Lisine xungetano hi zvilo zva cikhati ci tako
U tshuka u ti wutisa ku zvini zvi to maheka cikhatini ci tako? A Bhibhiliya gi hi byela lezvaku zvezvanyana ku ta maheka a zvilo zva lisima nguvhu lezvi zvi to khumba a vanhu vontlhe.
Jesu i tlhamusele lezvi hi nga wa ta zvi tivisa zvona lezvaku a “Mufumo wa Nungungulu wu tshinele”. (Luka 21:31) Cikari ka zvilo zvotala zvi to maheka, i phrofetile lezvaku ku wa tava ni tiyimpi, ni kutsekatseka ka hombe ka misava, ni tindlala ni mitungu; ku nga zvilo hi zvi wonako nyamutlha. — Luka 21:10-17.
A Bhibhiliya gi komba kambe lezvaku a cin’we ca zvilo zvi nga wa ta tivekisa a ‘masiku yo gumesa’ ya mafumela ya vanhu hi lezvi a vanhu va nga wa ta hanyisa zvona. U nga lera a mahanyela lawo ka 2 Timote 3:1-5. Loku u wona a matshamela lawo ni mahanyela lawo, a zvi kanakanisi ku wa vhumela lezvaku a ciphrofeto leci ca Bhibhiliya ci komba lezvi hakunene zvi mahekako nyamutlha.
Zvi komba yini lezvo? Zvi komba lezvaku a cikhati ca ku a Mufumo wa Nungungulu wu cica wutomi laha misaveni giva ga gi nene ci tshinele. (Luka 21:36) Lomu ka Bhibhiliya, Nungungulu i tsumbisa a zvilo zva zvi nene laha misaveni ni ka vanhu lava va to hanya ka yona. Wona zvikombiso zvo kari:
MUFUMO WA WU NENE
Jesu ‘i no nyikiwa kufuma, ni wuhosi, ni mufumo, kasi a va matiko wontlhe ni tixaka ni tirimi va fela ku mu tirela. A kufuma kakwe ka simasima, ku nga ta hundza, ni mufumo wakwe cima wu nga ta mbhetiswa’. — DANIELI 7:14.
Lezvo zvi wula ku: U nga ti buza hi wutomi na u fumiwa hi mufumo wa hombe nguvhu misaveni yontlhe lowu Nungungulu a yimisileko N’wana wakwe kota Hosi ya wona.
WUTOMI GA GI NENE
‘A ku na muaki ni mun’we a ta ngaku: Ndza babya!’ — ISAYA 33:24.
Lezvo zvi wula ku: U nga ta ha tshuka u babya; u ta hanya kala kupindzuka.
KURULA KA LISINE
“Yena i maha a tiyimpi ti khawula kala magumelweni ya misava.” — TISIMU 46:9.
Lezvo zvi wula ku: Ku nga ta hava ni tiyimpi hambu ni tixanisa leti ti vangiwako hi tiyimpi.
A MISAVA YI TA TALA HI VANHU VA VA NENE
‘A wakubiha a nga ta kuva kona . . . kanilezvi lava va rulako va taga tshomba ya tiko.’ — TISIMU 37:10, 11.
Lezvo zvi wula ku: Ku nga ta hava ni vanhu vakubiha, ntsena lava va lavako ku ingisa Nungungulu.
A MISAVA YONTLHE YI TAVA PARADHISE
‘Loku va aka tiyindlu va ta tshama ka tona, ni loku va byala zvivhina va taga mihandzu ya zvona.’ — ISAYA 65:21, 22.
Lezvo zvi wula ku: A misava yontlhe yi tava yo saseka. Nungungulu i ta hlamula mukhongelo wa hina wa lezvaku a kurandza kakwe ku mahiwa “misaveni”. — Matewu 6:10.