Nungungulu a nga na cihlawulela niku i lava ku katekisa vanhu vontlhe.

Nungungulu i tsumbisile muphrofeti Abrahama aku: “Hi ka wena wontlhe matiko ma ta katekiswa.” — Genesisi 12:3.

Hi gondza yini? Hi gondza lezvaku Nungungulu wa hi randza nguvhu niku i lava ku katekisa vontlhe va mu ingisako — a vavanuna, vavasati, ni vanana.

Nungungulu i na ni wuxinji niku wa va katekisa lava va ti karatelako ku mu tiva.

Nungungulu i mu nyikile ntamu muphrofeti Mosi wa ku maha zvihlamaliso zva hombe. Hambulezvo, Mosi i khongele aku: ‘Ndzi kombise tindlela ta wena, ndzi ta ku tiva; ndzi wona lezvaku ndzi kumile thomo mahlweni ka wena.’ (Eksodusi 33:13) Nungungulu i tsakile hi cikombelo ca Mosi, a se mu katekisa hi ku mu nyika wutivi go tala, a tlhela a mu vhuna ku zwisisa tindlela takwe ni matshamela yakwe. Hi cikombiso, Mosi i tivile lezvaku a Muvangi wa hina i “Nungungulu wa wuxinji ni tipswalo”. — Eksodusi 34:6, 7.

Hi gondza yini? Hi gondza lezvaku Nungungulu i lava ku hi katekisa loku hi ti karatela ku mu tiva khwatsi, kani hi vavanuna, kani hi vavasati kutani vanana. Lomu ka Bhibhiliya, i komba lezvi hi faneleko ku mu khozelisa zvona. I tlhela a komba lezvaku wa hi randza nguvhu niku i zvi lava nguvhu a ku hi katekisa.

 Loku hi gondza xungetano hi Jesu, lezvi a nga maha, ni lezvi a nga gondzisa, hi nga ti buza hi makatekwa ya pindzukelwa ya Nungungulu.

Lomu ka Bhibhiliya hi gondza zvotala xungetano hi Jesu ni lezvi a nga gondzisa. Nungungulu i mu nyikile ntamu Jesu kasi a maha zvihlamaliso zvo tala, zvo kota ku hanyisa zvikhumu, zviwiri, ni zvilima. I tlhelile a vhuxa ni vanhu va nga file. Hi ku maha lezvo, Jesu i wo komba makatekwa lawa Nungungulu a to nyika vanhu vontlhe cikhatini ci tako. I tlhamusele lezvi hi nga mahako kasi hi kuma makatekwa lawo, i te: “Kasi va kuma wutomi ga pindzukelwa va fanele ku ku tiva wena Nungungulu wece wa lisine, na Jesu Kristu loyi u mu rumileko.” — Johani 17:3.

Jesu i wa zwela wusiwana, i wa hi ni tipswalo niku i wa hi mu nene. Hikwalaho, a vavanuna, ni vavasati, ni vanana, ni vahombe, va wa khitikana vaya ka yena hi ku vhumela lezvi a nga va ramba aku: ‘Gondzani ka mina hakuva ndzi rulile niku ndzi na ni mbilu yo ti koramisa, mu ta humula.’ (Matewu 11:29) Hambu lezvi a vanhu cikhatini ca Jesu va nga chepeta vavasati, yena i va kombile cichavo, wunene a tlhela a va nyika lisima.

Hi gondza yini? Hi gondza lezvaku Jesu i kombisile lirandzo la hombe hi vanhu. Leco cikombiso ca lezvi hi faneleko ku mahela van’wani.

A Bhibhiliya gi gondzisa lezvaku “kova ni Nungungulu mun’we” basi niku Jesu Kristu i wa wulawula lezvi a nga rumilwe hi Nungungulu. (1 Va Le Korinte 8:6) Jesu i zvi wulile kubaseni lezvaku Nungungulu wahombe a ku hundza yena niku hi yena a nga mu rumela a kuta misaveni. — Johani 11:41, 42; 14:28. *