A BHIBHILIYA gi tele hi magezu yo huma mbilwini ya vavanuna vo “fana na hina.” (Jak. 5:17) Hi cikombiso, zva vevuka ku zwisisa lezvi Pawule a nga wula ka Va le Roma 7:21-24, zvaku: “Loku ndzi xuva ku maha zva kululama, ndzi kokelwa ku maha lezvi zva kubiha. . . . A khombo ga mina vasan’wina!” Loku hi mbhela ntamu hi kota ya zvihoxo zva hina, zva chavelela a ku tiva lezvaku a munhu wo tsumbeka wo fana na Pawule i wa ti zwisa lezvo.

Pawule i wulile magezu man’wani yo huma mbilwini. Ka Va Le Galatiya 2:20, i wulile na a nga kanakani aku Jesu i mu ‘randzile aza a ti nyikela hi kota ya [yena].’ Wenawu u ti zwisa lezvo ke? Kuzvilava a hi cikhati contlhe u ti zwisako lezvo.

Loku ku hi lezvaku ha xaniseka hi ku tizwa na hi nga vhuni nchumu hi kota ya zviwonho hi zvi mahileko kale, zvikhati zvin’wani zvi nga hi karatela a ku kholwa lezvaku Jehovha wa hi randza niku i hi tsetselele; zvi tlhela zvi hi karatela ku wona hakhelo ya ku tlhatlhisa ya Jesu kota cinyikiwo ci yako ka mun’we ni mun’wani wa hina. Ku ngava lezvaku hakunene Jesu i lava ku hi yi wonisa lezvo a hakhelo yakwe ya kutlhatlhisa? Loku a zvi lavisa lezvo, cini ci nga hi vhunako ku yi wonisa lezvo? A hi wulawuleni hi zviwutiso lezvi zva zvimbiri.

A mhaka yo tiya hi ku Jesu i lava ku hi wona a hakhelo yakwe ya kutlhatlhisa kota cinyikiwo ci yako ka mun’we ni mun’wani wa hina. Lisine zvezvo? Ina. Ehleketa hi cimaho ci tsalilweko ka Luka 23:39--43. A wanuna wo kari i no hayekiwa mhandzeni ya hlomulo laha tlhelweni ga Jesu. I vhumela ku i wonhile. Zvi wonekisa ku a ciwonho cakwe ca hombe hakuva a zvigevenga zva nyalidede hi zvona zvi nga tolovela ku belelwa laha mhandzeni. Laha a nga kari a chachara hi kuzwa kubayisa, i no khongotela Jesu aku: “Ndzi alakanye a cikhati leci u to nghena Mufun’weni wa wena.”

Zvini a nga maha Jesu? Hi nga mu alakanyela laha a nga kari azwa ku bayisa, na a zama ku tlakusa nhamu a mu cuwuka. Hambu lezvi Jesu a ngazwa kubayisa ka hombe, i no ti karata a ku n’we, a tiyisa wanuna loye, aku: “Ndza tiyisa ka wena nyamutlha ndziku: U tava na mina Paradhiseni.” Phela loku Jesu i wa no zvi lava, na a no mu alakanyisa lezvi a nga sina a wulile a nyima kwalaho; zvaku: “A N’wana wa munhu . . . [i tele ku ta], nyikela wutomi gakwe kota hakhelo ya ku tlhatlhisa votala.” (Mat. 20:28) Kanilezvi a nga mahangi lezvo. U zvi wonile ku i kombile wanuna gayani hi ndlela ya yi nene lezvaku yena futsi i wa vhuneka hi hakhelo yakwe ya kutlhatlhisa? I wulawulile hi cinghana, hi ku tirisa magezu “u” ni “mina”. I tlhelile a komba wanuna loye lezvaku yena futsi i wa tava paradhiseni laha misaveni.

Handle ko kanakana, Jesu i wa lava ku a wanuna loye a wona hakhelo yakwe ya kutlhatlhisa kota cinyikiwo ca yena wutsumbu. Makunu, loku Jesu a ti zwisile lezvo hi cigevenga ca ku ne ci wa nga zangi civa ni cikhati ca ku tirela Nungungulu, a nga ta tizwa ku hundza laho hi muKristu a bhabhatisilweko, loyi a tirelako Nungungulu? Inaka, cini ci to vhuna a mun’we ni mun’wani wa hina a ku a kholwa ku hakunene a hakhelo ya kutlhatlhisa yi vhuna yena ke?

