A zinyikiwo zinwani zi maha za lisima hi kuva hi nyikilwe hi munhu wa xikhundla xa hombe kutani hi munhu wo dzunzeka nguvu ka hina. A zinwani hambu loku zi nga durangi ha zi nyika lisima hi kuva hi nyikilwe hi xaka kutani munghana wa hina wa hombe. Zive tano ka xinyikiwo lexi Jordan a nyikilweko hi Russell, xi kumbukilweko ka nzima yo sangula. Zi yelanisa kuyini lezo ni xinyikiwo xa nzhiho?

A xo ranga, a Biblia gi wula lezaku “Nungungulu i rumele a N’wana wakwe a belekilweko yece ata laha misaveni, kasi hina hi fela ku hanya ha yena.” (1 Johani 4:9) Lezo zi maha ku a xinyikiwo lexo xiva xa lisima nguvu. A ku na wa hombe ku hunza Nungungulu. Na a wulawula hi Yena, a muyimbeleli wa tisimu wa muHeberu i tsalile lezi: “Hi wena wece u nga ni vito ga Jehova, Loyi a Hunzeleleko Kutlakuka misaveni yontlhe.” (Lisimu 83:18) Wa hombe ku hunza vontlhe va nga hi nyikako zilo.

A xa wumbiri, Nungungulu i ‘papai wa hina.’ (Isaya 63:16) Hi ndlela muni? I hi nyikile wutomi. Ahandle ka lezo, i tlhela a hi hlayisa khwatsi a ku fana ni papai a hlayisako a vana vakwe hi mbilu yontlhe. Na a wulawula hi vanhu vakwe va xikhatini xi hunzileko vo kota Efraime, Nungungulu i wutisile lezi: “Xana Efraime [a] hi nwananga a ranzekako ke? . . . A marumbu ya mina ma divitana hi kota ya yena, futsi, nzi ta mu hawukela.” (Jeremia 31:20) Ni nyamutlha kambe wa hi ni maalakanyo yalawo hi vakhozeli vakwe. Muvangi wa hina wa hombe tlhelo Papai wo tsumbeka ni Munghana wa hina. Xana lezo a zi mahi ku zontlhe zinyikiwo zi tako hi kakwe ziva za lisima nguvu?

A zinyikiwo zinwani za lisima hi lezi hi nyikilweko hi liranzo na ku nga hi xikurumeta. Loyi a nyikako hi kuziranza a nga rinzeli ku tlheliselwa.

Nungungulu i hi nyikile a N’wana wakwe hi lezi a hi ranzako. A Biblia gi wula lezi: “A ku hi ranza ka Nungungulu ku wonekelisilwe hi lezi, Nungungulu i rumele a N’wana wakwe a belekilweko yece.” Kasi ku kuyini? “Kasi hina hi fela ku hanya ha yena.” (1 Johani 4:9) Xana Nungungulu i mahile lezo hi ku kurumetwa? A ku kala ni ku vala! A “kutirulwa loku ku nga ka Kristu Jesu” xikombiso xa “tipswalo” ta Nungungulu. — Va Le Roma 3:24.

Hikuyini a xinyikiwo xa Nungungulu xi nga xa “tipswalo”? A Biblia gi tlhamusela lezi: “Nungungulu wa kombisa a kuhiranza kakwe hi lexi, lezaku na ha hi vaonhi Kristu i lo hi fela.” (Va Le Roma 5:8) A liranzo li kucile Nungungulu lezaku a vuna vanhu va vaonhi va nga kala va nga zi koti ku ti tlhatlhisa. Hi wa nga ringanelwi hi liranzo lelo, niku a hi nge zi koti ku hakhela. A xinyikiwo xakwe xikombiso xa hombe xa liranzo matinwini wontlhe ya vanhu.

A zinyikiwo zinwani zi maha za lisima hi kutikarata ku wonekako ka loyi a hi nyikileko. Loku a munhu wo kari a hi avela nchumu wakwe wa lisima hi kuziranza, ha wu nyika nguvu lisima a nchumu lowo hi kota ya kutikarata kakwe.

