1, 2. Hikuyini ku lavekako lezvaku hi wulawula hi ndlela ya ku chavelela lava va felweko? (Wona mufota laha hehla.)

SUSI, a nga felwa hi n’wana wakwe wa mufana, i te: “Hi mbhetile cipimo ca lembe na ha hazwa kubayisa ka hombe.” A makabye wo kari a nga felwa hi sati wakwe i wulile lezvaku i zwile “kubayisa ko kala ku nga tlhamuseleki.” Leci ci nga tsakisiko hi lezvaku va tele vanhu va kumanako ni kubayisa loko. Lomu bandleni ga wuKristu, a vamakabye vo tala va wa nga rindzeli ku felwa hi maxaka yabye na yi nga se chikela a Har–Magedhoni. Kuzvilava u felwe hi munhu u nga mu randza, kutani wa tiva munhu a nga felwa. Loku zvi hi tano, u nga ti wutisa ku, ‘A munhu a felweko a nga ku kuma kwihi kuchavelelwa?’

² A vokari va wula lezvaku a zvilondza zvontlhe zva hola hi kufamba ka cikhati. Kanilezvi, xana zvi tshamisa zvezvo ka zviyimo zvontlhe? A noni yo kari yi te: “Ndzi polile ku lezvi munhu a ci tirisisako zvona cikhati cakwe hi zvona zvi mu vhunako ku holisa mbilu yakwe.” A cilondza ca civiri ci lava cikhati ni ku hlayisiwa khwatsi kasi ci hola. Hi zvalezvo kambe ni cilondza ca mbilu, conawu ci lava cikhati ni ku  khatalelwa. Cini khwatsi khwatsi ci nga vhunako lava va felweko lezvaku va hungula a kubayisa loku va ku zwako?

3, 4. Cini ci hi tiyisako lezvaku Jehovha wa ku zwisisa a kubayisa loku hi ku zwako loku hi felwa?

³ A Papayi wa hina wo zwela wusiwana, Jehovha, hi yena muchaveleli wa hina wa hombe loku hi kari hi rila. (Gondza 2 Va Le Korinte 1:3, 4.) Hi yena a ku zwisisako khwatsi a kubayiseka ka hina a ku hundza vontlhe, niku i tsumbisa vanhu vakwe aku: ‘Hi mina wutsumbu ndzi mu chavelelako.’ — Isaya 51:12; Lisimu 119:50, 52, 76.

⁴ A Papayi wa hina wa lirandzo yenawu i felwe hi vanhu a nga va randza, vo kota malandza yakwe Abrahama, na Isaka, na Jakobe, na Mosi, na Hosi Dhavhidha. (Mitsengo 12:6-8; Mateu 22:31, 32; Mitiro 13:22) A Bhibhiliya gi komba lezvaku Jehovha i gi rindzela hi mahlo yo pswhuka a siku legi a to vhuxa vavanuna lavo vo tsumbeka. (Joba 14:14, 15) Ka cikhati leco, va tava ni litsako va tlhela va hanya khwatsi. Jehovha i felwe hi N’wana wakwe wa matewula kambe. A Bhibhiliya gi komba lezvaku Jesu i N’wana loyi Nungungulu a “xaleleko khwatsi ha yena.” (Mateu 3:17) Zvi karata ni ku ku alakanyela a kubayisa loku Jehovha a ku zwileko laha a nga wona N’wana wakwe na afa hi ndlela yo bayisa nguvhu. — Johani 5:20; 10:17.

5, 6. Jehovha i hi chavelelisa kuyini?

⁵ Ha tiyiseka hi kumbhelela lezvaku Jehovha i ta hi vhuna. Hikwalaho contlhe cikhati hi tlhatlhekile ku khongela ka yena, hi mu tlhatlhela kontlhe a kubayisa loku hi ku zwako. A zvo ku hi chavelela a ku tiva lezvaku Jehovha wa ku zwisisa a kurila ka hina a tlhela a hi nyika kuchavelelwa loku hi ku lavako! Kanilezvi i zvi mahisa kuyini?

⁶ A yin’we ya tindlela leti Jehovha a hi chavelelako hi tona ku hi nyika moya wakwe wa ku basa. (Mitiro 9:31) Jesu i tsumbisile lezvaku a Papayi wa hina i wa ta va nyika moya wakwe wa ntamu vontlhe lava va nga wa ta mu kombela. (Luka 11:13) Susi, a nga kumbukiwa kusanguleni, i ngalo: “Kuve ni makhati yo tala lawa hi nga khizama hi kombela Jehovha lezvaku a hi chavelela. Khati ni khati, a kurula ka Nungungulu ku wa hlayisa a timbilu ta hina ni maalakanyo hina.” — Gondza Va Le Filipi 4:6, 7.