Pawule i wa zvi zwisisa ku Jesu i mu fele, hi lezvi a nga mu nyika ntiro wa kuchumayela. Hi ndlela muni? I tlhamusele lezvi: “Ndza mu bonga Kristu Jesu a Hosi ya hina, loyi a nga ndzi nyika ntamu, hakuva i wonile lezvaku ndzi tsumbekile, a se ndzi nyika ntiro hambu lezvi a kale ndzi nga hi murukateli, ni muxanisi, na ndzi nga hi na cichavo hi munhu.” (1 Tim. 1:12-14) A ntiro lowu Pawule a nga nyikiwa hi Jesu, wu wa mu tiyisekisa lezvaku Jesu i mu mahele wuxinji, a mu randza, a tlhela a mu tsumba. A mun’we ni mun’wani wa hina, Jesu i mu nyikile ntiro wa kuchumayela a mahungu ya ma nene. (Mat. 28:19, 20) Xana a ntiro lowu wu nga hi vhunawo ku zvi zwisisa ku Jesu i hi felewo ke?

Albert, loyi zvezvanyana a nga tlhelela ka Jehovha andzhako ka loku a susilwe bandleni hi cipimo ca 34 wa malembe, i tlhamusela lezvi: “A zviwonho zva mina ndzi tshama hi ku zvi alakanya. Kanilezvi loku ndzi hi kuchumayeleni, ndzi ti zwisa ku khwatsi hi Pawule, ndzi tizwa na ndzi nyikilwe ntiro wa kuchumayela hi Jesu. Lezvo zva ndzi tiyisa, ndzi nga ti woni na ndzi nga vhuni nchumu, ndzi tlhela ndzi rindzela zva zvi nene cikhatini ci tako.”— Lis. 51:3.

Allan, a nga hi cigevenga a tlhela ava nyazvibakela na a nga se gondza lisine, i li: “Ndza ha zvi alakanya zvontlhe a zvilo zva kubiha lezvi ndzi nga mahela vanhu. Zvikhati zvin’wani zvi ndzi maha ndzi karateka. Kanilezvi, ndza mu bonga Jehovha hi lezvi a vhumelako ku a mugohi wo fana na mina a chumayela mahungu ya ma nene ka van’wani. A cikhati ndzi wonako vanhu na va vhumela mahungu ya ma nene, zvi ndzi alakanyisa ku Jehovha mu nene nguvhu niku i na ni lirandzo. Ndza zvi wona ku o ndzi tirisa kasi ku vhuna van’wani va hanyako wutomi go fana ni legi ndzi nga gi hanya.”

A cikhati leci hi nga kuchumayeleni, hi maha zvilo zva zvi nene hi tlhela hiva ni mawonela ya nene hi hina. Zvi hi tiyisekisa lezvaku Jesu i na ni wuxinji, ni lirandzo niku wa hi tsumba.

Loku a tiko legi ga Sathani gi nga se lovisiwa, zva koteka ku a timbilu ta hina ti hi kona hi kota ya zviwonho hi zvi mahileko kale. Cini ci to hi vhuna a kulwa ni ku tizwa loko?

Jean, loyi a talako ku tizwa nandzu hi kota ya lezvi a nga hanya wutomi gi mbiri na a ha hi muswa, i li: “A zvo ku ndzi tsakisa a ku tiva lezvaku ‘Nungungulu wa hombe a ku hundza timbilu ta hina’”. (1 Joh. 3:19, 20) Hinawu hi nga chavelelwa hi ku tiva lezvaku Jehovha na Jesu va zvi zwisisa a ku a hi mbhelelangi. Alakanya kambe lezvaku va nyikele hakhelo ya kutlhatlhisa hi lirandzo kasi ku vhuna vawonhi lava va ti solako — na va nga lavi ku vhuna vanhu vo mbhelela. — 1 Tim. 1:15.

Loku u ehleketa hi lezvi Jesu a nga tirisanisa zvona ni vanhu vo kala ku mbhelela, ni loku u maha zvontlhe u zvi kotako ntirweni lowu a ku nyikileko, a mbilu ya wena yi ta tiyiseka lezvaku hakunene a hakhelo ya kutlhatlhisa ya Jesu yi vhuna wena. Hi ndlela leyo, wenawu u nga fana na Pawule, uku: Jesu i ‘ndzi randzile aza a ti nyikela hi kota ya mina.’