JORDAN i na ni afiadhori yo khwatsi i ngalava niku yi wonekisa ku khwatsi a hi ya lisima. Kanilezi, ka yena hi yona tshomba ya lisima a ku hunza tontlhe. Jordan i tlhamusela lezi: “Nzi nyikilwe afiadhori leyi hi [tio] Russell a nga hi munghana wa hombe wa laha kaya na nza ha hi nwanana.” A xikhati lexi Russell a ngafa, Jordan i no tiva lezaku i wa vunile nguvu a kokwani wakwe ni vapswali vakwe, a tlhela a va tiyisa ka zikhati za zikarato. Jordan i wula lezi: “Lezi nzi tivileko zotala hi Russell, a xinyikiwo lexi xa xitsongwani xi maha xa lisima nguvu ka mina.”

Kota lezi a tshango ga Jordan gi kombako, a xinyikiwo xo kari xi nga tshuka xi wonekisa ku khwatsi a hi xa lisima ka vanwani. Kanilezi ka loyi a nyikilweko a tlhela a xi tsakela, xi ngava xa lisima nguvu. A Biblia gi tlhamusela a xinyikiwo xa lisima nguvu hi magezu lawa yo tiveka nguvu, yaku: “Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa.” — Johani 3:16.

Loyi a amukelako a xinyikiwo lexo a nga kuma wutomi ga pinzukelwa! Xi kona xinyikiwo xinwani xa lisima ku hunza lexo? Hambu lezi a vanwani va kalako va nga li woni lisima la xona, a maKristu ya lisine ma xi wona kota xa “lisima” nguvu. (Lisimu 49:8; 1 Pedro 1:18, 19) Kanilezi, hikuyini Nungungulu a nga nyikela a wutomi ga N’wana wakwe kota xinyikiwo misaveni?

Mupostoli Paule i tlhamusela xigelo xa kona hi magezu lawa: “Hi kota ya munhu munwe, ni kufa ku tile hi kota ya kuonha; hizalezo a kufa ku lo thapela vanhu vontlhe.” (Va Le Roma 5:12) A munhu wo sangula Adamu, i tsikile ku ingisa Nungungulu ha womu a se konelwa kufa. Hi kota ya Adamu, a kufa ku lo thapela a vana vakwe vontlhe — ku nga vanhu vontlhe va nga misaveni.

 “A hakhelo ya kuonha hi kufa, kanilezi a xinyikiwo xa Nungungulu hi wutomi ga pinzukelwa ha Jesu Kristu a Hosi ya hina.” (Va Le Roma 6:23) Kasi ku tlhatlhisa vanhu ka nanzu wa kufa, Nungungulu i rumele a N’wana wakwe Jesu Kristu ata misaveni a ta nyikela wutomi gakwe go mbhelela kota muphahlo. Hi kota ya muphahlo lowo, wu tiviwako kota nzhiho, vontlhe va kholwako ka Jesu va ta kuma wutomi ga pinzukelwa. — Va Le Roma 3:24.

Xungetano hi makatekwa wontlhe lawa Nungungulu a nyikako vakhozeli vakwe hi ku tirisa Jesu Kristu, Paule i wula lezi: “A ku bongiwe Nungungulu hi kota ya xinyikiwo xakwe lexi xi nga wulekiko.” (2 Va Le Korinte 9:15) A xinyikiwo lexo xa nzhiho xa hombe nguvu laha ka kuza xi nga tlhamuseleki. Hikuyini xi hunzako zontlhe zinyikiwo za Nungungulu? Xi hambana ni zinyikiwo zinwani za Nungungulu hi ndlela muni? * U ta xi amukela kutani u ta xi ala? Hi ku kuca ku lera mihlamulo ya Biblia ya ziwutiso lezi ka tinzima timbiri ti lanzelako.