TSHINYA GA NAYO GA BIBLIA: “Mu nga karatekeli a kuhanya ka nwina.” — Mateu 6:25.

Zi wula yini lezo? Jesu i wulile magezu lawa ka Kanelo yakwe ya le Xitsungeni. Hi kuya hi disionario go kari ga Biblia, a gezu ga xiGreki gi hunzuluselweko ku “kukarateka” gi nga wula “kuxukuvala ka munhu hi ku chava wusiwana, ndlala, ni zikarato zinwani a kumanako nazo siku ni siku.” A kukarateka ku tolovela kuyelana ni kukaratekela za manziko. A zi bihangi a ku chela kota hi zilo za nyama ni kutshamiseka ka va ngango wa hina. (Va Le Filipi 2:20) Kanilezi, laha Jesu a ngaku: “Mu nga karateki,” i wa tlharihisa valanzeli vakwe lezaku va nga karatekeli zilo zi nga faneliko — ku nga kukarateka ko hunza mpimo ka ku chava za manziko loku ku nga susako litsako la ku hanya siku ginwe hi siku. — Mateu 6:31, 34.

Gi na ni xivuno masikwini ya hina? Za lisima a kuva hi ingisa a wusungukati ga Jesu. Hikuyini? A mabhuku yo kari ma wula lezaku loku a vanhu va karateka nguvu, a misiha yabye ya kuyelana ni kukwata yi tira nguvu niku lezo zi “vanga zidlayi, mababyi ya mbilu ni ya xifuva.”

Jesu i nyikile xigelo xa ntamu kasi ku potsa kukarateka ku nga lavekiko: A ku vuni. Jesu i lo wutisa aku: “Himani xikari ka nwina a zi kotako ku engetela xiyimo xakwe hi nkono munwe hi kukarateka ka mbilu yakwe ke?” (Mateu 6:27) A kukarateka a ku nge hi lehiseli wutomi ge hambu ku gi chukwatisa. Ahandle ka lezo, a kutala ka zilo hi zi chavako a zi maheki. A tlhari yo kari yi zi vekile hi ndlela leyi: “A kukarateka xungetano hi za manziko ku ti mbhetela xikhati, hakuva a wumanziko a gi toloveli ku bihisa lezi hi nga zi chavisa zona.”

Hi nga potsisa kuyini kukarateka? A xo ranga, tsumba Nungungulu. Loku ku hi lezaku Nungungulu wa phamela zinyanyani ni ku ambexa zitsangi, a nga ta mahawu zalezo ka vanhu lava va rangisako ku mu khozela wutomini gabye? (Mateu 6:25, 26, 28-30) Xa wumbiri, hanya khati ginwe hi siku. Jesu ite: “Mu nga karatekeli za manziko; hakuva manziko i ta karatekela a wutsumbu ga yena.” A wu kholwi lezaku “a siku ginwe ni ginwani gi na ni khombo gi ringanako gona?” — Mateu 6:34.

Loku hi ingisa wusungukati ga Jesu, hi ta potsa kutibayisa. A ku hunza lezo, hi tava ni kurula ka hombe — loku a Biblia gi ku wulako lezaku “kurula ka Nungungulu.” — Va Le Filipi 4:6, 7.