Zva koteka ku hanya wutomi ga gi nene hambu zvezvi
KA SIKU go kari a vanhu va nga ta ha babya, va nga ta ha khosahala hambu hi kufa. Hambulezvo a wutomi nyamutlha gi tele hi zvikarato. Cini ci nga ku vhunako ku hanya wutomi ga gi nene? A Bhibhiliya gi nyika wusungukati gi nga ku vhunako ku hanya na u tsakile u tlhela uzwa kunandziha ka wutomi hambu zvezvi. A hi wone a zvikarato zvo kari hi kumanako nazvo, ni lezvi a Bhibhiliya gi nga hi vhunisako zvona.
TSAKA HI LEZVI U NGA NAZVO
A wusungukati ga Bhibhiliya gi li: “A mahanyela ya n’wina ma ngavi ya ku randza mali, kanilezvi tsakani hi lezvi mu nga nazvo.” — Mahebheru 13:5.
Nyamutlha a tiko gi na ni zviphati-phati zvo tala lezvi a vanhu va nge hi fanele kuva nazvo. Kanilezvi, a Bhibhiliya gi hi byela lezvaku hi fanele ku ‘tsaka hi lezvi hi nga nazvo’. Hi ndlela muni?
U nga ‘randzi mali’. A vanhu va veka mhangweni a wutomi gabye, mingango yabye, vanghana vabye, milayo ya mahanyela ni wumunhu gabye hi kota ya “ku randza mali”. (1 Timote 6:10) Hi nga wona a ku ti karata kontlhe loko! Hi magumo, loyi a randzako titshomba “a nga kolwi”. — Mutshawuteli 5:10.
Nyika lisima vanhu na ku nga hi zvilo. Hi lisine, a zvilo lezvi hi nga nazvo zva hi vhuna nguvhu. Kanilezvi a zvi nge tshuki zvi hi kombisa a lirandzo; ntsena vanhu hi vona va hi randzako. A kuva ni “munghana wa lisine” zva vhuna kuva ni litsako wutomini. — Mavingu 17:17, NM.
HI NGA HANYA WUTOMI GA GI NENE LOKU HI LANDZELA A WUSUNGUKATI GA BHIBHILIYA
TIMISELA LOKU U BABYA
A wusungukati ga Bhibhiliya gi li: “A mbilu yi tsakileko i muri wu nene.” — Mavingu 17:22.
A ku fana ni “muri wu nene”, a ku tsaka ku nga ku vhuna ku timisela loku u babya. Kanilezvi hi nga li kumisa kuyini litsako loku hi babya?
Kombisa kubonga. Loku hi tshamela ku gayela zvikarato zva hina, “wontlhe masiku” ma nga woneka na ma bihile. (Mavingu 15:15) Wutshan’wini ga ku hi alakanyela zvikarato, a Bhibhiliya gi li hi fanele ku kombisa “kubonga”. (Va Le Kolosi 3:15) Gondza ku kombisa ku bonga hi zvilo zva zvinene hi nga nazvo wutomini, hambu kova zvilo zva zvi tsongwani. A kusaseka ka kupela ka gambo, zvimoyana zvo nandziha, ku n’wayitela ka munhu hi mu randzako — a zvilo lezvi zvi nga chukwatisa a wutomini ga hina.
Va mahele zvilo van’wani. Hambu loku a wutomi ga hina gi nga fambi khwatsi; “loyi a nyikako wa tsaka nguvhu a ku hundza loyi a amukelako”. (Mitiro 20:35) Loku a van’wani va bonga a ku ti karata ka hina, ha tsaka nguvhu niku lezvo zvi hi maha hi rivala a zvikarato zva hina. Hi nga chukwatisa wutomi ga hina hi ku vhuna van’wani lezvaku va chukwatisa legi gabye.
TIYISA WUKATI GA WENA
A wusungukati ga Bhibhiliya gi li: “Tiva lezvi zvi nga zva lisima nguvhu.” — Va Le Filipi 1:10.
A nuna ni sati loku va nga ti nyiki cikhati co tshama zvin’we va nga veka mhangweni a wukati gabye. Hikwalaho, a vanuna ni vasati va maha khwatsi hi ku wona wukati kabye kota cin’we ca lezvi zvi nga zva lisima nguvhu wutomini gabye.
Tirani zvin’we. Wutshan’wini ga kulwa wece kasi u kuma lezvi zvi ku tsakisako, zvi ngo yini loku mo maha makungo ya lezvaku mu tira zvin’we? A Bhibhiliya gi li: ‘A vambiri va chukwana ku hundza mun’we.’ (Mutshawuteli 4:9) Mu nga bhika zvin’we, mu maha zvin’we a mihlakano ya ku tiyisa miri, kuya praya, ku paseyara zvin’we ni zvin’wani zvilo.
Kombisa lezvaku wa mu randza a nuna wa wena kutani sati wa wena. A Bhibhiliya gi kuca a vanuna ni vasati lezvaku va randzana va tlhela va kombisana cichavo. (Va Le Efesusi 5:28, 33) A ku n’wayitela, ku bharasara, kutani ku mu nyika cinyikiwo co kari zvi nga tiyisa wukati. Hi lisine, a masango ma fanele ku hlengelwa hi nuna ni sati lava va chadhileko. — Mahebheru 13:4.
Hi alakanya ku u ta zvi tsakela
KHINDLIMUKA!
Cini litsako la lisine? — U nga li kumisa kuyini?
Xana u ti wona na u hi munhu wo tsaka? Cini ci mahako munhu a tsaka?
A NGANGO WA WENA WU NGA TSAKA
Lava Nungungulu lezaku a ku vuna kuva ni wukati go tsakisa
A ku ti maha ziwutiso zimbiri za zi tsongwani zi nga chukwatisa a wukati ga wena.
