1-2. a) Hi kuya hi lezvi Jesu a nga laya ka Matewu 28:18-20, hi wihi ntiro-tshinya wa bandla ga wuKristu? b) Zviwutiso muni hi to wulawula hi zvona?

ANDZHAKO ka loku Jesu a vhukile hi ka vafileko, i no vitanisa a vapostoli vakwe lezvaku aya tlhangana navo le citsungeni. (Mat. 28:16) Laha makunu vona va nga tlhangene, zva koteka ku va mu rindzele hi manyawunyawu. Kuzvilava lego give gona khati a nga “woneka ka 500 wa vamakabye ni kuhundza hi khati gin’we.” (1 Kor. 15:6) Kasi Jesu i wa va vitanela yini ka mutlhangano lowo? I wa va vitanela ku ta va nyika ntiro wo tsakisa! I te: “Fambani mu va maha vapizani a vanhu va matiko wontlhe.” — Lera Matewu 28:18-20.

² Hi kufamba ka cikhati, a vapizani lavo va ngazwa magezu ya Jesu va wumbile bandla ga wuKristu ga zana ga malembe go sangula. A ntiro-tshinya wa bandla lego ku wa hi ku maha vapizani van’wani va Kristu. * Nyamutlha, ku na ni ma mabandla yo tala ya maKristu ya lisine misaveni; a ntiro-tshinya wa mabandla lawo wa hi walowo wa mun’we. Ka ndzima leyi, hi ta bhula hi mune wa zviwutiso, zvi nga lezvi: Hikuyini a ntiro wa ku maha vapizani wu nga wa lisima nguvhu? A ku maha vapizani zvi patsa yini? Xana a maKristu wontlhe ma tlhateka ciandla ntirweni wa ku maha vapizani? Niku hikuyini hi faneleko kuva ni lihlazva-mbilu ntirweni lowu?

3. Hi kuya hi Johani 14:6 ni 17:3, hikuyini a ku maha vapizani wu nga ntiro wa lisima nguvhu?

³ Hikuyini a ntiro wa ku maha vapizani wu nga wa lisima nguvhu? Hi ku a vapizani va Jesu hi vona voce zvi kotekako ku vava vanghana va Nungungulu. Ahandle ka lezvo, lava va landzelako Kristu va hanya wutomi ga gi nene zvezvi niku va rindzela ku hanya kala kupindzuka cikhatini ci tako. (Lera Johani 14:6; 17:3.) Hakunene, Jesu i hi nyikile ntiro wa lisima nguvhu, kanilezvi a hi wu mahi hi ntamu wa hina. Mupostoli Pawule i tsalile lezvi xungetano hi yena ni lava a nga tirisana navo; i te: “Hina hi zvitiri-kulobye na Nungungulu.” (1 Kor. 3:9) Hi nga wona lungelo legi Jehovha na Kristu va nyikileko vanhu vo kala ku mbhelela!

4. Hi gondza yini ka lezvi zvi nga mahekela Ivan na Matilde?

⁴ A ntiro wa ku maha vapizani wu nga hi nyika nguvhu litsako. Ehleketa hi cikombiso ca Ivan ni sati wakwe Matilde le Colômbia. Va chumayele jaha gaku hi Davier gi guma gi va byela lezvi: “Ndza zvi lava ku cica wutomini ga mina, kanilezvi a ndzi zvi koti.” Davier i walwa box, a dzaha timbangi, a dhakwa ku ku phu, niku i wa hanya ni cigango cakwe ca ku hi Erika. Ivan i tlhamusela lezvi: “Hi no sangula ku gondza naye a Bhibhiliya. Kota lezvi a nga tshama kule, hi wa fanele ku nyavela bhasikeni wa hina hi cikhati co leha, na hi famba hi lomu ka madhaka. Laha Erika a nga pola lezvaku Davier wa chukwatisa mahanyela ni matshamela yakwe, yenawu i no sangula ku gondza Bhibhiliya.” Hi kufamba ka cikhati, Davier i no tsika ku dzaha, ni kunwa ni kulwa box. I no chadha Erika hi nayo. Matilde i li: “Laha Davier na Erika va nga bhabhatiswa hi 2016, hi no alakanyisa Davier lezvi a nga tolovela ku wula, zvaku: ‘Ndza zvi lava ku cica, kanilezvi a ndzi zvi koti.’ A hi zvi kotangi ni ku ti khoma! Hi no rila hi kutsaka.” Handle ko kanakana, ha tsaka nguvhu loku hi vhuna vanhu lezvaku va maha vapizani va Kristu.

