XI KONA u fanako hi xona ni vaprofeti va kale ke? Ka xipanze lexi xi nge “Glossário de Termos Bíblicos,” a Tradução do Novo Mundo da Bíblia Sagrada gi tlhamusela muprofeti hi magezu lawa: “Munhu loyi Nungungulu a mu tirisako kasi ku tivisa makungo yakwe. A vaprofeti va wa hi vawulawuli va Nungungulu; va wa nga biki zilo za masiku maha tako ntsena, kanilezi va wa nyika kambe a gonziselelo, ni milayo, ni kulamula ka Jehova.” Hambu lezi u kalako u nga wuli zilo za masiku ma ha tako, wenawu u wulawulela Nungungulu, u huwelela lezi zi nga lomu ka Mhaka yakwe. — Mat. 24:14.

Handle ko kanakana, i lungelo ga hombe a ku bikela vanwani xungetano hi Nungungulu wa hina Jehova, ni ku va gonzisa a kuranza kakwe hi vanhu! Hi tira zinwe ni ‘ngelosi yi purumako xikari ka tilo.’ (Kuv. 14:6) Hambulezo, hi nga tshuka hi kumana ni zikarato zi hi mahako hi rivala a lungelo lego go saseka. Zikarato muni? Ku ngava kukarala, ku mbhela ntamu, kutani ku ti wona hi nga hi na ntamu wo tatisa xiavelo xo kari. A vaprofeti va kale vonawu va wa tshuka va ti zwisa lezo, kanilezi a va tsukulangi. Niku Jehova i lo va vuna ku tatisa ziavelo zabye. Wona zikombiso zo kari, ni lezi hi nga va pimanyisisako zona.

A mitiro ya hina ya siku ni siku yi nga tshuka yi hi siya na hi karele nguvu laha ko tlhela hi godola kuya kuxumayeleni. Lisine lezaku hi fanele ku humula; hambu Jesu ni vapostoli vakwe va wa humula. (Mar. 6:31) Kanilezi ehleketa hi Ezekieli le Babuloni ni ntiro wakwe xikari ka vaIsraeli lava va khomilwe le Jerusalema. Ka khati go kari, Nungungulu i lo byela Ezekieli lezaku a teka thayela, kutani xitini, a tsala a doropa ga Jerusalema. Anzhako ka ku tsala, Ezekieli i wa fanele ku ranzela doropana lego hi mabutho yo fananisa hi ku etlela 390 wa masiku hi reve gakwe ga xibhabha, a gumesa a etlela 40 wa masiku hi reve gakwe ga xinene. Jehova i lo byela Ezekieli aku: “Nzi ta ku boha hi magota, kasi u nga zi koti ku hunzuluka  ka ginwani reve, kala u mbhetisa a masiku ya kuvimbezela ka wena.” (Ezek. 4:1-8) Kuzilava lezo zi kokile kupima ka vaIsraeli lavo va nga hi wukhumbini. Ezekieli i wa fanele ku mbheta lembe gontlhe na a maha nchumu lowo wo bayisa. Xi wa ta tatisekisa kuyini xiprofeto lexi?

Ezekieli i wa zi zwisisa ku hikuyini a rumelweko kota muprofeti. A xikhati a nga ruma Ezekieli, Nungungulu i te ngalo: “Hambu loku [a vaIsraeli] va ingisa, kutani va nga ingisi, . . . va ta zi tiva lezaku ku na ni muprofeti xikari kabye.” (Ezek. 2:5) I wa tshama hi ku ti alakanyisa kungo ga xiavelo xakwe. Hikwalaho, i lo maha hi kuziranza a ntiro lowo wa ku ranzela Jerusalema hi ndlela yo fananisa. Ive muprofeti wa lisine. Yena ni vaIsraeli-kulobye va nga hi wukhumbini va lozwa mubiko waku: “A muti wu hlulilwe!” Kunene a vaIsraeli va lo zwisisa lezaku ku wa hi ni muprofeti xikari kabye — Ezek. 33:21, 33.

