Nungungulu i nyikile vanhu a cinyikiwo co hlamalisa: Ku nga ku wulawula naye ni ku phofula a kutizwa kabye hi ku maha mukombelo. Muphrofeti Dhavhidha i khongele aku: “Wena loyi u zwako mikhongelo, a nyama yontlhe yi tata ka wena.” (Lisimu 65:2) Hi nga wu mahisa kuyini a mukombelo kasi Nungungulu a wuzwa a tlhela a hi katekisa?

A mikombelo ya wena yi ku vhululela ndlela ya ku u ‘vhulula mbilu ya wena mahlweni ka [Nungungulu]’ ni ku mu byela lezvi hakunene u ti zwisako zvona. (Lisimu 62:8) Nungungulu wa Ntamu Wontlhe i randza mikombelo yi humako mbilwini.

Hambu lezvi Nungungulu a nga ni zvikhundla zvo tala, zvo fana ni ku “Hosi” kutani “Muvangi”, ova ni vito gin’we basi. I wulile lezvi: ‘Ndzi Jehovha, hi gona vito ga mina lego.’ (Isaya 42:8) A vito Jehovha gi kumeka cipimo ca 7000 wa makhati lomu ka Mitsalo yo Basa. A vaphrofeti vo tala va wulawulile na Nungungulu hi ku tirisa vito gakwe. Abrahama i wulile lezvi: ‘Jehovha, . . . ndza engeta ndzi wulawula [na wena].’ (Genesisi 18:30) Hinawu hi fanele ku tirisa vito ga Nungungulu a cikhati hi mahako mukombelo.

Kani hi maha mukombelo hi lirimi muni, Nungungulu wa ma zwisisa maalakanyo ya hina ni kutizwa ka hina. A Bhibhiliya gi hi tiyisekisa lezvi: “Nungungulu a nga na cihlawulela, kanilezvi ka tixaka tontlhe loyi a mu chavako ni ku maha zvo lulama wa amukeleka kakwe.” — Mitiro 10:34, 35.

Hambulezvo, kasi hi katekisiwa hi Nungungulu, a hi faneli ku maha mukombelo basi. Ku ni zvin’wani hi fanelo ku maha. Hi ta zvi wona ka tindzima ti landzelako.