7, 8. Hikuyini hi nga tiyisekako lezvaku Jesu i ta hi chavelela?

⁷ A cikhati leci a nga hi laha misaveni, Jesu i pimanyisile khwatsi a matshamela yo saseka ya Papayi wakwe ka lezvi a nga wula ni lezvi a nga maha. (Johani 5:19)  Jehovha i rumele Jesu misaveni kasi ku ta chavelela “lava va nga ni timbilu ti tshovekileko” ni “vontlhe lava va rilako.” (Isaya 61:1, 2; Luka 4:17-21) A vanhu va wa zvi tiva lezvaku Jesu wa ku zwisisa a kuxaniseka kabye niku wa zvi lava nguvhu ku va vhuna. — Maheberu 2:17.

⁸ Na a ha hi mutsongwani, kuzvilava Jesu i felwe hi vanghana ni maxaka. Hi cikombiso, zvi wonekisa ku khwatsi Josefa, a papayi wakwe wo mu wundla, i file na Jesu a ha kula. * (Wona tlhamuselo wa lahasi.) Hi nga alakanyela a kubindza ka ciyimo leco, laha a mufana loyi wo khatala nguvhu a nga timisela a kubayiseka kakwe, zvin’we ni kurila ka mamani wakwe ni ka vamakabye vakwe.

9. Jesu i kombisile kuyini lezvaku wa zwisisa a kurila ka van’wani a cikhati leci Lazaru a ngafa?

⁹ Ndzeni ka malembe yakwe ya ntiro wa kuchumayela, Jesu i kombile lezvaku i wa zvi zwisisa zvikarato zva vanhu a tlhela a rila navo. Hi cikombiso, a cikhati leci a munghana wakwe Lazaru a ngafa, Jesu i ku zwile a kubayisa ka hombe loku Mariya na Marta va nga kuzwa. I va zwele nguvhu laha ka kuza a sangula ku rila, hambu lezvi a nga zvi tiva ku i ta mu vhuxa. — Johani 11:33-36.

10. Cini ci hi tiyisako lezvaku Jesu wa ku zwisisa a kurila ka hina nyamutlha?

¹⁰ A magezu lawa Jesu a nga chavelela hi wona vanhu cikhatini ci hundzileko ma nga hi chavelelisa kuyini nyamutlha? A Bhibhiliya gi komba khwatsi lezvaku Jesu a nga cicangi. Gi ngalo: ‘Jesu Kristu hi yaloyi wa tolo ni nyamutlha ni ku kala kupindzuka.’ (Maheberu 13:8) I vitaniwa lezvaku i “Hosi ya wutomi” hakuva i hi vhululele ndlela ya ku kuma wutomi ga pindzukelwa. Jesu wa ku tiva a kubayisa ka ku felwa kambe niku ‘wa zvi kota ku vhunetela lava va ringiwako.’ (Mitiro 3:15; Maheberu 2:10, 18) Hikwalaho hi nga tiyiseka lezvaku Jesu wa ha khumbeka ni nyamutlha loku a van’wani vazwa kubayisa. Wa ku zwisisa a kurila kabye, niku wa zvi kota ku va chavelela hi cikhati ci faneleko. — Gondza Maheberu 4:15, 16.

11. Mitsalo muni yi ku chavelelako nguvhu?

¹¹ A matimu lawa ma wulawulako hi lezvi Jesu a nga bayisekisa zvona a cikhati leci Lazaru a ngafa cipandze cin’we ntsena ndzeni ka mitsalo yo tala yo chavelela yi nga kona lomu ka Mhaka ya Nungungulu. Lezvo a zvi hi hlamalisi hakuva a ‘timhaka tontlhe ti nga tsaliwa kale ti tsalelwe a ku gondzisa hina, lezvaku kasi hi fela kuva ni kutsumba hi kota ya kutiya ni kuchavelelwa loku ku nyikwako hi Mitsalo.’ (Va Le Roma 15:4) Loku u felwe, wenawu u nga kuma kuchavelelwa ku tangalisako ka mitsalo yo kota leyi yi landzelako:

• ‘Jehovha i kusuhi ni lava va tshovekileko timbilu; a hanyisa lava va nga ni moya wu pandzekileko.’ — Lisimu 34:18, 19.

• ‘Laha ndzi nga karateka mbilwini, wena Jehovha u tangalisile a muhefemulo wa mina.’ — Lisimu 94:19.

