A vanhu vo kari va kanakana lezvaku a Mhaka ya Nungungulu a yi ciciwangi. Muprofeti Isaya i wulile lezvaku a mhaka ya Nungungulu “yi ta simama kala kupindzuka”. (Isaya 40:8) Cini ci nga hi tiyisekisako lezvaku a zvitsumbiso zva Nungungulu a zvi ciciwangi?

Nungungulu i na ni ntamu wa ku hlayisa a Mhaka yakwe ni ku yi vhikela lezvaku yi nga ciciwi. Cikhatini ca kale, lava va nga kopiyara a mitsalo yo basa va wa gumesa va hlayela maletra kasi va tiyiseka lezvaku a ku na nchumu va nga engetela kutani ku cica kutani ku susa. Hambulezvo, kota lezvi a vanhu va nga kala ku mbhelela, a vatsali vo kari va mahile zvihoxo zva zvi tsongwani.

Ku na ni mazanazana ya tikopiya ta Bhibhiliya ti tsalilweko hi mandla a kaleloko. Loku ku hi ni kopiya yi nga ni kuhambana kutsongwani, yi nga fananisiwa ni tikopiya tin’wani kasi ku kuma lisine.— Kasi ku tiva zvin’wani, wona ndzima “Será que a Bíblia foi alterada?” ka jw.org.

Hi cikombiso, ku na ni maphepha ma vitaniwako ku mabhuku yo songiwa ya Bimbi Gofa, ma kumilwe lomu mhakweni kusuhani ni bimbi lego hi 1947. A mabhuku lawo ya kale ma na ni zvipandze zva mitsalo yo basa zvi tsalilweko kwalomo ka 2000 wa malembe ndzhako. A titlhari ti fananisile a mahungu ma nga ka mabhuku lawo ya kale ni mitsalo yo basa leyi yi nga kona masikwini ya hina. Zvini ti nga zvi kuma?

Ti kumile lezvaku lezvi zvi nga lomu ka Mhaka ya Nungungulu nyamutlha, zva fana ni lezvi zvi nga lomu ka mitsalo leyo ya kale. * Lezvo zvi komba ku lezvi hi zvi lerako lomu ka Bhibhiliya nyamutlha, hi zvalezvi zvi nga tsaliwa kusanguleni. Makunu, hi nga tiyiseka lezvaku Nungungulu i mahile zvontlhe zvi lavekako kasi ku vhikela lisine la Mhaka yakwe lezvaku yi nga ciciwi kala masikwini ya hina.

Hikwalaho, hi nga lera a Mhaka ya Nungungulu na hi tiyiseka hi mbilu yontlhe lezvaku lezvi hi lerako a zvi ciciwangi. Na hi tiva lezvo, a hi kambisiseni lezvi hi nga gondzako hi Nungungulu ka vaphrofeti vakwe.