Ka ndzima yi hundzileko, hi wonile cikombiso leci Jesu a ci nyikileko. A cikombiso leco ci tiyisekisa lezvaku a Mufumo wa Nungungulu wu yimisilwe le tilweni niku a Hosi ya wona hi Jesu Kristu.

A Bhibhiliya gi wula lezvaku a cikhati leci a Mufumo wu nga sangula ku fuma, Jesu i no hlongola Sathani ni madhimoni yakwe le tilweni. Zvezvi Sathani ni madhimoni yakwe vo kota ku kucetela ntsena lezvi zvi mahiwako laha misaveni, ku nga cin’we ca zvilo zvi mahako lezvaku a zvilo zvi biha nguvhu kusukela 1914. — Kuvhululelwa 12:7, 9.

Hambu lezvi a zvilo zvi yaku zvi biha nguvhu laha misaveni, Jesu, kota Hosi ya Mufumo wa Nungungulu, i maha zvilo kasi ku vhuna vanhu misaveni yontlhe. Hi kota ya ntiro lowu Jesu a wu phrofetileko wa ku gondzisa Bhibhiliya misaveni yontlhe, a vanhu vo tala va gondza a ku tirisa a matshinya ya milayo ya Bhibhiliya siku ni siku wutomini gabye. (Isaya 2:2-4) A vanhu vo tala va gondza a kuva ni mawonela yo ringanisela hi ntiro, va chukwatisa a wutomi ga mingango yabye ni ku tirisa a titshomba tabye kanilezvi na va nga mahi tikhumbi ta titshomba. A vanhu lavo va gondza ku chukwatisa a wutomi gabye zvezvi va tlhela va va vanhu lava Nungungulu a va lavako lezvaku va fumiwa hi Mufumo wakwe.

Hambu lezvi Jesu a sinako a fuma le tilweni, a mifumo ya vanhu ya ha simama ku fuma laha misaveni. Hambulezvo, Nungungulu i byelile Jesu aku: ‘Fuma wena cikari ka valala va wena.’ (Lisimu 110:2) Lokuloku Jesu i ta lovisa a valala vakwe vontlhe vaku bhi a tlhela a tlhatlhisa lava va ti yimiselako ku ingisa Nungungulu.

Lokuloku a Mufumo wa Nungungulu wu ta maha cokari kasi ku

• Fuvisa a wukhongeli ga mawunwa. A wukhongeli legi gi gondzisako mawunwa xungetano hi Nungungulu gi tlhela gi xanisa vanhu gi ta fuva. A Bhibhiliya gi kombisa a wukhongeli ga mawunwa kota cibhayi. A kulovisiwa ka gona ku ta dzukisa vanhu vo tala. — Kuvhululelwa 17:15, 16.

• Fuvisa mifumo ya vanhu. A Mufumo wa Nungungulu wu ta maha cokari kasi wu lovisa yontlhe mifumo ya vanhu. — Kuvhululelwa 19:15, 17, 18.

• Fuvisa a vanhu vakubiha. Ahati lava va ti yimiselako ku maha zvakubiha va tlhela va ala a ku ingisa Nungungulu? “A vakubiha va ta susiwa laha misaveni.” — Mavingu 2:22.

• Fuvisa Sathani ni madhimoni yakwe. Sathani ni madhimoni yakwe va nga ta ha ‘kanganyisa matiko’. — Kuvhululelwa 20:3, 10.

Lezvo zvi ta wula yini ka vontlhe lava va vhumelako a ku fumiwa hi Mufumo wa Nungungulu?

A cikhati leci a to fuma le tilweni kota Hosi, Jesu i ta maha a zvilo zvo tala zva ku hundza zvontlhe lezvi zvi tshukileko zvi mahiwa hi tihosi ta misava. I tava zvin’we ni lava 144 000 lava va hlawulilweko cikari ka vanhu lezvaku vaya fuma naye. (Kuvhululelwa 5:9, 10; 14:1, 3) I ta maha zvontlhe kasi a kurandza ka Nungungulu ka maheka laha misaveni. Zvini lezvi a Mufumo wa Nungungulu wu to mahela vanhu laha misaveni?

• Wu ta fuvisa mababyi ni kufa. ‘A ku na muaki ni mun’we a ta ngaku: Ndza babya’ niku “ku nga ta hava ni kufa.” — Isaya 33:24; Kuvhululelwa 21:4.

• Wu ta tisa kurula ni kutshamiseka ka lisine. “A vana va wena va tava ni kurula ka hombe” niku ‘a mun’we ni mun’wani i ta tshama lahasi ka vhina wakwe, ni lahasi ka kuwu wakwe. A nga kona a ta nga va dzukisa.’ — Isaya 54:13; Mika 4:4.

• Wu ta va nyika a ntiro wa lisima a vanhu. “Ni vahlawulilweko va mina va ta tsakela mitiro ya mandla yabye. Va nga ta ti karatela mahala.” — Isaya 65:22, 23.

• Wu ta basisa a wuako ga hina. ‘A ciwula ni ligwangwa zvi ta tsaka, ni maphanya ma ta nengela, ma baleka khwatsi makhon’wa.’ — Isaya 35:1.

• Wu ta gondzisa a vanhu lezvi va faneleko ku maha kasi va kuma wutomi ga pindzukelwa. “Kasi va kuma wutomi ga pindzukelwa va fanele ku ku tiva wena Nungungulu wece wa lisine, na Jesu Kristu loyi u mu rumileko.” — Johani 17:3.

Nungungulu i lava ku u ti buza hi makatekwa lawo. (Isaya 48:18) A ndzima yi landzelako yi ta tlhamusela lezvi u nga mahako zvezvi kasi u kuma makatekwa lawo ya cikhatini ci tako.