• Hlawuliwa hi Nungungulu. ‘Hi mina ndzi vekileko a hosi ya mina . . . Ndzi ta ku nyika a matiko a kuva tshomba ya wena, ni magemeta-musi ya misava ma ta lumba wena.’ — Lisimu 2:6, 8.

• Ciga-tshomba ca Hosi Dhavhidha. ‘Hakuva hi pswalelwe n’wana, hi nyikilwe a nisanyana. . . . A kufuma kakwe ku ta endzeleka, ni kurula ku nga ta kuva na magumo a hehla ka citshamu ca wuhosi ca Dhavhidha ni mufumo wakwe kasi ku wu tiyisa ni ku wu seketela.’ — Isaya 9:6, 7.

• Pswaliwa Bhetlehema. ‘Wena Bhetlehema . . . , ku ta huma hi ka wena ata ka mina loyi a ta ngava hosi . . . i tava wa hombe kala magemeta-musi ya misava.’ — Mika 5:2, 4.

• Aliwa hi vanhu yi tlhela yi dawa. ‘I no nyenyiwa kota loyi vanhu va mu fihlelako tinghohe tabye, a hi mu hlayangi nchumu. . . . A citsayiso leci ci hi nyikako kurula ci no wela hehla kakwe, zvonake hi hanyiswa hi tirimbiri takwe.’ — Isaya 53:3, 5.

• Vhuxiwa hi ka vafileko yi tlhela yi dzundziwa. ‘Hakuva u nga ta tsika a muhefemulo wa mina le Xeole [Cilahla]; ne hambu ku tsika a wakubasa wa wena a wona kubola. . . . Ni canjeni ga wena ga cinene ku tele hi kuxalala kala kupindzuka.’ — Lisimu 16:10, 11.

A matin’wini wontlhe ya vanhu, munhu mun’we basi a ringanelwako khwatsi hi mitlhamuselo leyi niku a munhu loye hi Jesu Kristu. A ngilozi yo kari yi byelile Mariya, a mamani wa Jesu, yiku: “Nungungulu i ta mu nyika citshamu ca wuhosi ca Dhavhidha a papayi wakwe, . . . a Mufumo wakwe wu nga ta gumesa.” — Luka 1:31-33.

Jesu a nga tshukangi ava hosi laha misaveni. Kanilezvi, i ta fumela vanhu na a hi tilweni kota Hosi ya Mufumo wa Nungungulu. Zvini zvi mu mahako ava Hosi ya yi nene? Wona lezvi a nga maha a cikhati a nga hi laha misaveni.

•   Jesu i wa khatala hi vanhu. I vhunile vavanuna ni vavasati, vanana ni vahombe, na a nga cuwuke lomu va tako hi kona ni matshamela yabye. (Matewu 9:36; Marku 10:16) A cikhati leci a wanuna wa hlokonho a nga mu khongotela aku: “Loku u zvi lava ndzi hanyise”, Jesu i no mu zwela wusiwana a mu hanyisa. — Marku 1:40-42.

• Jesu i hi gondzisile lezvi hi nga mu tsakisisako zvona Nungungulu. I te: “A mu nge zvi koti ku tirela Nungungulu ni Titshomba.” I tlhelile a ku hi fanele ku khoma van’wani hi ndlela leyi hi lavako ku vona va hi khoma hi yona. I kombile kambe lezvaku Nungungulu a nga khatali basi hi lezvi hi mahako kanilezvi wa khatala kambe hi lezvi hi zvi alakanyako ni lezvi hi ti zwisako zvona. Hikwalaho, kasi hi tsakisa Jehovha hi fanele ku wonelela lezvi hi ti zwisako zvona lomu timbilwini ta hina. (Matewu 5:28; 6:24; 7:12) Jesu i khanyisile lezvaku kasi hi kuma litsako la lisine hi fanele ku tiva lezvi Nungungulu a zvi lavako hi tlhela hi zvi maha. — Luka 11:28.

• Jesu i gondzisile ku zvi wula yini a ku randza van’wani. A magezu ya Jesu ni lezvi a zvi mahileko zvi wa hi ni ntamu ni ku zvi khumbile a timbilu ta lava va nga mu ingisela. ‘A zvidlemo zvi no hlamala hi kugondzisa kakwe hakuva i no va gondzisa kota [loyi] a nga ni ntamu.’ (Matewu 7:28, 29) I va gondzisile lezvi: ‘Randzani valala va n’wina.’ I khongelele hambu hi lava va nga hi ni nandzu wa kufa kakwe aku: “Papayi, va tsetselele, hakuva a va zvi tivi lezvi va mahako.” — Matewu 5:44; Luka 23:34.

Jesu i Hosi ya yi nene yi ringanelwako khwatsi hi ku fuma misava hi ndlela yi to vhuna vanhu. Kanilezvi i ta sangula rini a kufuma?