“A KU fambe xibhomba, kanilezi a mufana loyi wa muChina a sale!” A magezu lawo ma zwilwe hi Alexandra a nga hi kwalomo ka xibhomba lexo, na rinzela ku tsemakanya matiko mambiri ya Amerika wa le Dzongeni. I lo huma kasi ku wona ku zini zi nga humelela. I lo kuma a mufana wa muChina na a zama ku tlhamusela mhaka yakwe hi xiPanyoli ka phoyisa gi nga tira laha fronteira. A mufana loye i wo ti luma-luma hakuva i wa nga xi tivi. Kota lezi Alexandra a nga tshukile ava ka bandla ga xiChina ga Timboni ta Jehova, i lo ti hendleleta kasi ku hunzulusela xiChina xakwe xiya ka xiPanyoli.

A jaha lego gi lo wula lezaku gi wa hanya lomo hi nayo, kanilezi gi wa no yivelwa mapasi ni mali. Kusanguleni a phoyisa lego a gi kholwangi, niku gi zile gi alakanyela lezaku Alexandra i wa xavisa vanhu. Hi ku gumesa, i lo zwisisa lezi zi nga tlhamuselwa hi jaha lego, kanilezi gi wa fanele ku hakhela multa hi kota ya lezi gi nga kala gi nga hi na mapasi ya lisine. Kota lezi gi nga kala gi nga hi na mali, Alexandra i lo gi lomba mali ya 20 wa madolari (hi mametikali yi kwalomo ka 1500). A jaha lego gi no mu tsumbisa lezaku gi wa ta mu hakhela mali yo hunza 20 dolari kota ndlela yo bonga. Alexandra i gi byelile lezaku i wa nga rinzeli mubongo; zi wa mu tsakisa ku nyika hakuva i wa zi wona na zi hi zi nene a ku maha lezo. I no mu nyika mabhuku yo kari ma seketelweko lomu ka Biblia a tlhela a mu kuca lezaku a gonza Biblia ni Timboni ta Jehova.

Za tsakisa nguvu a kuzwa matshango ya vanhu va mahileko wuhana ka vanhu va kalako va nga va tivi, niku a zilo zo khwatsi hi lezo za mahiwa hi vanhu va tichechi tontlhe ni vanhu va kalako va nga khongeli. U tshuka u nyika nchumu ka munwani kasi ku mu vuna na wu nga lavi ku wuyelwa? Lexo xiwutiso xa xi nene hakuva Jesu i te: “Ku katekile ku nyika ku hunza ku nyikiwa.” (Mitiro 20:35) A titlhari ta siensia tonawu ta seketela mhaka leyo hakuva ti wula lezaku a ku nyika zi vuna loyi a nyikako. A hi woneni ku hi tindlela muni.

A mibiko yi komba lezaku a kunyika ni ku tsaka zi famba zinwe. Mupostoli Paule i tsalile lezi: “Nungungulu wa ranza loyi a nyikako na a xalele.” I wa wulawula hi maKristu lawa ma nga maha minyikelo kasi ku vuna makholwa-kulobye lawa ma nga hi zikaratweni. (2 Va Le Korinte 8:4; 9:7) Paule i lo zi veka kubaseni lezaku a vamakabye lavo va wa tsaka hi lezi va nga zi kota ku nyika ni ku vuna vanwani.

Hi kuya hi kambisiso wo kari, a kunyika “ku maha lezaku a zipanze zo kari za lomu ka wongo ga hina zi yelanako ni kutsaka, ni ku tirisana ni vanwani, ni ku maha zilo kasi ku vuna vanwani zi tira khwatsi, niku a xikhati lexi hi mahako lezo hi kuma kuxalala ka hombe.” Ka kambisiso wunwani, ku kumilwe lezaku “a vanhu lava va nyikeleko mali ka vanwani, va tsakile nguvu ku hunza loku va yi tirisela zabye.”