Nyamutlha hi tlharihisa vanhu xungetano hi kuloviswa ka tiko gontlhe ga Satani. Hambu loku hizwa kukarala nyameni, hi tirisa ntamu wa hina kasi ku xumayela Mhaka ya Nungungulu, hi maha tienzo to wuyela, ni ku fambisa zigonzo za Biblia. Laha a ziprofeto za kugumesa ka tiko legi zi tatisekako, hi tala hi kutsaka hi kuva ‘vanhu lava Nungungulu a va tirisako kasi ku tivisa makungo yakwe.’

Hi tira hi kutikarata na hi vuniwa hi moya wa Jehova; hambulezo, hi nga tshuka hi mbhela ntamu hi kota ya lezi a vanhu va ma wonisako zona mahungu ya hina. Hi fanele ku alakanya a xikombiso xa muprofeti Jeremia. I wa hlekiwa, a rukiwa, a tlhela a sapatelwa hi ku huwelela a mahungu ya Nungungulu ka vaIsraeli. Ka khati go kari, Jeremia i zile aku: “Nzi nga ta ha mu kumbuka, hambu ku xuxa vitweni gakwe.” Jeremia i wa hi munhu a ku fana na hina. Hambulezo, i lo simama a huwelela mahungu ya Nungungulu. Hikuyini? I lo engeta aku: “Ku kona a mbilwini ya mina a ku fanana ni nzilo wu vurako, na wu valelwe lomu marambyini ya mina, nzi rerekile hi ku ti khoma, a nza ha zi koti.” — Jer. 20:7-9.

Hinawu loku hi mbhela ntamu hi kota ya lezi a vanhu va ma wonisako zona a mahungu ya hina, hi nga tiyiswa hlana hi ku ehleketa hi mahungu lawa hi xumayelako. Ma nga fana ni ‘nzilo wu vurako, na wu valelwe lomu marambyini ya hina.’ A ku lera Biblia siku ni siku zi nga hlanganyetela nzilo lowo lezaku wu tshama na wu vura.

A maKristu yo kari ma tshuka ma karateka loku ma nyikwa ntiro wo kala ma nga wu zwisisi. Za koteka ku ngha muprofeti Hosea a ti zwisile zalezo. Jehova i mu byelile lezi: “Famba, uya teka a sati wa wubhayi ni vanana va wubhayi.” (Hos. 1:2) Hi nga ti alakanyela na u lava ku chada, Nungungulu aku a sati wa wena i tava xibhayi! U nga ti zwisa kuyini? Hosea i lo vumela xiavelo lexo. I lo tekana na Gomera, va pswala mufana. Hi kufamba ka masiku, Gomera i lo pswala nhanyana ni munwani mufana. Zi wonekisa ku khwatsi lava va vambiri vo gumesa i va kumile hi wubhayi. Jehova i wa byelile Hosea lezaku a sati wakwe i wa ta “lanzela a zigangu zakwe.” Wona lezaku a hi xigango, kanilezi zigango. Anzhako ka lezo, i wa ta zama ku tlhelela Hosea. Makunu, loku ku wa hi wena Hosea, na u mu amukele sati wa wena? Hi zalezo Jehova a nga lava lezaku Hosea a zi maha! A muprofeti loyi i hakhele ni mali kasi ku wuyisa sati wakwe. — Hos. 2:7; 3:1-5.

Kuzilava Hosea i wa ti wutisa lezaku a ku tatisa xiavelo lexo zi ta vuna yini. Hambulezo, hi ku maha zilo lezo za ku khwatsi i drama, Hosea i hi vuna ku zwisisa a kubayisa loku Nungungulu Nyamintamu a ku zwileko a xikhati lexi a vaIsraeli va nga mu tsika va ya khozela vanwani vanungungulu. A vaIsraeli vo kari va timbilu ti nene va tlhelele ka Nungungulu hakunene.