• ‘A Hosi ya hina Jesu Kristu, ni Nungungulu a Dhadhani wa hina, loyi a hi randzileko, ni ku hi nyika a kutangaliswa ka pindzukelwa, ni kutsumba ko saseka hi tipswalo takwe, a tangalise timbilu ta n’wina, a mu tiyisa.’ — 2 Va Le Tesalonika 2:16, 17. * — Wona tlhamuselo wa lahasi.

12. Hi nga chavelelisa kuyini van’wani?

¹² A vanhu va felweko va nga kuma kuchavelelwa kambe lomu bandleni ga wuKristu. (Gondza 1 Va Le Tesalonika 5:11.) Zvini u nga mahako kasi ku tiyisa ni ku chavelela lava va nga ni “moya wu tshovekileko” ke? (Mavingu 17:22) Alakanya lezvaku ku na ni ‘cikhati ca ku miyela, ni cikhati ca ku wulawula.’ (Mutshawuteli 3:7) A noni yo kari ya ku hi Dalene yi tlhamusela lezvaku lava va felweko va lava ku ti tlhatlha cifuva. Hikwalaho, a ca lisima nguvhu ca ku u nga ci maha ku ingisela na u nga va tsemarisi. Junia, a felweko hi makabye wakwe a nga ti sunga, i ngalo: “Hambu loku u nga ku zwisisi khwatsi a kukarateka kabye, a ca lisima hi ku wa zvi lava ku zwisisa lezvi va ti zwisako zvona.”

13. Zvini hi faneleko ku zvi alakanya xungetano hi kurila ka munhu loku a felwe?

¹³ Hi fanele ku alakanya lezvaku hina vanhu hi hambene. Munhu ni munhu i na ni rilela gakwe niku a hi hontlheni hi zvi kotako ku wula lezvi hi ti zwisako zvona. A zvikhati zvin’wani a kubayiseka loko ku mbhelela mbilwini. A Bhibhiliya gi ngalo: ‘A mbilu ya tiva kubayiseka ka yona; ni mun’wani a nga ti enghenisi litsakweni la yona.’ (Mavingu 14:10) Hambu loku a munhu a wula lezvi a ti zwisako zvona, a hi cikhati contlhe zvi olovako ku a van’wani va zvi zwisisa lezvi a zamako ku wula.

14. Zvini hi nga wulako kasi ku chavelela lava va felweko?

¹⁴ Zvi nga tshuka zvi karata ku tiva co wula loku u bhula ni munhu a felweko. Kanilezvi a Bhibhiliya gi wula lezvaku “a lirimi la a tlharihileko mbutomi.” (Mavingu 12:18) A vanhu vo tala va kumile magezu yo chavelela hi wona van’wani lomu ka broxura Loku U Felwa Hi A Ranzekako Wa Wena. * (Wona tlhamuselo wa lahasi.) Kanilezvi a kutala ka zvikhati, leci ci vhunako nguvhu ka zvontlhe ku “rila ni lava va rilako.” (Va Le Roma 12:15) Gaby, a nga felwa hi nuna wakwe, i wula lezvaku a zvikhati zvin’wani a ndlela a yi kumako ya ku kombisa hi yona lezvi a ti zwisako zvona  ku rila basi. I engeta aku: “Hi cigelo leco, zva ndzi chavelela loku a vanghana va rila na mina. Ka cikhati leco, a ndzi ti woni na ndzi hi ndzoce hlomulweni wa mina.”

15. Hi nga chavelelisa kuyini van’wani loku zvi hi karatela ku maha lezvo hi nghohe ni nghohe? (Wona ni kwadru “ Magezu yo chavelela.”)

¹⁵ Loku zvi ku karatela ku kuma co wula kasi ku chavelela munhu, kuzvilava zvi nga ku olovela ku rumela cipapilwana, e-mail, kutani mesaji. A ku lavi zvo tala; u nga tshaha mutsalo wu chavelelako, ku kumbuka tshamela go kari ga gi nene u gi alakanyako ka munhu loyi a fileko, kutani ku wulawula hi nchumu wo tsakisa a wu mahileko kutani mu nga maha zvin’we. Junia i ngalo: “A ku amukela mahungu yo koma yo tiyisa hlana kutani ku rambiwa lezvaku ndzi yava zvin’we ni muKristu-kulori zva ndzi vhuna nguvhu. Lezvo zvi ndzi maha ndzi ti wona na ndzi randziwa ni ku khatalelwa.”

