Inyamutlha, a vanhu vo tala misaveni yontlhe va vhumala zvakuga ni ko etlela. A van’wani va vilela ku hanya na va tsumba ku tava ni zvilo zva zvi nene cikhatini ci tako. Zvi mahisa kuyini ku loku hi ti karatela ku vhuna van’wani Nungungulu a hi tsakela a tlhela a hi katekisa?

‘Loyi a hawukelako zvisiwana i pembisa ka Jehovha; yena i ta chachazelwa hi zvimaho zvakwe zva zvi nene.’ — MAVINGU 19:17.

Jesu i hlawutele mufananiso wu wulawulako hi wanuna a nga biwa hi zvigevenga zvi mu tsika na a hi kusuhani ni kufa. (Luka 10:29-37) A wanuna wo kari va nga tivaniko, i no nyima a vhuna wanuna loye a nga bayisilwe. I mu vhunile hambu lezvi va nga hi va tiko go hambana.

A wanuna loye wa mu nene a nga mu nyikangi muri basi; kanilezvi i tlhelile a mu chavelela ni ku mu vhuna ka cikarato cakwe.

A mufananiso lowu wu hi gondzisa yini? Jesu i kombile lezvaku hi fanele ku maha ni cihi hi ci kotako kasi ku vhuna lava va xanisekako. (Mavingu 14:31) A Bhibhiliya gi gondzisa lezvaku zvezvanyana Nungungulu i ta mbheta wusiwana ni kuxaniseka. Hambulezvo, hi nga ti wutisa ku: Kasi Nungungulu i ta zvi mahisa kuyini, niku i ta zvi maha rini? A ndzima yi landzelako yi ta wulawula hi makatekwa lawa a Muvangi wa wena wa lirandzo a lavako ku ku nyika.