Kuzilava wa ha zi alakanya lezi Gail a nga wula ka nzima yo kari yi hunzileko ka revista legi laha a ngaku i ta rivala a nuna wakwe, Rob hi kufa. Hambulezo, i rinzela ku tlhela a wona nuna wakwe misaveni yiswa leyi Nungungulu a yi tsumbisako. I wula lezi: “Nzi ranza nguvu a mutsalo wa Kuvululelwa 21:3 ni 4,” lowu wu wulako lezaku Nungungulu “i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.”

Gail i ngalo: “A xitsumbiso lexi xi wula zontlhe. Nzi va zwela nguvu wusiwana a vanhu va felweko hi vanhu va nga va ranza kanilezi na va nga zi tivi lezaku ku na ni xitsumbiso xa ku tlhela va va wona kambe.” Gail i kombisa kukholwa kakwe hi mitiro. I ti nyikela hi kuziranza lezaku a mbheta 70 wa tihora hweti ni hweti na a xumayela mahungu yo saseka, a byela vaakelane vakwe lezi Nungungulu a to maha ka masiku ma ha tako zaku: ‘Ku nga ta hava kona kufa.’

U nga ha wula lezi: ‘Himani a tshukileko a zi wona zezo?’ Kanilezi wona xikombiso xa Joba. I wa xanisiwa hi mababyi. (Joba 2:7) Hambu lezi Joba a nga navela kufa, i wa kholwa lezaku Nungungulu a nga zi kota ku tlhela a mu vuxa a hanya laha misaveni. Na a nga kanakani i lo wula lezi: “O, loku ku wo khwatsi wa nzi fihla le Xeoli [kutani xilahleni] . . . U ta vitana, mina nzi ku hlamula. U ta xuva a ntiro wa mandla ya wena.” (Joba 14:13, 15, NM) Joba i wa kholwa lezaku Nungungulu i ta mu xuva a lava ku tlhela a mu vuxa hi ka vafileko.

Lokuloku hi zalezo Nungungulu a to maha — ka Joba ni vanhu vanwani va tsanza-vahlayi — a xikhati lexi a misava leyi yi to ciciwa yi maha paradise. (Luka 23:42, 43) Ka Mitiro 24:15 a Biblia gi tiyisa mhaka leyo giku: “Ku tava kona a kuvuka ka valulamileko ni va nga lulamangiko.” Jesu i hi tiyisa aku: “Mu nga hlamali hi lexi, hakuva xikhati xa hata, laha vontlhe va nga le zilahleni va ta ngazwa a gezu gakwe, va huma.” (Johani 5:28, 29) Yenawu Joba i ta vuxiwa. I ta tlhela a maha jaha, niku a miri wakwe wu ta simama na wu hi “wuswa ku hunza wa xihlangi” kala kupinzuka. (Joba 33:24, 25) Lezo zi ta mahekela vontlhe va bongako a wunene ga Nungungulu ga ku lava ku vuxa vanhu hi ka vafileko va hanya laha misaveni.

Loku u tshukile u karateka hi ku felwa hi munhu u mu ranzako, kuzilava a mahungu lawa hi wulawulileko hi wona a ma ku suselangi a kukarateka ka wena kontlhe. Kanilezi loku u ehleketa hi lezi Nungungulu a zi tsumbisako lomu ka Biblia, u ngava ni kurinzela ko kari ni ku kuma ntamu wa ku simama u ti hanyela. — 1 Va Le Tesalonika 4:13.

Wa lava ku gonza zinwani xungetano hi ndlela yo yimisana ni kukarateka hi kota ya kufelwa? Kutani loku u ti wutisa a ku: “Hikuyini Nungungulu a tsikako wubihi ni kuxaniseka zi humelela?” Nghena ka saite ya hina ya, jw.org/tsc, u wona kuchavelela loku a Biblia gi ku nyikako ni mihlamulo ya gona yi vunako.