Loku ku wa nga hi na gambo na ku nga hi na wutomi laha misaveni. A gambo gi vhuna tisinya a ku ti pswala matluka, zvitsangi, mihandzu, ni timbewu. Gi tlhela gi maha ku a tisinya ti pswonga mati hi timitsu maya ka matluka ma gumesa ma huma hi vapor.

Nungungulu wa nisa vhula leyi yi mahako misava yi pswala zvakuga kasi higa. Nungungulu, wa hi nisela tivhula hi le tilweni ni ku hi nyika tinguva ta mihandzu, ni zvakuga zvo tala, a tata timbilu ta hina hi kutsaka.

A vapswali vo tala va karatekela ku kuma zvakuga zvo enela ni zva ku boha kasi ku nyika va ngango wabye. A Bhibhiliya gi ngalo: “Cuwukani khwatsi a zvinyanyani zva tilo, a zvi byali, a zvi tshoveli, ne a zvi veketeli zvakuga matshaleni, hambulezvo a Papayi wa n’wina wa le tilweni wa zvi wundla. N’wina a mu va lisima ku hundza zvona ke?” — Matewu 6:25, 26.

“Gondzani ka lezvi a zvitsangi zva khwati zvi kulisako zvona . . . kanilezvi ndza mu byela ndziku: Hambu [Hosi] Solomoni ni titshomba tontlhe leti a nga hi nato a nga zangi a bohisa a ku khwatsi hi cin’we ca zvona. Makunu loku Nungungulu a gi bohisisa lezvo a byanyi ga khwati . . . a nga ta mu bohisisa a ku hundza lezvo?” — Matewu 6:28-30.

Kota lezvi Nungungulu a hi nyikako zvakuga ni zva ku boha, a zvi kanakanisi lezvaku a nga hi nyika ni cihi hi ci lavako wutomini. Loku hi maha kurandza ka Nungungulu, i ta katekisa a mizamo ya hina ya ku ti lavela zvakuga kutani ku hi vhuna ku kuma ntiro kasi hiva ni mali ya ku xava lezvi zvi lavekako. — Matewu 6:32, 33.

Hakunene, loku hi ehleketa hi gambo, vhula, zvinyanyani, ni zvitsangi, ha zvi wona khwatsi lezvaku hi na ni zvigelo zvo tala zva ku randza Nungungulu. A ndzima yi landzelako, yi ta tlhamusela lezvi a Muvangi wa hina a wulawulisako zvona ni vanhu.