A kutsumba loko ko tiya cikombiso ca lirandzo la hombe leli Nungungulu a nga nalo hi vanhu. — Mitiro 24:15.

A tibhiliyoni ta vanhu ti rindzela ku hanya kala kupindzuka. A Bhibhiliya gi li: ‘A valulamileko va taga tshomba ya tiko, va aka ka gona kala kupindzuka.’ (Lisimu 37:29) Ka cikhati leco, va ta ti buza hi litsako va tlhela va tiyisiwa hi ku wona ku tatiseka ka magezu ma tsalilweko hi mupostoli Pawule kwalomu ka 2000 wa malembe ma hundzileko, yaku: “Wena kufa, ku kwihi kuhlula ka wena ke? Wena kufa, yi kwihi a vhenene ya wena ke?” (1 Va Le Korinte 15:55) A kufa ku nga yena nala wa hombe wa vanhu i ta nghana a fuvisilwe a ku bhi!