A XINYIKIWO xa hombe xi fanele ku hi kuca ku bonga. Jesu i khanyisile a mhaka leyo anzhako ka ku hanyisa khume ga vavanuna va nga hi ni mababyi ya hombe ma nga kala ma nga hi na muri ka xikhati lexo. A munwe wa vavanuna lavo va khume “i lo tlhela a wuya, na a dumisa Nungungulu hi gezu ga hombe.” Jesu i te ngalo: “Xana a va basiswangi hi wukhume gabye ke? Lava va ntlhanu ni mune va kwihi ke?” (Luka 17:12-17) Hi gonza yini laha? Zi olova nguvu a ku hatlisa hi rivala a wunene hi mahelwako hi vanwani!

A nzhiho xinyikiwo xi hunzako zontlhe. Xi hunza zontlhe hi tshukileko hi nyikiwa. Makunu u ta maha yini hi kota ya lezi Nungungulu a ku maheleko?

• Tiva Munyiki. A nzhiho a wo halahala wu neha wutomi ga pinzukelwa ka vanhu vontlhe. A kuhambana ni lezo Jesu i wulile lezi ka Nungungulu hi mukhongelo: “A wutomi ga pinzukelwa hi kuva va ku tiva, wena Nungungulu wece wa zinene, na Jesu Kristu loyi u mu rumileko.” (Johani 17:3) Loku a munhu wo kari i wo ku byela ku a wanuna  wo kari i ponisile a wutomi ga wena a xikhati u nga hi nwanana, u wa nga ta lava ku mu tiva khwatsi ni lezi a nga ku ponisisa zona? Jehova Nungungulu, loyi a nga hi nyika a nzhiho ku nga xinyikiwo xi ponisako wutomi, i lava ku u mu tiva khwatsi ni lezaku u maha wunghana naye. A Biblia gi hi kuca lezi: “Tshinelani ka Nungungulu, na yena i ta tshinela ka nwina.” — Jakobe 4:8.

• Kombisa ku kholwa ka nzhiho. “Loyi a kholwako ka N’wana i na ni wutomi ga pinzukelwa.” (Johani 3:36) Zi wula yini a kuva ni kukholwa? Zi kombiwa hi mitiro; kasi ku kombisa ku kholwa ka nzhiho zi lava ku zi kombisa hi mitiro. (Jakobe 2:17) Mitiro ya tshamela muni? A xinyikiwo xi maha xa wena anzhako ka kuva u nawulutile a woko u xi amukela. Hikwalaho zi lava ku nawuluta woko u amukela nzhiho. U nga zi mahisa kuyini? Gonza u tiva lezi Nungungulu a lavako ku u hanyisa zona, u guma u hanya hi zona. * Kombela ku tsetselelwa hi Nungungulu ni kuva ni livalo li basileko. Tshinela ka Nungungulu na u tiyiseka hi kumbhelela lezaku loku u kholwa ka nzhiho u ta kuma wumanziko ga pinzukelwa gi nga ni kurula, ni kuvikelwa ni kutshamiseka! — Maheberu 11:1.

• Kumeka Xialakanyisweni xa kufa ka Jesu. Jesu i yimisile a ximaho xa lembe ni lembe kasi ku hi alakanyisa a xinyikiwo xa nzhiho. Xungetano hi ku alakanya a ximaho lexo, Jesu i te: “Mahani lezo, mu nzi alakanya ha zona.” (Luka 22:19) A Timboni ta Jehova ti ta alakanya a kufa ka Jesu hi Wazibili, 11 ka Abril wa 2017, anzhako ka kupela ka gambo. A ximaho lexo, xi mbhetako kwalomo ka hora yinwe, xi ta patsa kanelo yi to tlhamusela a kufa ka Jesu ni lezi ku hi vunisako zona zezi ni lezi ku to hi vunisa zona xikhatini xi tako. A lembe gi nga hunza, ku vile ni xipimo xa 20 wa timiliyoni ta vanhu va ngava kona ka Xialakanyiso xa kufa ka Jesu misaveni yontlhe. Ha ku ramba lezaku hi ta kombisa zinwe a ku bonga a xinyikiwo lexi xa Nungungulu xa hombe ku hunza zontlhe.