Muphrofeti Mosi i wulile lezvaku loku hi ingisa a milayo ya Nungungulu hi ta kuma makatekwa. (Deuteronome 10:13; 11:27) A hi ingisi Nungungulu hi ku chava ku tsayisiwa. Kanilezvi, hi zvi maha hi ku mu randza ni ku nga lavi ku maha nchumu wu nga wa ta mu swira. Zvontlhe zvi sukela laha ka ku hi tiva matshamela yakwe ya ma nene. A Bhibhiliya gi ngalo: “A ku randza Nungungulu ku ingisa a milayo yakwe niku a milayo yakwe a yi karati.”— 1 Johani 5:3.

Kanilezvi, loku hi ingisa Nungungulu hi kuma makatekwa hi ndlela muni? Wona tindlela timbiri:

A Bhibhiliya gi wula lezvi: ‘Hi mina Jehovha, Nungungulu wa wena, loyi a ku gondzisako lezvi zvi ku vhunako, . . . a ku rangelako ndleleni leyi u faneleko ku famba hi yona.’ — ISAYA 48:17.

Jehovha Nungungulu, a Muvangi wa hina, wa hi tiva niku wa hi gondzisa lezvi zvi lavekako kasi zvi hi fambela khwatsi. Loku hi lava ku lezvi a hi gondzisako zvi hi vhuna ku maha zviboho zva zvi nene, hi fanele ku lera Bhibhiliya hi tiva lezvi a lavako ku hi maha, hi tlhela hi zvi maha futsi.

A Bhibhiliya gi wula lezvi: “Ku katekile lava va zwako a mhaka ya Nungungulu va yi hlayisa!” — LUKA 11:28.

Inyamutlha, a vanhu vo tala va ingisako lezvi a Bhibhiliya gi zvi wulako va na ni litsako la lisine. Wona cikombiso ca wanuna wokari wa le Espanya a nga hi ni cizangazangani, loyi a nga hi ni xapi ka van’wani, ni ka sati wakwe. Ka siku go kari i no lera matimu ya Josefa, a n’wana wa Jakobe, ma tsalilweko hi muphrofeti Mosi. Josefa i xavisilwe kota khumbi a tlhela a vhalelwa paxweni na nga hi na nandzu. Hambulezvo, i no simama kuva munhu wo rula, wo olova a tlhela a ti yimisela ku tsetselela. (Genesisi zvipimo 37-45) A wanuna loye wa le Espanya i no gondza cokari, a guma aku: “A ku ehleketa hi cikombiso ca Josefa zvi ndzi kucile ku ndziva munhu wo olova, wa mu nene, ni wa ku ti khoma. Kota wuyelo ga kona, zvezvi ndzi ti buza hi litsako wutomini ga mina.”

A Mitsalo yo Basa, yi na ni wusungukati gin’wani xungetano hi lezvi hi nga mahelako van’wani. Wona wusungukati lego ka ndzima yi landzelako.