5. Hi gihi zambo go sangula ntirweni wa ku maha vapizani?

⁵ Hiba zambo go sangula ntirweni lowu wa ku maha vapizani hi ku famba hi ‘lavetela’ lava va lavako ku gondza hi Jehovha. (Mat. 10:11) Hi komba lezvaku hakunene hi Vakustumunyu va Jehovha hi ku nyika wukustumunyu ka vontlhe hi va kumako. Hi kombisa ku hi maKristu ya lisine hi ku chumayela, hi ingisa lezvi a nga hi ruma.

6. Cini ci to hi vhuna ku humelela ntirweni wa hina?

⁶ A vanhu vo kari va zvi dokolokela a ku gondza lisine la Bhibhiliya. Kanilezvi, a kutala ka lava hi va kumako va nga wonekisa ku khwatsi a va khatali kusanguleni. Zvi nga lava ku hi maha cokari kasi va zvi tsakela ku gondza. Kasi hi humelela ntirweni wa kuchumayela, hi fanele ku ti longisela khwatsi. Hlawula mhaka u wonako ku yi ta tsakelwa hi lava u to va kuma, u guma u alakanyela lezvi u to sangulisa zvona bhulo.

7. U nga sangulisa kuyini bhulo ni munhu, niku hikuyini zvi nga zva lisima a kuzwa mawonela yakwe u tlhela u kombisa cichavo hi wona?

⁷ Hi cikombiso, u nga ha wutisa n’winyi wa muti uku: “Ndzi ngazwa mawonela ya wena ka mhaka leyi? A vanhu misaveni yontlhe va kumana ni zvikarato lezvi hinawu hi kumanako nazvo nyamutlha. Makunu, loku kova ni mufumo wu fumelako misava yontlhe wu wa ta zvi kota ku lulamisa zvikarato lezvo ke?” Mu nga guma mu bhula hi Dhaniyeli 2:44. U nga ha sangula bhulo kambe ni munhu hi ku mu wutisa lezvi: “Hi mawonela ya wena, hi yihi ndlela ya ku wundla khwatsi a vanana?” Mu guma mu bhulisana hi Dhewuteronome 6:6, 7. Kani i  mhaka muni u to hlawula ku sangula hi yona bhulo, alakanyela lava u to va chumayela. Ehleketa hi lezvi va to vhunekisa zvona hi ku gondza lezvi a Bhibhiliya gi zvi gondzisako hakunene. A cikhati u bhulako navo, zva lisima a ku va ingisela u tlhela u kombisa cichavo hi mawonela yabye. Loku u maha lezvo, u ta va zwisisa khwatsi niku vonawu va ta zvi lava ku ku ingisela.

8. Hikuyini a ku maha tiendzo to wuyela zvi lavako ku sikizela?

⁸ A munhu na a nga se vhumela ku gondza Bhibhiliya na wena, zvi nga lava ku u ti karata u mu tlhelela hi makhati yo kari. Hikuyini? Hakuva hi nga tshuka hi nga mu kumi kaya ka khati ga wumbiri. Ahandle ka lezvo, zvi nga tshuka zvi lava ku u tlhela makhati yo hlaya kasi a n’winyi wa muti aza a hi tolovela a tlhela a tlhatlheka ku gondza. Alakanya lezvaku a sinya yi tala ku kula loku yi regariwa hi kuphindaphinda. Hi kufanana, zvi wonekisa ku a lirandzo la munhu loye hi Jehovha na Jesu, li ta kula loku hi bhulisana naye hi mahungu ya Nungungulu hi kukhandzakanya.

9-10. Hikuyini hi nga wulako ku a maKristu wontlhe ma patseka ntirweni wa ku lavetela vanhu va timbilu ti nene?

⁹ A maKristu wontlhe ma patseka ntirweni wa ku lavetela vanhu va timbilu ti nene. A ntiro lowu hi nga wu fananisa ni ku lavetela cin’wanana ci nga lahleka. Hi ndlela muni? Wona lezvi zvi nga humelela hi n’wanana wa 3 wa malembe a nga lahlekile. Ku no vitaniwa cipimo ca 500 wa vanhu kasi va ya mu lavetela. Loku ku hundzile 20 wa tihora a n’wanana loye na a lahlekile, i no ya thumbiwa lomu ka simu ga zvipfhaki hi mun’we wa lava va nga ti nyikela hi kuzvirandza kasi va lavetela. Kanilezvi a munhu loye, i no ala ku nyikwa wudzundzo hi lezvi ku nga yena a nga mu kuma. I te: “A n’wanana  loyi hi mu kumile hi lezvi hontlheni hi nga tirisana.”