Xana u tshuka u alakanya ku a wu nge zi koti ku nyika hi lezi u nga xisiwana? A lisine hi lezaku hontlheni hi nga li kuma litsako la kuva ‘vanyiki vo xalala.’ Hambu loku zova zitsongwani,  kanilezi loku u nyikela hi mbilu ya wena za amukeleka nguvu. A Mboni yo kari ya Jehova yi rumele magezu yo kari ka vahumesi va revista legi zinwe ni munyikelo wo kari. Yi te: “Ka malembe wontlhe lawa nzo kota ku nyikela mali yi tsongwani ntsena Salawini ya Mufumo. Hambulezo, Jehova Nungungulu wa nzi nyika zo hunza lezi nzi nyikelako. . . . Nza bonga nguvu a lulamiselo legi ga ku nzi zi kota ku nyika, za nzi tiyisa nguvu.”

A kunyika a ku gumelwi laha ka mali, ku na ni tindlela tinwani to tala ta ku nyika.

A Biblia gi wula lezi: “A munhu wa wuxinji i maha zinene ka muhefemulo wakwe.” (Mavingu 11:17) A vanhu va va nene va ranza ku nyika; va tirisa xikhati xabye, ntamu wabye, ni zinwani kasi ku vuna vanwani. A kuhana loko ku va vuna hi tindlela to tala, niku a xa lisima nguvu hi lezaku zi va maha vava ni wutomi ga gi nene.

A mikambisiso yi komba lezaku lava va ranzako ku vuna vanwani a va na zibabyababyani niku va karateka kutsongwani. Hi lisine, va na ni wutomi ga gi nene. A ku ranza ku nyika za vuna hambu ni vanhu va nga ni mababyi yo kala ma nga hunzi yo fana ni esclerose múltipla kutani mababyi ma vangako Sida (HIV) lezaku ma chukwata. Niku ku kumiwa lezaku a vanhu va nga lomu ko zama ku tsika kunwa byala, na va ranza ku vuna vanwani va karateka kutsongwani va tlhela vava ni ntamu wa ku gi tsikela magumo.

Hi kota ya lezo, ku nyikiwa mawonela ya lezaku “a ku zwela wusiwana vanwani, ni ku maha za zi nene ka vanwani zi maha ku u nga toloveli ku karateka.” A kunyika ka tlhela ku hungula kukarateka ni kutsutsuma ka nkhata. Niku a vanhu va felweko hi nuna kutani sati a kukarateka kabye ku hatlisa ku kalamuka loku va ti nyikela kasi ku vuna vanwani.

A zi kanakanisi lezaku loku u nyika, hi wena u tlhelako u vuneka.

Jesu i khongotele valanzeli vakwe, aku: “Nyikani, ku ta nyikiwa ka nwina; va ta mu nyika xifuveni xa nwina a xiringaniso xi nene, xi kanyetelweko, lexi xi kuhlungelweko xi halakela. Hakuva hi lipimo [leli] mu pimelako vanwani ha lona, mu ta pimelwawu ha lona.” (Luka 6:38) Loku u ranza ku nyika, a vanhu vanwani va ta ku wona kuhana ka wena ni ku ku bonga, va tlhela va hanawo. A kuhana ku wumba wunghana ni ku tirisana.

A vakambisisi vo kari va gonzako a kutirisana ka vanhu va kumile lezaku a “vanhu va tshamako hi ku ti karatela ku vuna vanwani va kuca vanwani lezaku va mahawo zalezo.” Hi “ku lera ntsena a mahungu ma wulawulako hi vokari va maheleko vanwani a wunene, zi maha vanhu va engetela ku hana.” Hikwalaho, hi kuya hi xigonzo xo kari: “A munhu munwe ni munwani a nga maha vanhu vo tala nguvu vaku ne a nga va tivi hambu ku tshuka a kumana navo lezaku va mu pimanyisa.” Hi magezu manwani, a wuhana gitsongwani ga munhu munwe gi nga thapela munwani laha ka kuza zi eneta vanhu va xipanze xo kari. A wu nge zi tsakeli ku hanya ka xipanze xo khwatsi hi lexo? Ku wa tava ni mabhinzu yo tala nguvu loku a vanhu vo tala va wo hana.

