Xana wa vumelelana ni magezu lawa? A ku fana na Samantha hontlheni ha tshuka hi ringwa a kuva hi nga tsumbeki. Lezi hi zi mahako loku a kutsumbeka ka hina ku ringwa, zi ta kombisa lezaku hi zihi lezi hi zi nyikako lisima wutomini ga hina. Hi xikombiso, loku a ku ti lavela wudzunzo ku hi nchumu wa lisima ka hina, hi ku fanana, hi ta wona a kungatsumbeki kota xitiro xinwani xi to hi vuna ku tatisa makungo ya hina. Kanilezi, a xikhati lexi a lisine li poliwako, a kutala ka zikhati, a kungatsumbeki ku neha wuyelo gi nga tsakisiko. Wona lezi zi lanzelako.

A ku wulawula lisine zi aka kuzwanana. Loku a vanhu vambiri va tsumbana, zi maha lezaku va tizwa na va vikelwe ni kuhlayiseka. Kanilezi a kutsumbana loko a ku maheki hi siku ginwe. A vanhu va aka kutsumbana loku va mbheta xikhati xo kari na va hi zinwe, vava ni mabhulo ma nene ni ku tlhela va khatalelana. Hambulezo, a ku tsumbiwa ku nga onhiwa hi ximaho xinwe ntsena xa kungatsumbeki. Loku a kutsumbiwa ku hahlukile, zi nga karata nguvu a ku ku aketa.

Xana u tshukile u khohliswa hi wokari u nga alakanya lezaku munghana wa mu nene? Loku zi hi tano, u ti zwisile kuyini? Kuzilava zi ku bayisile nguvu. Hakunene lezo za zwisiseka. A zi kanakanisi lezaku a kungatsumbeki ku nga hohlota a xiseketelo xa wunghana ga hombe.

Ka xigonzo xo kari xi mahilweko hi Robert Innes, a nga mugonzisi wa za timali ka Universidade ya le Califórnia i kumile lezaku “a kungatsumbeki hakunene ka thapela.” Hikwalaho, ku nga fananiswa ni xitsongwa-tsongwani — loku u tolovela ku ti tlhanganisa ni munhu a ranzako ku kanganyisa, u ti veka mhangweni ya ku u “thapelwa” hi moya wa ku wenawu u kanganyisa.

U nga zi kotisa kuyini ku potsa ku wela tlhanwini wa kungatsumbeki? A Biblia gi nga ku vuna. Wona a matshinya yo kari ya Biblia.