¹⁰ A vanhu vo tala va fana ni n’wanana loye. Va tizwa na va lahlekile. A ci kona va ci rindzelako; vo ti hanyela basi. Kanilezvi va lava civhuno. (Efe. 2:12) Hontlheni va 8 wa timiliyoni ni kuhundza, hi lomu ko zama ku kuma a vanhu lavo va ti mbilu ti nene. Kuzvilava wena a wu mu kumi munhu a zvi lavako ku gondza Bhibhiliya. Hambulezvo, a vahuweleli van’wani u tirako navo cipandzeni caleci ca cin’we, va nga kuma munhu a to zvi lava ku gondza lisine la Mhaka ya Nungungulu. Loku a makabye wokari a kuma munhu a lavako kuva mupizani wa Kristu, hontlhe hi nga ntirweni lowu wa ku lavetela hi na ni cigelo ca ku tsaka.

11. Hambu loku u nga hi na cigondzo ca Bhibhiliya, u nga vhunetelisa kuyini ntirweni wa ku maha vapizani?

¹¹ Hambu loku u nga hi na cigondzo ca Bhibhiliya, u nga vhunetela ku maha vapizani hi tindlela tin’wani. Hi cikombiso, u nga hoyozela lava va tako Salawini ya Mufumo hi khati go sangula u tlhela u maha wunghana navo. Loku u va kombisa lirandzo hi ndlela leyo u nga va vhuna ku wona lezvaku hakunene hi maKristu ya lisine. (Joh. 13:34, 35) A mihlamulo ya wena, hambu loku yi hi yo koma, yi nga vhuna lava va vaswa lezvaku va tiva ku nyikela mihlamulo yo huma mbilwini hi ndlela ya cichavo. U nga pangalata a muhuweleli wa muswa ntirweni wo chumayela kambe u tlhela u mu vhuna ku tirisa Bhibhiliya loku a chumayela van’wani. Loku u maha lezvo, u mu gondzisa ku pimanyisa Kristu. — Luka 10:25-28.

12. Kasi hi gondzisa van’wani vava vapizani ku laveka wutlhari go hlawuleka ke? Tlhamusela.

¹² A nga kona a faneleko ku pimisa lezvaku kasi hi gondzisa van’wani vava vapizani va Jesu ku laveka wutlhari go hlawuleka. Hikuyini? Wona cikombiso ca Faustina, a hanyako le Bolívia. I wa nga zvi koti ku lera a cikhati a nga sangula ku tlhangana ni Vakustumunyu va Jehovha. Lezvi makunu i gondzile ku lera kutsongwani. Zvezvi i bhabhatisilwe, niku i zvi randza nguvhu a ku gondzisa van’wani a Bhibhiliya. I tolovela ku fambisa  5 wa zvigondzo vhiki ni vhiki. Hambu lezvi Faustina a kalako a nga se zvi kota ku lera khwatsi, a ku fana ni zvigondzani zvakwe zvo tala, i gondzisile 6 wa vanhu kala va bhabhatiswa. — Luka 10:21.

13. Makatekwa muni hi nga ti buzako hi wona ntirweni wa ku maha vapizani hambu loku hi khomekile nguvhu?

¹³ A maKristu yo tala ma na ni cikhati citsongwani nguvhu hakuva ma ni zvotala zvo zvi maha. Hambulezvo, ma ti xavela cikhati ma fambisa zvigondzo zva Bhibhiliya, niku ma kuma litsako la hombe hi ku maha lezvo. Wona cikombiso ca Melanie. Melanie i mamani a nga hi ni n’wana wa 8 wa malembe, loyi a nga kari a mu wundla yece le Alaska. I wa tira cikhati contlhe kambe a tlhela a hlayisa mupswali wakwe a nga babya hi cancro. Melanie i wa hi yena  yece Kustumunyu ka cidhoropana leco ci nga hi kule ni madhoropa man’wani. I wa tolovela ku khongela kasi a kuma ntamu wa ku huma a ya chumayela na ku titimela hakuva i wa zvi lava hi mbilu yontlhe a ku kuma munhu a xuvako ku gondza Bhibhiliya. Laha a ngaya a ti karata, i no guma a kuma Sara, loyi a nga tsaka zva ku ne hi ku tiva ku Nungungulu i na ni vito. Andzhako ka cikhati co kari, Sara i no vhumela ku gondza Bhibhiliya. Melanie i li: “Ni gambo ga Wazihlanu ndzi wa tolovela ku ngha ndzi karele nguvhu, kanilezvi mina ni nhanyana wa mina hi wa vhuneka hi kuya fambisa cigondzo leco. Hi wa ti buza nguvhu hi ku kambisisa mihlamulo ya zviwutiso zva Sara, niku hi wa xalala hi ku mu wona na ava munghana wa Jehovha.” Laha Sara a nga xanisiwa, i no guma a tiya aku nde, a tlhela a tsika chichi a nga hi ka yona, a guma a bhabhatiswa.