16. Hi yihi a ndlela ya ntamu ya ku chavelela van’wani?

¹⁶ A mikhongelo ya hina yi nga va vhuna vamakabye va hina va rilako. Hi nga va khongelela kutani ku khongela navo. Lisine ku zvi nga tshuka zvi ku karatela ku maha lezvo hi ku chava ku tshuka u sangula ku rila, kanilezvi a mukhongelo wa wena wu humako mbilwini wu ngava ni ntamu wa hombe wa ku chavelela. Dalene i wula lezvi: “A zvikhati zvin’wani loku a vamakabye vata kasi ku ta ndzi chavelela, ndzi va wutisa ku va tlhatlheka ku maha mukhongelo ke. A kutala ka zvikhati va sangula ku khongela na zvi va karatela ku wulawula. Kanilezvi khati ni khati, andzhako ka magezwana mangani, a  gezu gabye gi sangula ku tiya va maha mukhongelo wu khumbako nguvhu mbilu. A kukholwa kabye, ni lirandzo labye, ni kukhatala kabye zva tiyisa nguvhu a kukholwa ka mina.”

17-19. Hikuyini hi faneleko ku simama hi chavelela lava va rilako?

¹⁷ A zvi koteki ku tiva lezvaku a munhu i ta mbheta cikhati muni na a ha rila. Loku a munhu a ha hi ku felwa, kuta vanghana vo tala ni maxaka kasi ku ta mu chavelela. Kanilezvi andzhako ka loku va ti tlhelele ka mitiro yabye ya siku ni siku, lava va felweko va ha zvi lava ku chavelelwa. Hikwalaho tshama na u longile ku va vhuna. A Bhibhiliya gi ngalo: ‘A lirandzo la munghana la su tsoma contlhe cikhati, ni nakulobye i pswalelwe ku vunetela kuxanisekeni.’ (Mavingu 17:17) Hi fanele ku simama hi chavelela lava va rilako kala a timbilu tabye ti hola. — Gondza 1 Va Le Tesalonika 3:7.

¹⁸ Alakanya lezvaku a hlomulo wa ku felwa wu nga tshuka wu wuya maalakanyweni ya munhu ni ka cihi cikhati. Lezvo zvi nga ha humelela hi kota ya kuchikela ka siku legi va nga chadha hi gona kutani legi a nga felwa hi gona, kuzwa muzika wo kari, ku wona mufota, hambu kuzwa masema kutani pfumawulo wo kari, ni ku chikela ka nguva yo kari ya lembe. A cikhati leci a munhu a felweko hi nuna kutani sati a mahako nchumu na a hi yece hi khati go sangula, ku ngava kuya mutlhanganweni wa cipandze kutani Cialakanyisweni, ku nga ha wuya maalakanyo yo bayisa nguvhu. A makabye wo kari i ngalo: “Ndzi wa zvi rindzele ku loku ku chikela a siku legi hi nga chadha hi gona zvi ndzi bindzela nguvhu, niku a zvi olovangi. Kanilezvi a vamakabye vo kari va longisele mubuzwanyana ni vanghana va mina kasi ndzi ngavi ndzoce ka siku lego.”

¹⁹ Alakanya lezvaku lava va felweko a va lavi ku tiyisiwa ka zvimaho zvo hlawuleka ntsena. Junia i tlhamusela lezvi: “A kutala ka zvikhati, a ku vhuniwa ni ku pangalatiwa hi cikhati co kala gi nga hi siku ga ku tlhanganisa malembe ya cimaho co kari zva vhuna nguvhu. A civhuno leco co kala u nga ci rindzelangi ci neha kuchavelelwa ka hombe.” Lisine ku a hi nge va suseli contlhe ciwundza kutani kubayisa loku va ku zwako, kanilezvi hi nga va chavelela hi ku maha navo mitiro yo kari. (1 Johani 3:18) Gaby i ngalo: “Ndzi mu bonga nguvhu Jehovha hi madhota ya lirandzo lawa ma ndzi khometeleko ka cikhati cin’we ni cin’wani co nonoha. Ma ndzi mahile ndzi ti wona na ndzi hi mandleni ya lirandzo ya Jehovha.”

20. Hikuyini a zvitsumbiso zva Jehovha zvi hi chavelelako nguvhu?

²⁰ Zva chavelela a ku tiva lezvaku Jehovha, a Nungungulu wa kuchavelela kontlhe, i ta susa hlomulo wontlhe wa ku felwa a cikhati leci a to vhuxa vafileko. (Johani 5:28, 29) Nungungulu i tsumbisa lezvaku ‘i ta fuvisa kufa kala kupindzuka; niku Hosi Nungungulu i ta hlangula mihloti tinghoheni tontlhe.’ (Isaya 25:8) Ka cikhati leco, wutshan’wini ga ku “rila ni lava va rilako,” a vanhu vontlhe laha misaveni va to ‘tsaka zvin’we ni lava va tsakako.’ — Va Le Roma 12:15.