Kota lezvi hontlheni hi tako hi ka Adhamu, a wanuna wo sangula, hi va ngango mun’we. Hambu lezvi ku rindzelwako lezvaku a zviro zva ngango zvi kombisana cichavo ni ku randzana, a ya hava hi ku zva karata masikwini ya hina. Kanilezvi, a Nungungulu wa hina wa lirandzo i lava ku hi maha zvezvo futsi.

‘U ta randza muakelani wa wena kota lezvi u ti randzisako zvona.’ — LEVI 19:18.

“Simamani ku randza valala va n’wina.” — MATEWU 5:44.

Wona lezvi a lirandzo li tshamisileko zvona hi kuya hi lezvi Nungungulu a nga wula lomu ka Mhaka yakwe, ka 1 Va Le Korinte 13:4-7:

“A lirandzo li na ni lihlazva-mbilu, li nene.”

Ehleketa hi lezvi: U ti zwisa kuyini loku a van’wani va ku kombisa lihlazva-mbilu kutani wunene, va tlhela va nga ku zangareli hambu loku u va gohele?

“A lirandzo a li na ciluse.”

Ehleketa hi lezvi: U ti zwisa kuyini loku a van’wani va tshamela ku ku kanakanela kutani va hi ni matshoho hi wena?

A lirandzo “a li ti laveli zva lona basi.”

Ehleketa hi lezvi: U ti zwisa kuyini loku a van’wani va kombisa cichavo hi mawonela ya wena va tlhela va nga kurumeti ku contlhe cikhati ku tira lawa yabye?

A lirandzo “a li hlayeli a zvilo zva kubiha lezvi li mahelwako.”

Ehleketa hi lezvi: Nungungulu i ti yimisele ku tsetselela lava va mu wonhelako va guma va ti sola. A Bhibhiliya gi: ‘A nga kawuki contlhe cikhati, ge hambu ku zangara kala kupindzuka.’ (Lisimu 103:9) Ha tsaka loku a wokari hi mu wonheleko a hi tsetselela, a hi zvo? Hikwalaho, hi fanele ku tekela ku tsetselela van’wani loku va hi wonhela. — Lisimu 86:5.

A lirandzo “a li tsaki hi zvilo zvi nga lulamangiko.”

Ehleketa hi lezvi: Loku hi lomu kuxanisekeni, a hi lavi ku a van’wani va tsaka hi kuxaniseka ka hina. Makunu, hinawu hi nga ta tsaka loku a van’wani va xaniseka, hambu loku va hi gohele.

Kasi hi kuma makatekwa ya Nungungulu, hi fanele ku va randzisa lezvo van’wani, na hi nga cuwuki tanga yabye, mudhawuko wabye kutani hlonge. A yin’we ya tindlela ta ku maha lezvo ku vhuna lava va lavako ku vhuniwa.