Nungungulu i lo “nyikela a N’wana wakwe a belekilweko yece.” (Johani 3:16) Ku wa nga hi na munwani wo ranzeka ku hunza N’wana wakwe. Hi malembe yo tala lawa Nungungulu a nga kari a vanga zilo, i wa tira na Jesu loyi a nga kari a “mu tsakisa siku ni siku.” (Mavingu 8:30) Jesu i “N’wana wakwe a ranzekileko” ni “xifananiso xa Nungungulu loyi a nga woniwiko.” (Va Le Kolosi 1:13-15) A ku seva ni vanhu vo ranzana ku khwatsi hi lezi Jehova na Jesu va nga ranzanisa zona!

Hambulezo, Nungungulu ‘a nga alangi ni N’wana wakwe.’ (Va Le Roma 8:32) Jehova i hi nyikile a zilo zakwe za lisima nguvu. A xinyikiwo lexi xi mu durele ku hunza zontlhe.

A zinyikiwo zinwani za lisima hi lezi zi kumiwako hi xikhati zi lavekako nguvu. Hi xikombiso, u wa ta kuyini loku u wo khomiwa hi mababyi ma yisako kufeni na u nga hi na mali yo ringana ku tiriwa, zonake a wokari aku i ta ku hakhelela zontlhe zi to laveka kasi ku tira mababyi lawo? U wa ta mu wonisa kuyini a munhu loye? U wa ta mu bonga nguvu hi lezo.

“Khwatsi hi lezi vontlhe va fako hi ka Adamu, hizalezo kambe hi ka Kristu vontlhe va ta mahiwa va hanya.” (1 Va Le Korinte 15:22) Kota vana va Adamu, hontlheni ‘hafa,’ a hi zi koti ku huluka ka mababyi ni kufa kutani ku maha kurula ha hoce na Nungungulu kasi hi ngave ni nanzu naye. Niku kota vanhu va nyalidede, a hi nge zi koti ku ti hanyisa ha hoce kutani ku maha munwani a “hanya.” A Biblia gi komba mhaka leyi: “A munhu a nga zi koti ku tirula a nakulobye, hambu ku mu humesela nzhiho ka Nungungulu . . . a nga zi koti ku mahelwa kona hambu ni siku ginwe.” (Lisimu 49:7, 8) Hi lava ku vuniwa hakuva a hi na makotela yo hakhela nzhiho ha hoce. Ahandle ka lezo, hi wa tafa.

Hi kota ya liranzo lakwe la hombe, Jehova i hakhele lezi zi nga laveka ka “mababyi” ya hina, kasi “vontlhe va ta mahiwa va hanya” hi ku tirisa Jesu. A nzhiho wu zi mahisa kuyini lezo? A “nkhata wa  Jesu a N’wana wakwe wa hi hlaza zionho zontlhe.” A kukholwa ka nkhata wa Jesu zi vulula ndlela ya lezaku hi tsetselelwa zionho za hina ni ku kuma wutomi ga pinzukelwa. (1 Johani 1:7; 5:13) Kanilezi ahati maxaka ya hina ma fileko ke, ina wonawu ma ta vuniwa hi nzhiho? “Kota lezi a kufa ku ngata hi munhu, lezo kambe a kuvuka ka vafileko ku tile hi munhu [Jesu].” — 1 Va Le Korinte 15:21. *

A ku na xinyikiwo xinwani xi nyikilweko hi munhu wo tlakuka kutani xi nyikilweko hi liranzo a ku hunza xa muphahlo wa Jesu. A ku na munhu munwani a hi nyikileko zilo za lisima ku hunza lezi Jehova Nungungulu a hi nyikileko. Niku a ku na xinyikiwo xi vunako nguvu a ku hunza lexi xi hi tlhatlhisako ka xionho ni kufa. A ku na xinyikiwo xi nga ringaniswako ni xinyikiwo xi nga tlhamuselekiko xa nzhiho.