Nungungulu a nga rumi munhu ku “teka a sati wa wubhayi” nyamutlha. Hambulezo, xana xi kona hi xi gonzako ka Hosea hi kuva a vumele ku tatisa xiavelo lexo? A xinwe xa zigonzo ku vumela ku xumayela mahungu yo saseka ya Mufumo ‘kubaseni ni lomu mitini,’ hambu loku zi hi karatela. (Miti. 20:20) Kuzilava a tindlela to kari ta ku xumayela a Mufumo ta  ku binzela. A vanhu vo tala va gonzako ni Timboni ta Jehova va wula lezaku za va tsakisa ku gonza Biblia, kanilezi va nga ta tshuka va famba va xumayela mahungu lawo hi muti ni muti. Hi kufamba ka masiku, a kutala kabye va lo sangula ku maha ntiro lowo va nga wula lezaku va nga ta wu kota. Xi kona u xi gonzako kwalaho?

A kuva Hosea a vumele ku tatisa xiavelo xakwe xo binza zi hi nyika xigonzo xinwani kambe. I wa hi ni zigelo za ku ala ku maha ntiro lowo wa ku teka sati wa xibhayi. Himani a nga wa ta zi tiva ku i wa nyikilwe xiavelo lexo loku Hosea i wa nga tsalangi matimu lawo? Hinawu hi nga tshuka hiva ka xiyimo xi hi vululelako mole wa ku bhula ni munhu xungetano ha Jehova laha ka ku zi wa nga ta tiviwa hi munwani lezaku hi vile ni mole lowo. Anna, a nga xigonzani xa xikola le Estados Unidos i tshukile ava ka xiyimo lexo. A mugonzisi wakwe i lo kombela zigonzani lezaku zi tsala mahungu ma wulawulako hi nchumu zi wu seketelako nguvu, zi gumesa zi zama ku kholwisa vanwani lomu saleni. Anna na a gi tsikile gi hunza a lungelo lego go nyika wukustumunyu. Hambulezo, i lo gi wona kota lungelo a nyikilweko hi Nungungulu. Laha a nga alakanyela lezi kuzilava zi nga wa ta humelela, i lo khongela ka Jehova, zonake a mbilu yakwe yi xuva nguvu ku lonzowota mole lowo. I lo tsala mahungu ma nga hi ni hloko ya mhaka yaku “Evolusawu: wona lisine la zilo.”

A xikhati lexi Anna a nga tlhamusela mahungu yakwe, a nhanyana wo kari a nga kholwa evolusawu i lo mu chululela ziwutiso kasi ku mu kona. Anna i lo nyika mihlamulo yo zwala yo seketela xiyimo xakwe. A mugonzisi wakwe i lo hlamala nguvu a tlhela a chachazela Anna kota yena a tileko ni mahungu ma kholwisako nguvu ka wontlhe. Kusukela ka siku lego, Anna i simama a bhula hi kuvangiwa ka zilo ni nhanyana loyi a nga zama ku mu kona. Kota wuyelo ga kuva a vumele a “xiavelo” lexo a nyikilweko hi Jehova, Anna i ngalo: “Zalezi nzi xumayela a mahungu yo saseka na nzi nga chavi nchumu.”

Hambu lezi hi nga hiko vaprofeti va ku profeta, hi ku pimanyisa a moya wa kutikarata wa vaprofeti vo kota Ezekieli, na Jeremia, na Hosea, hinawu hi nga zi kota ku tatisa a kuranza ka Jehova hi hina nyamutlha! Ka wukhozeli ga ngango kutani ka xigonzo xa wena wutsumbu, zi ngo yini loku wo gonza matimu ya vaprofeti vanwani va kale u tlhela u ehleketa hi lezi u nga va pimanyisisako zona?