A tshango ginwani gi kombako lisima la ku nyika gita hi le Flórida, Estados Unidos. Anzhako ka xingulu xi nga maheka, a ntlawa  wo kari wa Timboni ta Jehova wu lo ti hendleleta kasi ku vuna lava va nga hi mhangweni leyo. Na ti kari ti rinzela materiali ti nga ma lava kasi ku longisa yindlu leyi ti nga hi ka yona, ti lo wona kintali wa muakelani wu nga hohlokile, ti se wu lungisa. Anzhako ka xikhati, a muakelani loye i lo tsala papilo giya ka tsinza ga misava yontlhe ga Timboni ta Jehova, aku: “Nzi ta mu bonga kala kufeni. A nzi se wona vanhu va va nene vo fana na nwina wutomini ga mina.” A kuhana loko ku kucile muakelani loye lezaku a maha munyikelo kasi wu tirisiwa ka lezi a nga zi vitana ku i ntiro wo hlawuleka wu mahiwako hi Timboni.

A titlhari ta siensia ti kumile lezaku “a vanhu va na ni kunavela ka mabeleko ka ku lava ku vuna vanwani.” A kambisiso wo kari wu wula lezaku a vanana “va kombisa kukhatala hi vanwani a ku hunza vona wutsumbu hambu loku va nga se sangula ku wulawula.” Hikuyini? A Biblia gi nyika hlamulo hi ku wula lezaku a vanhu va mahilwe hi ‘mufananiso wa Nungungulu,’ zi wulako ku, va na ni matshamela yo fana ni lawa ya Nungungulu. — Genesisi 1:27.

Xikari ka matshamela yo hlamalisa lawa Jehova Nungungulu a Muvangi wa hina a nga nawo, ku na ni wuhana. I hi nyikile wutomi ni zontlhe hi zi lavako kasi hi hanya na hi tsakile. (Mitiro 14:17; 17:26-28) Hi nga mu tiva khwatsi a Papai wa hina wa le tilweni ni liranzo leli a hi kombisako lona hi ku gonza a Mhaka yakwe, a Biblia. A Biblia gi wula kambe lezaku Nungungulu i vululile ndlela kasi hi kuma litsako xikhatini xi tako. * (1 Johani 4:9, 10) Kota lezi a kuhana kontlhe ku sukelako ka Jehova Nungungulu ni lezi u nga mahiwa hi mufananiso wakwe, a zi faneli ku ku hlamalisa lezi a kunyika zi nga zi nene ka wena niku zi ku maha u amukeleka kakwe. Niku a xikhati u nyikako wo mu pimanyisa. — Maheberu 13:16.

Wa ha mu alakanya Alexandra a kumbukilweko kusanguleni ka nzima leyi? Give gihi wuyelo ga kuhana kakwe? Hambu lezi a vaenzi-kulobye va nga mu byela lezaku i hoxile mali yakwe mahala, a mufana gayani wa muChina a nga vunilwe hi Alexandra i lo fonela vanghana vakwe lezaku va nyima laha yena na Alexandra va nga lava ku chika kona. Laha va nga chikela va no mu nyika a mali liyani ya 20 wa madolari kasi a nyika Alexandra. A xinwani kambe i sangulile ku gonza Biblia. Alexandra i tsakile nguvu a xikhati va nga tlhela va kumana anzhako ka tihweti tinharu ka gotsovanyano wa muganga wa Timboni ta Jehova hi lirimi la xiChina le Perú. Kasi ku kombisa kubonga kakwe hi zontlhe lezi Alexandra a nga mu mahele, i lo ramba vontlhe va ngata zinwe na Alexandra ka gotsovanyano lowo lezaku va yaga ka Restaurante yakwe.

A kunyika ni ku vuna vanwani zi tisa litsako la hombe nguvu. A ku hunza lezo u nga vuna vanhu votala lezaku va tiva Munyiki wa zilo zontlhe za zi nene — Jehova Nungungulu! (Jakobe 1:17) Wa kuma litsako hi ku vuna vanwani lezaku va tiva Nungungulu?