HLOKO YA MHAKA YA KAPA | U TA KUYINI LOKU U FELWA
Ndlela yo chavelela lava va felweko
Xana i kona a nga tshuka a felwa, u nga kumi ndlela yo mu vuna? Ka zikhati zinwani a hi xi kumi xo wula — ho miyela basi hi ku mu cu. Kanilezi ku na ni zilo zo kari zi vunako hi nga zi mahako.
A kutala ka zikhati lexi xi lavekako kuva kona basi, u wula zilo zo kota ku: “E, vasanwina! Ya hava!” U kombisa ku mu zwela wusiwana. Ka matshamu yo tala, a ku tlhateka woko ga wena ka loyi a felweko kutani ku mu khoma mandla zi tiya, zi kombisa kukhatala. Loku loyi a felweko a lava ku bhula, mu ingisele khwatsi. A ku hunza zontlhe lezo, maha xokari kasi ku vuna ngango lowo; kuzilava wu ngava ntiro a wu tsanzako ku maha loyi a nga felwa wo kota ku bhika, ku wonelela vanana kutani ku vunetela ku lulamisela a marilo loku va zi tsakela. Lezo zi nga vuna nguvu ku hunza magezu.
Hi kufamba ka xikhati, u nga ha navela ku wulawula xungetano hi loyi a fileko, kuzilava hi matshamela yakwe ya ma nene kutani zilo zo tsakisa a zi mahileko. A mabhulo lawo ma nga pepisa moya wa loyi a felweko hambu ku tlhela a hlekanyana. Hi xikombiso, Pam — ku hunzako 6 wa malembe na a felwe hi nuna wakwe, i wula lezi: “A vokari va tshuka va nzi byela zilo za zi nene zi mahilweko hi Ian zaku nzi wa nga zi tivi, niku a zo ku nzi tsakisa a xikhati va nzi byelako lezo.”
A titlhari ta ku hlola mahungu ti wula lezaku lava va felweko va tolovela ku vuniwa ka masikwanyana yalawo ya marilo, loku zi kala zi mbhela basi, munhu ni munhu o sangula ku tlhela a khomeka hi ku ti mahela zakwe. Hikwalaho, zama ku vuxela a munghana a felweko hi kukhanzakanya. * A vanhu vo tala va felweko va zi bonga nguvu lezo, hakuva za hungula kubayiseka kabye ku tekako xikhati xo leha.
Wona xikombiso xa Kaori. I nhanyana wa le Japão a nga mbhetiwa ntamu hi kufa ka mamani wakwe, loku ku nga lanzelwa hi kufa ka nhonzo yakwe ya wasati anzhako ka 15 wa tihweti. Lambi a vanghana vakwe vo tsumbeka va nga simama va mu vuna. A munwe wabye, a vitwako Ritsuko, i wa mu hunza nguvu Kaori hi malembe niku i lo ti hendleleta kasi ku maha munghana wakwe wa hombe. Kaori i wula lezi: “Kasi ku wula lisine, lezo a zi nzi tsakisangi ne ni kutsongwani. Nzi wa nga lavi munhu a teka xitshamu xa mamani, niku nzi wa nga alakanyi ku i kona a to zi kota. Hambulezo, lezi mamani Ritsuko a nga nzi mahela, zi hi mahile vanghana. Viki ni viki hi wa famba zinwe kuxumayeleni ni mitlhanganweni ya wuKristu. I wa tshuka a nzi vitana kasi ku ya kuma kopo ya caya, a nzi tela ni zakuga, a tlhela a nzi tsalela mapapilo hi makhati yo tala. A mawonela ma nene ya mamani Ritsuko ma khumbile nguvu a wutomi ga mina.”
Ku hunza 12 wa malembe a mamani wa Kaori na a file, niku nyamutlha, yena ni nuna wakwe vavangeli va xikhati xontlhe. Kaori i hlawuta lawa: “Mamani Ritsuko wa ha simama ku kombisa ku khatala hi mina. Loku nzi tlhela kaya nzi tshama hi ku mu vuxela, hi ti buza hi mabhulo ma akako.”
A munhu munwani a vunekileko hi ku seketelwa hi xikhati xo leha hi Poli, a nga Mboni ya Jehova yi tshamako le Chipre. Poli i wa hi ni nuna wa mu nene, Sozos, loyi a ngava xikombiso xi nene kota murisi wa muKristu. I wa maha lezo hi ku tolovela ku ramba vanhu va felweko hi vapswali ni tinoni kasi va ta hlakana ni kuga zinwe. (Jakobe 1:27) A ya hava hi lezaku laha Sozos a nga hi ni 53 wa malembe ku lo mila nchumu lomu ka wongo gakwe, afa. Poli i ngalo: “Nzi felwe hi nuna wa mina wo tsumbeka loyi nzi nga hanya naye a 33 wa malembe.”
Wona tindlela to kari u nga chavelelako hi tona munhu a felweko
Laha ku nga mbhela marilo, Poli i lo rura aya Canadá na Daniel, a jaha gakwe gi nga hi ni 15 wa malembe. Le Canadá, va lo hlengela zinwe ni bandla ga Timboni ta Jehova ta kwaseyo. Poli i wula lezi: “A vanghana va mina ka bandla ga giswa va wa nga tivi nchumu hi lezi zi nga hi mahekele kale ni xiyimo xa kona xo binza. Hambulezo, a va tsikangi ku simama va hi vuna ni ku hi chavelela. A zi no ku vuna, nguvunguvu ka xikhati lexiyani, laha a jaha ga mina gi nga mu vilela nguvu a papai wa gona! A madota laha bandleni ma lo kombisa kukhatala ka hombe hi Daniel. A munwe wabye i wa nga tshuki a rivala ku ramba Daniel lezaku va ya hlakana zinwe ni vanghana vanwani kutani kuya kubeleni ka bhola.” Nyamutlha lezi, Daniel ni mamani wakwe va ti hanyela.
Ku na ni tindlela to tala hi nga vunako hi tona lava va felweko ni ku va chavelela. A Biblia gonawu ga hi chavelela hi zilo zo tsakisa gi zi tsumbisako.
^ nzi. 6 A vokari va tsala siku ga mufi laha ka kalendari gabye lezaku gi va alakanyisa ku chavelela munghana wabye loku zi ta laveka nguvu — ka siku legi a felweko hi gona kutani ga laha kusuhani nago.
