Himani a vito ga Nungungulu? Yena n’winyi Nungungulu i li: Hi mina ‘Jehovha, hi gona vito ga mina lego.’ (Isaya 42:8) A vito ga Nungungulu gi kumeka cipimo ca 7000 wa makhati lomu ka Bhibhiliya. Hambulezvo, lomu ka maBhibhiliya yo tala ku mahilwe zvilo zvi nga kala zvi nga faneli ku mahiwa, ku vhaletilwe vito ga Nungungulu hi zvikhundla zvo kota ku “Hosi”. Nungungulu i lava lezvaku uva munghana wakwe. Hikwalaho i ku kuca lezvaku u “khongela hi vito gakwe”. — 1 Kronekele 16:8.

Zvikhundla zva Jehovha. A Bhibhiliya ga tirisa a zvikhundla zvo kota ku “Nungungulu”, “Nyamintamu”, “Muvangi”, “Papayi”, “Hosi” niku “Hosi ya Hombe” kasi ku wula Jehovha. Ku na ni mikhongelo yo tala yi tsalilweko lomu ka Bhibhiliya leyi a vanhu va yi mahileko na va tirisa a zvikhundla zvi kombako cichavo va tlhela va tirisa vito Jehovha. — Danieli 9:4.

 I tshamisile kuyini Nungungulu? Nungungulu i moya. (Johani 4:24) A Bhibhiliya gi wula lezvaku “i hava a tshukileko a wona Nungungulu”. (Johani 1:18) A Bhibhiliya gi tlhela gi komba a kutizwa kakwe. A vanhu va nga mu zangarisa kutani ku mu ‘tsakisa’. — Mavingu 11:20; Tisimu 78:40, 41.

Matshamela yo hlamalisa ya Nungungulu. Nungungulu a nga na cihlawulela. I randza vanhu va tixaka tontlhe ni va midhawuko yontlhe. (Mitiro 10:34, 35) Nungungulu kambe i na ni ‘wuxinji ni tipswalo, wa nonokako ku zangara, i tele hi wuxinji ni kutsumbeka’. (Eksodusi 34:6, 7) Hambulezvo, ku na ni mune wa matshamela yakwe yo tsakisa nguvhu.

Ntamu. Kota lezvi a nga “Nungungulu wa Ntamu wontlhe”, i na ni ntamu wo kala wu nga gumelwi wa ku maha ni cihi leci a ci tsumbisako. — Genesisi 17:1.

Wutlhari. A wutlhari ga Nungungulu gi hundza a wutlhari ga vanhu vontlhe. Hi cigelo leco, a Bhibhiliya gi wula lezvaku hi “yena yece a tlharihileko”. — Va Le Roma 16:27.

Kululama. Nungungulu contlhe cikhati i maha zva kululama. A mitiro yakwe yi “mbhelele” niku a nga tshuki a “kukanganyisa”. — Deuteronome 32:4.

Lirandzo. A Bhibhiliya gi wula lezvaku “Nungungulu lirandzo”. (1 Johani 4:8) A hi ku khwatsi Nungungulu o kombisa lirandzo basi, kanilezvi ova lirandzo. Zvontlhe a zvi mahako i kuciwa hi lirandzo lakwe la hombe, niku a lirandzo lelo la hi vhuna hi tindlela to tala.

Wunghana ga Nungungulu ni vanhu. Nungungulu i Papayi wa hina wa lirandzo. (Matewu 6:9) Loku hi kholwa kakwe hi ngava vanghana vakwe. (Tisimu 25:14) Nungungulu wa ku ramba lezvaku u tshinela kakwe hi mukhongelo u tlhela u mu byela ‘a kukarateka ka wena kontlhe . . . hakuva wa ku khatalela’. — 1 Pedro 5:7; Jakobe 4:8.

Jesu a hi Nungungulu. Jesu i vangilwe hi Nungungulu niku a zvi na hloko a ku alakanya lezvaku wa fana na Nungungulu. Kanilezvi a ciyimo cakwe ci hambene ni ca van’wani hakuva hi yena yece a vangilweko hi Jehovha hi ku kongoma. Hi zvalezvo zvi mahako ku a Bhibhiliya gi mu vitana ku i N’wana wa Nungungulu. (Johani 1:14) Andzhako ka loku a vangile Jesu, Jehovha i tirisile a N’wana loye wa matewula kota meseri wa “mitiro” yakwe kasi ku vanga zvilo zvontlhe, a ku patsa na hina. — Mavingu 8:30, 31; Va Le Kolosi 1:15, 16.

 Jesu Kristu a nga tshukangi a ti wula ku i Nungungulu. Wutshan’wini ga lezvo, i tlhamusele lezvi: “Ndzita hi ka [Nungungulu], hi Yena a nga ndzi ruma.” (Johani 7:29) A cikhati leci a nga bhula ni mun’we wa vapizani vakwe, Jesu i wulile lezvaku Jehovha i “Papayi wa mina tlhelo Papayi wa n’wina” ni “Nungungulu wa mina tlhelo Nungungulu wa n’wina”. (Johani 20:17) Andzhako ka loku Jesu a file, Jehovha i mu vhuxile kasi aya hanya tilweni a tlhela a mu nyika wuhosi ga hombe reveni gakwe ga cinene. — Matewu 28:18; Mitiro 2:32, 33.

Jesu Kristu a nga ku vhuna kuva munghana wa Nungungulu

Jesu i tile misaveni kasi ku ta hi gondzisa lisine xungetano hi Papayi wakwe. Jehovha wutsumbu i wulile lezvi xungetano hi Jesu: “Loyi hi yena N’wana wa mina ndzi mu randzako. Mu ingiseni.” (Marku 9:7) Jesu hi yena a mu tivako khwatsi Nungungulu a ku hundza vanhu vontlhe. I wulile lezvi: “A ku na munhu a mu tivako N’wana lezvaku himani saseka Papayi. Ne a nga kona a mu tivako Papayi lezvaku himani saseka N’wana, ni lava a N’wana a xuvako ku va gondzisa hi Papayi wakwe.” — Luka 10:22.

Jesu i kombisile a matshamela ya Nungungulu hi kumbhelela. Jesu i ma pimanyisile khwatsi a matshamela ya Papayi wakwe laha ka kuza a wula lezvi: “Loyi a wonileko mina i wonile na Papayi.” (Johani 14:9) Jesu i vhunile vanhu lezvaku vava vanghana va Nungungulu hi lezvi a nga pimanyisa a lirandzo la Papayi wakwe hi magezu ni lezvi a nga zvi maha. I te ngalo: “Mina ndzi ndlela, ni lisine, ni wutomi. A ku na munhu a tako ka Papayi na a ngati hi laha ka mina.” (Johani 14:6) A tlhela aku: ‘A vakhozeli va lisine va ta khozela Papayi hi moya ni lisine, hakuva Papayi i hlota vanhu lavo lezvaku va mu khozela.’ (Johani 4:23) Hi nga zvi alakanyela! Jehovha wa lavetela vanhu vo fana na wena, lava va xuvako ku tiva lisine xungetano hi yena.