14. a) A ntiro wa ku maha vapizani wu fana ni lowu wa ku kukuta hi ndlela muni? b) A magezu ya Pawule ma nga ka 2 Timote 4:1, 2 ma ku khumbisa kuyini?

¹⁴ Hambu loku zvi ku khwatsi wo tira a ntiro wa cinghemani, u nga mbheli ntamu u ti byela ku u nga ta ha mu kuma munhu wa ku a nga maha mupizani wa Kristu. Alakanya ku Jesu i fananisile a ntiro wa ku maha vapizani ni lowu wa ku kukuta tinjhanjhi. A mukukuti a nga mbheta tihora to tala na a nga se phasa ne yin’we. A vakukuti va tolovela ku pilapila na va tira, kutani va ku phendzu va ya tira; ka zvikhati zvin’wani, va fanele ku famba pfhuka wo leha nguvhu. (Luka 5:5) Hi kufanana, a maKristu yo kari ma mbheta tihora to tala na ma “kukuta” hi lihlazva-mbilu hi zvikhati ni matshamu yo hambanahambana. Hikuyini? Kasi vaza va kuma vanhu. A kutala ka zvikhati, lava va ti karatako  nguvhu va guma va chachazelwa hi ku kuma vanhu va tsakelako mahungu ya hina. Wena ke, xana u nga zama ku chumayela hi cikhati leci zvi wonekisako ku u nga kuma vanhu? U nga va lavetela lomu zvi wonekisako ku u ta va kuma kona? — Lera 2 Timote 4:1, 2.

15. Hikuyini a ku gondzisa a Bhibhiliya munhu zvi lavako lihlazva-mbilu?

¹⁵ Hikuyini a ku fambisa zvigondzo zva Bhibhiliya zvi lavako lihlazva-mbilu? A cin’we ca zvigelo hi ku a hi faneli ku vhuna cigondzani lezvaku ci tiva lezvi a Bhibhiliya gi zvi gondzisa, ci zvi randza zvi nyima kwalaho. Hi fanele ku vhuna cigondzani lezvaku ci tiva Jehovha ci tlhela ci mu randza, loyi a nga tumbuluxa Bhibhiliya. Ahandle ka lezvo, hi fanele ku gondzisa munhu a tiva lezvi Jesu a zvi lavako ka vapizani vakwe, a tlhela a tiva lezvi a faneleko ku hanyisa zvona kota muKristu wa lisine. Hi fanele ku mu vhuna hi lihlazva-mbilu laha a wako a vhuka na a zama ku hanya hi matshinya ya milayo ya Bhibhiliya wutomini gakwe. A van’wani va zvi kota ku cica kupima kabye hi tihweti to kari; a van’wani va teka cikhati co leha.

16. U gondzile yini ka lezvi zvi nga humelela Raúl?

¹⁶ Ku ni tshango ga murumiwa wo kari le Peru gi kombako mabhindzu ya kuva ni lihlazva-mbilu. I tlhamusela lezvi: “Ndzi gondzile mabhuku mambiri ni cigondzani ca Bhibhiliya ca ku hi Raúl. Kanilezvi ci wa ha simama kuva ni zvikarato zva hombe wutomini ga cona. Yena ni sati wakwe va wa hi ni zvikarato wukatini gabye, i wa hi ni mawulawulela yo nyenyeza, niku i wa hi ni n’wana a nga kala a nga mu kombisi cichavo hi kota ya hanyela gakwe. Raúl i wata mitlhanganweni hi kukhandzakanya. Hikwalaho, ndzi no simama kuya kaya kakwe ni ku vhuna yena ni ngango wakwe. Andzhako ka 3 wa malembe ni ku hundza i no bhabhatiswa.”

17. Zvini hi to wulawula hi zvona ka ndzima yi landzelako?

¹⁷ Jesu i hi byelile lezvi: “Fambani mu . . . maha vapizani a vanhu va matiko wontlhe.” Kasi ku maha ntiro lowu, zvikhati zvo tala hi fanele ku bhula ni vanhu va kholwako zvilo zvo hambana nguvhu na hina, a ku patsa ni lava va ku a va lumbi ne wukhongeli gin’we, kutani lava va nga kholwiko ku Nungungulu i kona. Makunu, ka ndzima yi landzelako hi ta wulawula hi lezvi hi nga sangulisako zvona ku chumayela mahungu ya ma nene ka vanhu va tshamela lego.